1 Maad we 2 - NQAARIIT NE ROOG

Xa as xa palakaand axe Dawid a asna a Salomo

¹ Ye Dawid a andna yee fa nqon doŋ a yoqɗate, a moofna a Salomo fee o ƥeem, a cooxin xa as um ee:

² «Mi koy, ndiiki um inoox meen. Saƭakinooxi boog, ref o koor.

³ Nanani ke o Yaal oxe Roog of a heblitna, ñaaƴaa na ƭat um, gayaa ke ta dalinna, kebil um, bargal um fo fa lay um, ne ta bindteena na cangin ale Moyiis. Neene, xan o suur no fop ke o jeemkaa fo muu sagoona.

⁴ Yaaga, a woora yee xan o Yaal oxe a fadin a tegit um fa mi, ye ta layna yee: ‹Boo xa taan of a ngayna a pesoorooƭ den, a ñaaƴaa fo o woor mbaambir es na qeeñ den fop fo na xa laaw den fop, ñakkiro muk o leng na den oxaa rondandoonga took uum-maamaad le Isra’el.›

⁵ Andahinaa a paax ke Yowab fee o ƥiy no tew o ne’e Seruya a fi’axama, ye ta warna parɓa ƭik ke Isra’el ndefna Abineer fee o ƥiy Neer fa Amasa fee o ƥiy Yeter. Ye jam a refaa no saax le, a waru a den, a ɓax fo’oy den, a ɗuumin no kumnoor ndet um fo na xa ñaaƭ axe ta rokoox’ina.

⁶ Xan o fesoorit o jeg-yiif of, ndax xaƴkino ta xaad jaaniif na yelem fo xa puum um.

⁷ Xa ƥiy axe Barsilay ngenna Galaad o mat, damti den ƥay ƭik, da mbogaa fa wo o roon kili, yaam den ƈufig’axam, ye um ƴufaa a Absalom fee o maag of.

⁸ Jegaa itam me widoonga a Simey fee o ƥiy Gera, a fog na carind ale Bensame too a gen Bahurim. A saloox’axam a salax a ƭomu, ye um ƴufaa Mahanayim, ndaa ye um nomtooxiidaa, a xetooxiidaxam no xuluɓ olaa Yordaan, soo um daaɓoox fo ten no Yaal oxe yee warkinum.

⁹ Ndiiki koy, ba o ñakin o xaw. Wo fee refna o kiin o cegu yiif, andaa ne waroona o fesoorit fo ten. Ke ta fuumna fuum fop oo, fat o fi boo ta xaad jaaniif.»

Dawid a xona, soo Salomo a rondandin

¹⁰ Dawid a daba daan um soo a gasel na ƥak ale ten kam Yeerusaleem.

¹¹ Dawid a maadoox’a fop oo fop xa kiid qarɓeen nahik kam Isra’el. Kaa eet o maadoox xa kiid ɓetaa ƭaq kam Hebron soo a maadoox xa kiid qarɓeen tadik fo xa kiid xa tadaq kam Yeerusaleem.

¹² Salomo a moofa no uum-maamaad le Dawid fee faap um, too maat um a saƭik’a koŋ.

Salomo a warnoora a Adoñaa

¹³ Na bes fa leng Adoñaa fee o ƥiy Dawid fa Hagit a soƥiida a Batseeba fee ya Salomo. Oxeene a laamtaan ee: «Mbaar jam soom ɓisiidong?» Adoñaa a doonaan ee: «Jam soom oo kañ!»

¹⁴ A ɓaata teen ee: «Kaa jeg kaa bugoonga o lay.» O tew oxe a doonaan ee: «Layi!»

¹⁵ A layaan ee: «Andaa yee maat ne, mi war’un o jeg, too sax Isra’el fop kaa cungoogu um maadoox. Kaa koy, a guuta suptoox boo Salomo fee o ndeɓ es a jegat maat ne, yaam neene o Yaal oxe a bugtun.

¹⁶ Ndiiki koy, leng kut um xeɗang, too ngela ba xañaam o ten.» O tew oxe a doonaan ee: «Layi!»

¹⁷ Adoñaa a layaan ee: «Kaam xeɗang, o layanaam o maad Salomo, ta ci’aam a Abisag fee genna Suuneem o tew. Andaam ee fañanirang tig.»

¹⁸ Batseeba a doonaan ee: «A faaxa, xam layanong o ten o maad oxe.»

¹⁹ Batseeba a reta maa no maad Salomo, ndax ta lay fo ten kaa farna na Adoñaa. O maad oxe a inooxa a xetooxin, a gung mbaambir um soo a moof no uum-maamaad le ten, a diƈin uum lakas na ñamaak um, ya um a moof teen.

²⁰ Cinj kaaga, Batseeba a layaan ee: «Kaa jeg soom o ndik onqaa bugoonga o xeɗ, too ngela ba xañaam o ten.» O maad oxe a doonaan ee: «Yaay, xeɗi ke bugoona, too fañankiroong o ten.»

²¹ O tew oxe a layaan ee: «Fat Abisag fee genna Suuneem a ci’el a Adoñaa fee o maag of, ta refik o teem.»

²² O maad Salomo a doona a ya um ee: «Xar taxu o xeɗanaa a Adoñaa a Abisag fee genna Suuneem? Pafeen o xeɗan maat ne rek, yaam o maag es a refu! Xeɗaneen o ten, ten fa Abiyataar fee o saasadax fa Yowab fee o ƥiy Seruya.»

²³ Maaga, Salomo a daaɓooxa no Yaal oxe yee: «Yaasam Roog a halakaam, um warnoorangee a Adoñaa, yaam ne ta saɗna o xeɗit keene.

²⁴ Ne ta wooritna yee o Yaal oxe xe ñoowaa, ten fee saƭkandaxama, a moofnaam no uum-maamaad le faap es Dawid soo a regaam maat ne, mi fo xa taan es, neene a woortu yee xaye fee xaye sax Adoñaa a xon.»

²⁵ Maaga, Salomo a hebla a Benaya fee o ƥiy Yehoyada, soo ta ret, a warin. Neene mat Adoñaa a xontu.

Salomo a raxta a Abiyataar Yeerusaleem

²⁶ Cinj kaaga, o maad oxe a laya a Abiyataar fee o saasadax ee: «Aca xaadi Anatot, no lanq of, yaam fa nqon doŋ hel’ong. Kaa koy, warnoorkiroong xaye, yaam na jamaane Dawid fee faap es wo saqoogu arka ne no Yaal oxe na refkaa boo faw soo xaajir fo ten coono um fop.»

²⁷ Neene, Salomo a xañta a Abiyataar ta fadin o far um nen o saasadax no Yaal oxe, ndax ke o Yaal oxe a lay’ina took mbind ne Eeli kam Silo a fadnoox.

Salomo a warnoora a Yowab

²⁸ Ye Yowab a yegna ke dal’ina a Adoñaa fa Abiyataar, a ƴufa no Ƭiif naa no Yaal oxe, a saaƭoox na xa can axe no sadaxand ole. Ten koy, Adoñaa a farit’u, ke ta far’eerna far fa Absalom yaaga fop oo.

²⁹ Maaga, Salomo a yegne yee Yowab a ƴufa no Ƭiif naa no Yaal oxe, a ref paam o sadaxand olaa. Salomo a lulta o laamtanel a Yowab ee: «Xar damong boo o ƴufaa no sadaxand ole?» Yowab a doona yee: «Kaam saɗarong, ten taxu um jaɓnooxiid me no Yaal oxe.» Naaga, Salomo a hebla a Benaya fee o ƥiy Yehoyada yee: «Reti warin!»

³⁰ Benaya a reta no Ƭiif naa no Yaal oxe, a lay a Yowab ee: «O maad oxe a hebla yee o sutoox mene.» Yowab a doonaan ee: «Ha’aa, meeke um xonitkaa.» Benaya a nomtooxiida me no maad oxe, a jangtooxin ke Yowab a doon’uuna.

³¹ O maad oxe a layaan ee: «Fi’teen ne ta laytuuna. Wareen, gasin. Neene, xan o ɓogaam, mi fo ƥasil es no fo’oy le Yowab a ɓaxna no kaa leng a andeerna.

³² Abineer fee o ƥiy Neer, farɓa fa maak fee Isra’el fa Amasa fee o ƥiy Yeter, farɓa fa maak fee Yudaa, wiin waa moƴna o njof, a moƴ o mbaax a Yowab a ndeeƭu. Kaa koy, oxeene a warta a den laƥ, too Dawid fee faap es yegee teen dara. Yaaga boog, xan o Yaal oxe a gadin a Yowab a bar ale ta warna weene!»

³³ Yowab fo xa taan um o mat na ngadooxkan boo kili, ndaa Dawid fo xa taan um, ƥasil um fo maad we na mbaqaqoorkaa no ten fop xan o Yaal oxe a ci a den jam boo faw.»

³⁴ Benaya fee o ƥiy Yehoyada a dalfooxa o nomtoox maa Yowab, a warin. Cinj kaaga, a gase no mbind um ne reeƭna kam a koƥ-a-ƥor alaa.

³⁵ O maad oxe a rondanda na seek ale Yowab a Benaya fee o ƥiy Yehoyada, soo Saadok fee o saasadax, ta rondandin na seek ale Abiyataar.

Salomo a warnoora a Simey

³⁶ O maad oxe a xoyna a Simey, a layin ee: «Maxani a xoox of mbind kam Yeerusaleem. Fat o gen teen too ba o sutooxin o saax o leng.

³⁷ Fat o and koy ee a koom aluu sutooxoona teeru fee, xaañ a yulanq ale Kederon, xan o xon ɗong, too wo na gadooxkaa fo’oy of.»

³⁸ Simey a doona o maad oxe yee: «A faaxa. Xan o tag of a fi ke o maad oxe o yaal es a heblitna.» Simey a genooga Yeerusaleem boo ngap xa kiid.

³⁹ Cinj xa kiid xa tadaq, surga ƭik Simey a ƈufa maa Akiis fee o maad Gaat too a ref o ƥiy Maaka. Simey a yegne yee: «Surga ke wo owaay na teeru faa Gaat.»

⁴⁰ Simey a inooxa, a humin o faam ole ten, a ret Gaat maa Akiis a xotik surga ke ten. Maaga, a reta boog, a xottiid surga ke ten Gaat.

⁴¹ Salomo a yegne yee Simey a inoora Yeerusaleem, a ret Gaat boo a nomtooxiid.

⁴² O maad oxe a lulta a Simey, a layin ee: «Ndax daaɓooxnoor’iroong no Yaal oxe yee: ‹A koom aluu sutooxoona teeru fee, ret muu ta waagna waag o ref, xan o xon,› soo o doonaam ee: ‹A faaxa. Nanaaxoong.›

⁴³ Xar taxu boog gayiro a taaƥ ale daaɓoox’oona no Yaal oxe soo nanaƭaran ke hebil’oonga?»

⁴⁴ O maad oxe a layahina a Simey ee: «Andaa a paax no xeeñ of paaxeer ke fi’oona a faap es Dawid fop. Xan o Yaal oxe a gadnong kañaan of.

⁴⁵ O maad Salomo koy a barke’e, too uum-maamaad le Dawid xan o Yaal oxe a saƭkandin boo faw.»

⁴⁶ Maaga, o maad oxe a hebla a Benaya fee o ƥiy Yehoyada, ta sut a Simey, a warin. Neene, maat ne Salomo a moƴa o saƭik a paax.