1 Maad we 1 - NQAARIIT NE ROOG

Adoñaa a buga ref o maad

¹ O maad Dawid kaa nogoy’atu lool. A hul’ange sax, taxoogee ta waag o sumnoox.

² Maaga, dag we ten a layaan ee: «Daali maad, fat i mbaaƭanong o njaaƈ o ndew onqaa refna fa wo, a topatooxang, a wondooxaa paam of. Neene, xan o maad oxe o yaal in a waag o sumnooxaa.»

³ A mbaaƭa kam Isra’el fop o njaaƈ o ndew, soo a nga a Abisag fee genna Suuneem, a ƥisiidin o maad oxe.

⁴ O njaaƈ o ndew onqe koy kaa mos’u bo. A topatooxooga o maad oxe, a jalanan, ndaa o maad oxe mosee o and ke ta refna.

⁵ Adoñaa fee o ƥiy Dawid fa Hagit kaa magnandooxoogu yee: «Mi na refkaa o maad!» A waaƭana a xoox um a sareet-xire leng fo pis fo goor qarɓeen ƥetik waa na adooxanan.

⁶ No ñoow um fop koy, faap um mosiran o xasan mbaat ta layin ee: «Xar taxu o fi kene?» Adoñaa mat, kaa reeƭu o koor o mosu too a xen caq. Cinj ye Absalom a xonna ten yoq’atu taaw Dawid.

⁷ Adoñaa a hiɓa o ngir fa Yowab fee o ƥiy no tew o ne’e Seruya fa Abiyataar fee o saasadax, soo weene a yoon fo ten.

⁸ Kaa koy, Saadok fee o saasadax, Benaya fee o ƥiy Yehoyada, Natan fee o tuleer, Simey, Rey fo xir say we Dawid yoon’ee fa Adoñaa.

Natan fa Batseeba a ndakta a Salomo a caf

⁹ Adoñaa a sadaxta cegel kaa ngatna na ked ake, qoox fo xa qeel xa kiñu paam ɓil laa na xoyeel Sohelet denda fo a cur alaa Rogel. A xur’a xa ƥiy axe no maad Dawid ndefna xa teɓ um fo goor we no fiisel ole Yudaa fop njalanoogna o maad oxe.

¹⁰ Kaa koy, xur’ee o tuleer Natan, Benaya, xir say we fa Salomo fee o ndeɓ um.

¹¹ Maaga, Natan a soƥiida a Batseeba fee ya Salomo, a layin ee: «Ndax kaa yegiro yee Adoñaa fee o ƥiy Hagit a refata o maad, too o yaal in Dawid andee teen tig?

¹² Xam asong boog. O reefangaan, xan o mucil o ñis of fo ole no ƥeef Salomo.

¹³ Reti soƥik o maad Dawid, layin ee: ‹Daali maad o yaal es, wo o mat daaɓoox’u fa mi fee o ceefeer of ee xan Salomo fee o ƥees a rondandong, a moof no uum-maamaad le wo. Yaaga boog, xar taxu Adoñaa a refat o maad?› »

¹⁴ Natan a ɓaata teen ee: «Neene, boo o layaa fo o maad oxe, xam rokiid mi fa xoox es soo ñoowdand fa lay of.»

¹⁵ Maaga, Batseeba a soƥka o maad oxaa na ndok um, yaam kaa nogoy’atu lool. Abisag fee Suuneem a reeƭa no topatooxan.

¹⁶ Batseeba a gooknooxa, a gung mbaambir o maad oxe, soo o maad oxe a laamtin ee: «Xar oo koy?»

¹⁷ Batseeba a doonaan ee: «O yaal es, daaɓoox’aa fa mi fee o ceefeer of no Yaal oxe Roog of ee o ƥees Salomo na rondandkang, a moof no uum-maamaad le wo.

¹⁸ Ndiiki koy, Adoñaa xe maadooxaa, too yegiro teen dara, wo daali maad o yaal es.

¹⁹ A sadaxta cegel kaa ngatna na ked ake fo qoox fo xa qeel xa kiñu xa mayu soo a xur xa ƥiy axe no maad oxe fop fa Abiyataar fee o saasadax fa Yowab fee farɓa fa maak fee, ndaa xuree o ƥeef Salomo fee o tag of.

²⁰ Ndiiki koy, daali maad o yaal es, Ii-isra’el we fop kaa ngaan na wo, ndax o lay a den oxe na rondandkang, a moof no uum-maamaad le no maad oxe o yaal es.

²¹ O fi’angiran, moskee a poor na mi fa Salomo fee o ƥees, yaa o maad oxe o yaal es a dabkaa daan um.»

²² Ye Batseeba a maadna o layaa fo o maad oxe, o tuleer Natan a fadiida.

²³ O maad oxe a yegne yee o tuleer Natan a gara. A rokiida, a gooknoox, a gung a lanq mbaambir o maad oxe.

²⁴ Cinj kaaga, a laya yee: «Daali maad o yaal es, ndax wo layu yee Adoñaa na rondandkang soo a moof no uum-maamaad le wo?

²⁵ Yaam xaye a inoora na teeru fee, a sadaxit cegel kaa ngatna na ked ake fo qoox fo xa qeel xa kiñu xa mayu. A xura xa ƥeef axe fop fo aa-adax we no xiixire we fa Abiyataar fee o saasadax. Weene fop owaay fo ten, a ñaamaa a yeraa, a soroxole’aa yee: ‹Yaasam o maad Adoñaa a ñoow!›

²⁶ Kaa koy, xuriraam, mi fee o tag of fa Saadok fee o saasadax fa Benaya fee o ƥiy Yehoyada bo na Salomo fee o ƥeef sax.

²⁷ Daali maad o yaal es, ndax keene na wo a hatu too andnooriraamo, mi fee o tag of, oxe na rondandkang, a moof no uum-maamaad le no maad oxe o yaal es?»

Dawid a jila a Salomo ndax ta rondandin

²⁸ O maad Dawid a doona yee: «Nqoyanaamoo a Batseeba.» Oxeene a rokiida, a geenoox mbaambir o maad oxe.

²⁹ Maaga, o maad oxe a daaɓooxa yee: «Ne ta wooritna yee o Yaal oxe xe ñoowaa, ten fee wataxama na naqad fuu refna,

³⁰ xam fadin xaye ke daaɓoox’uuma fa wo no Yaal oxe Roog fee Isra’el, ye layoonga yee: ‹O ƥeef Salomo na rondandkaxam, a moof no uum-maamaad le mi na seek es.› »

³¹ Maaga, Batseeba a dalfooxa o gooknoox, a gung a lanq mbaambir o maad oxe, a lay ee: «Yaasam o maad Dawid fee o yaal es a ñoowaa boo faw!»

³² Cinj kaaga, o maad Dawid a xoyna a Saadok fee o saasadax fo o tuleer Natan fa Benaya fee o ƥiy Yehoyada. Ye da njaaɓiiduuna,

³³ a laya a den ee: «Yoonyo fo dag we mi, mi fee o yaal nuun, ŋaayin a Salomo fee o ƥees no mberkele ne mi, ƥisin na cur alaa Giihon.

³⁴ Maaga, fat Saadok fee o saasadax fo o tuleer Natan a ƭuumin o maad Isra’el. Fat nu luuƥaa, soroxole’aa yee: ‹Yaasam Salomo fee o maad a ñoow!›

³⁵ Cinj kaaga, fat nu nomtooxiid na teeru fee, Salomo a adooxan a nuun, a gar, a moof no uum-maamaad le mi, a rondandaam, yaam ten jilum ndax ta adooxan xeet fee Isra’el fa Yudaa.»

³⁶ Benaya fee o ƥiy Yehoyada a doona o maad oxe yee: «Amiini! Yaasam o Yaal oxe Roog fee no maad oxe o yaal es a saƭkand fa lay of!

³⁷ Yaasam, ne o Yaal oxe a refit’ina fo o maad oxe o yaal es, ta refit neen fa Salomo itam too a ci maat um o ndam onqaa hupna onqe no maad Dawid fee o yaal es!»

Salomo a dode o maad

³⁸ Maaga, Saadok fee o saasadax, o tuleer Natan, Benaya fee o ƥiy Yehoyada fo Keekeret we fo Peepelet we yetooxoogna o maad oxe a ndeta maa Salomo, a ŋaaynin no mberkele ne no maad Dawid soo a ƥisin na cur alaa Giihon.

³⁹ Saadok fee o saasadax a xotta o jan ole na diwliin fee no Ƭiif ne no Yaal oxe soo a ɗuum a Salomo ndax ta dodin o maad. Maaga, a ndalfooxa o luuƥ, soo xeet faa fop a soroxole’aa yee: «Yaasam Salomo fee o maad a ñoow!»

⁴⁰ Cinj kaaga, xeet faa fop a nomtooxa na teeru faa, a ndeefin, a ndef no liitaa, a mbelakinooxaa fo o ɗaay o maak. Lanq ke kaa yo’nooxoogu yaam fangax le den.

Salomo a waasana a Adoñaa

⁴¹ Yaa Adoñaa fo we ta xur’ina fop a ƈutaa a ñaam rek, a nana coow laaga. Ye Yowab a nanna fangax le na luuƥ ake, a laya yee: «Xar garu fo coow maak lene kam teeru fee?»

⁴² Ye ta maadna o layaa, Yoonatan fee o ƥiy Abiyataar fee o saasadax a fadiida, soo Adoñaa a layin ee: «Gariidi, yaam o kiin o teyu refo too ga’na rek o nan o felu o ɓisiidaa.»

⁴³ Yoonatan a doona a Adoñaa fo a ƭelem akene yee: «Heey ha’aa! O yaal in Dawid fee o maad a dalna a Salomo o maad.

⁴⁴ O maad oxe kaa yoonandtin a Saadok fee o saasadax, o tuleer Natan, Benaya fee o ƥiy Yehoyada, Keekeret we fo Peepelet we yetooxoogna o maad oxe, da ŋaaynin no mberkele ne no maad oxe.

⁴⁵ Saadok fee o saasadax fo o tuleer Natan a ƭuumtaan o maad na cur alaa Giihon. A nomtoortiida maaga, a mbelakinooxaa fo o ɗaay o maak, teeru fee fop a yo’noox. Keene gartu coow le nu nanaa.

⁴⁶ Salomo a moofa sax no uum-maamaad le.

⁴⁷ Dag we no maad oxe a ngara, a ndokle’iid o maad Dawid, a layaa yee: ‹Yaasam Roog a fi boo gon Salomo a moƴ o joot le wo, a ci maat um o ndam onqaa hupna onqe wo!› Maaga, o maad Dawid a gunga no njong um,

⁴⁸ a lay ee: ‹O Yaal oxe Roog fee Isra’el a hela o simatel, ten fee ci’axama oxaa moofna no uum-maamaad le mi boo um ga’in.› »

⁴⁹ We Adoñaa a xur’ina fop a ndiida boo a sendaa, a ndalfoox o inoox, oxuu refna a xot a ƭat um.

⁵⁰ Adoñaa a saɗar’a a Salomo lool boo a tax ta ret, a saaƭoox na xa can axaa no sadaxand olaa.

⁵¹ Salomo a yegne yee: «Adoñaa a saɗaraang tigi boo a saaƭook na xa can axaa no sadaxand olaa, a lay ee: ‹Bo um inooxaa mene, o and ee o maad Salomo kaa daaɓoox ee warkiraam.› »

⁵² Salomo a laya yee: «Boo ta refna o kiin o teyu, o biil o leng samitkee no xoox um, ndaa koy, boo sik a ga’eena no ten, xan a warel.»

⁵³ O maad Salomo a lula wiin da nqottikin no sadaxand olaa. A gara, a gung mbaambir o maad oxe, soo Salomo a layin ee: «Reti xaad no mbind of!»