1 Korint 8 - NQAARIIT NE ROOG

Ñaamel kaa ƥoxoteena fangool

¹ Nu laamta itam kaa jofna no ke sadaxeena pangool ke. Ndigil oo, in fop, «oxuu refna na in a jega o and», ne ta layeel, ndaa o and oleene, no ga’atinax rek a ɓekaa a in. O mbeq kañ, na jokaa o kiin.

² Oxuu foogna yee a jega kaa ta andna, andiran a qool qac.

³ Kaa koy, oxuu fexna a Roog, Roog a andaan.

⁴ Um nomtooxiid koy no ke sadaxeena pangool: I anda yee fangool tigi jegee, kaa foogeena rek oo, Roog fa leng kut jegu.

⁵ A jega koy kaa fi’eena roog, ta ref na asamaan mbaat a lanq – ten taxu ta jeg mayu kaa wiin we a mbi’aa nen yaal den fo roog den.

⁶ Kaa koy, nuu ta saxitna yoo, na in Roog fa leng soom jegu, ta ref Faap fee sakna fop, a jeg a in. Na in o Yaal o leng kut jegu itam, ta ref o Yaal oxe Yeesu Kiristaa. Ke sakeena fop koy, no ten a reefne, i saktel no ten itam.

⁷ O and oleene, fop njegiran. Kaa jeg waa o mer den a maadna o jengaa na xa ƥay pangool, da ñaamaa njuurax, a ƭeetan nen sadax tigi, too keene refa a panq a maak, yaam yiif den a neew doole boo waagee o ga a qool qac ne tige a saxitna.

⁸ Refee yee ƥekel no fud waagu o matand a in me Roog: O ñaamin ɓaatee a in dara, o ñakin o ñaam waajee a in tig itam.

⁹ Kaa koy, fat nu mbootoox, yaam nu mbaree o lay ee nuun njegu a qoox nuun no Yaal oxe boo nu ndefat a panq na caf no we neewna doole no ngim onqe.

¹⁰ Yaam a soƥangaa yee o kimu xaa foogna yee oxaa jegna o and refo, ret reer fo waa na ñaamaa sadax, o kimu xe neewna o ngim, too yiif um fodee neene no Yaal oxe, xan a bug o reerataa fo we na ñaamaa sadax. Ñaamitkiran nen a tegeƴ, ne ga’tanoona, ndaa nen sadax,

¹¹ too yaaga xan yiif of deyu a saŋik o pog o neewu doole xaa Kiristaa a xonanna took a kurwaa.

¹² A jegtangaa neene, xan o tooñ a Kiristaa itam, yaam ne tooñoona o pog of oxeene. Yiif um deyeer le waag’ee o jekit ke le wo a jektaa.

¹³ Keene o mat taxu boo andoona yee kaa ñaamel ke reeruuma a nar o ndef a panq na caf no kimu lakas, ñaamkiim no roon olaaga muk, yaam ndik ta fes o ngim onqe a cinj.