1 Korint 6 - NQAARIIT NE ROOG

Layoor a ndeer kerceen ke

¹ Nuun we ngimna, o kiin na nuun a jegangaa kaa ta bugeena o layoor, nam a saɗu o ƴakandoor tedu we, soo a xeloortikel a ndeer no we andeerna o cofel Roog?

² Kaa nu andee yee tedu weene na ngate’kaa adna fee! Tig podu nen hate adna a doonange no ɓay nuun, nam o hate tig pooreer a naru o ɓoowit a nuun? Ndax hate kaa jomb a nuun?

³ Kaa nu andee yee in na ngate’kaa malaaka ke? A soƥangaa koy ee hate malaaka ke na xa ƥay in a doone, nam o hate tig adna a waagu o bug o ɓoowit a in?

⁴ Xar taxu o kiin a xetange tig, a xeloortikel a ndeer no wiin waa mbokatax ne no gimu we a andeerna, ñaal o yeng a jalan?

⁵ Andaa yee kaaga gaci yoo na nuun de! Yaam kaa nand nen jegee o leng na nuun oxaa jegna yiif, a waag o hate gimu ɗik waa ndaawirna.

⁶ Ten taxu yoo fog ɗik a nqetaa no nqel no gimeer.

⁷ Qasir ke a ndeer nuun sax eetu o ndef sik nuun. Wondoox fo ke tooñee’oona mbaat o jaɓ o jeg of a guuɗel moƴu o xetik fo pog of o kimu no nqeloor.

⁸ Kaa koy, ga’aano! Nuun sax ndefu we na mbi’aa cageer, nguuɗaa gimu we fog nuun.

⁹ Xeƈa kaa a yiif nuun ngalagee yee oxe naageerna o fi’aa ke Roog a bugna lamkee Maat ne Roog. Koo qoyni, ba o leng a nax a xoox um, yaam a cuut ake, we na njuuraa, we na seeqaa, goor we mbaat rew we na mbesanraa a ndeer den,

¹⁰ guuɗ we, we mbuge’na, yeeyer say we, we na mbenaa lakas we fo cublang ke, kaam ee o leng na den lamkee Maat ne Roog.

¹¹ A jega leng-leng na nuun waa mbi’oogna keene yaaga, ndaa koy nu ƥogde boo nqool, kesanel a Roog, njofandel no gon no Yaal in Yeesu Kiristaa na pexey Yiif le Roog.

No cer nuun, ƥoxotyo a Roog o ndam

¹² Waagaam o fi kuu felaxama, kaa koy, fop faaxee na mi. Waagaam o fi kuu felaxama, ndaa jegee no keene fop kaa um farakooxkaa boo refat o paɗ um.

¹³ Ngaaf taxu o fud, o fud a refan ngaaf, ndaa ƭik ke fop, xan Roog a muuk a den. Njer koy sakanaand ceeq, ndaa kaa refan o Yaal oxe, o Yaal oxe a refanin.

¹⁴ Roog kaa xontooxnoor o Yaal oxe, too xan a xontooxnoor a in itam, na pexey katil um.

¹⁵ Kaa nu andee yee cer nuun, a seek no cer ke Kiristaa a ndefu? Ndax xan o kiin a jang a seek no cer ke Kiristaa, a fi’in boo ta refat a seek no cer a caga? Koo boo muk!

¹⁶ Fat nu yeg fo and ee oxuu hiɓoorna fo a caga, njer leng kut a refataa fo ten, ne a Pind a Tedu ke a laytuuna yee: «Ɗik we xan a ndefat njer leng kut.»

¹⁷ Kaa koy, oxuu hiɓoorna fo o Yaal oxe, yiif leng kut a refataa fo ten.

¹⁸ Ƈufyo ceeq! A jega pakaad lakas kaa ndefeerna no cer, ndaa oxuu rokna no ceeq, cer um sax sax a tooñu.

¹⁹ Kaa nu andee yee cer nuun ndefu ngenand Yiif Tedu le, Roog a cooxna a nuun? Feek oxe na nuun koy, nu njegatee a qoox nuun.

²⁰ Yaam njigand maak nu mbatte. Yaaga koy, fat Roog a waag o jegit o ndam no cer nuun.