1 Korint 3 - NQAARIIT NE ROOG

Jaajal we Roog

¹ Fog es, nu anda yee gariim a gar rek, layaa fa nuun nen kaa nu ndef wiin deyu sik no Yiif le Roog, ndaa nen wiin adna. Kaam jeetaay fa nuun, yelefand a ƭelem es, yaam nu maad o ndefaa xa caaƈ na Kiristaa.

² Keene o mat taxu, diƈaniim a nuun ñaamel ke moƴna o nqiis na fa lay fee Roog, ndax coox a nuun ke moƴna o yelef teen, ne o nqeq a cooxteel fo ɗeen. O nanangaa cooxiim a nuun ñaamel qiisu ke, kaam and ee nu ngatil’iran, too me nu ndefna sax nu ngatliran,

³ yaam kaa nu maad o mbesooraa nen wiin adna. Ndax ciisir fo nqasir ndefu a ndeer nuun? Bo ndiik xalaat adna na ɗoxaa a nuun,

⁴ yaam xalaat adna jolkee xasreel, yaam oxene yee mi, fa Pool farum, oxaana yee mi o mat, Apolos fartum.

⁵ Xar Apolos mbaat Pool a ndefu? Faɗ lule soom i ndefu, waa mbi’oogna, oxuu refna ke o Yaal oxe a coox’uuna, ndax nu ngimit na in.

⁶ Kaam jimb, Apolos a soor, Roog a maakin ndaxar ne.

⁷ Oxe jimbna fo xe soorna koy ndefee dara. Roog fee maakinna jegu fak le.

⁸ Oxe jimbna fo xe soorna mbodu, too oxuu refna ndabid calel um a daawkaa.

⁹ In, waa na njalaa fa Roog i ndefu, nu ndef a ƭing um. Kaam ee nuun ndefu itam tabax ñoow ne ten.

¹⁰ Mi o mat, kaa Roog a yirmaam, um doon fer le nen o taatabax tigi. Ndiiki koy, o lakas a gara, a max ke yoqna. Oxe na maxaa ke yoqna koy, a wara o wootoox, a haan no ne ta maxtaa.

¹¹ Yaam fer leng kut jegu, ta ref Yeesu Kiristaa, too o leng sipatinkee fer lakas.

¹² A jega waa na maxtaa wurus mbaat xaaliis mbaat a ƥil a cafeñu, wene a teex mbaat fo gooñ mbaat daaƭ took fer leene.

¹³ Fat nu yeg fo and koy ee xan ke o kiin oo kiin a maxitna a feeñlel no ñaal naa na hate faa. A koom xan a jeg fiɗel, too fiɗel laaga na siɗkaa a pi no kiin oo kiin.

¹⁴ Oxuu andoona yee ke ta maxitna saƭku yoo, fiɗel le waagkee teen dara, too oxaaga xan a rabdel calel um.

¹⁵ Oxuu andoona koy ee kaa maxit saƭkeer, xan fop a sooƴ, o kiin oxaaga a ñak ndabid um. Xan a muc koy, ndaa nen oxaa xaañna fiɗel.

¹⁶ Kaa nu andee yee nuun ndefu Mbind Roog ne, Yiif um a gen na nuun?

¹⁷ Oxuu gefna Mbind Roog ne, xan Roog a gefin, yaam Mbind um tedu yoo. Kaam ee nuun ndefu Mbind Roog ne.

¹⁸ Ba o leng a nax a xoox um. Oxuu liiƥoorna fo o jeg-yiif ole na adna feeke boo a bug o fakoox, fat a yer yiif um, a jaɓ o ref o ñaku xoox, ndax ta jeg yiif mbaambir Roog.

¹⁹ Yaam o jeg-yiif ole na adna feeke, o ñak-xoox Roog a fi’un. Ten taxu ta layel na Pind a Tedu ke yee: «Roog kaa maaftaa jegu yiif we o ƴiƴ den.»

²⁰ A dakooxe o bind ee: «O Yaal oxe a anda xalaat no we njegna a yiif, too a anda yee tig cegee xoox oo.»

²¹ Ba nu mbakoortat o kiin, yaam fop nuun a refanu,

²² ta ref Pool, Apolos fa Kefaas, adna fee, o ñoow ole, fa nqon fee, ke ndiiki fo ke na garaa. Keene fop, nuun njegun,

²³ ndaa Kiristaa jegu a nuun, Roog a jeg a Kiristaa.