1 Korint 16 - NQAARIIT NE ROOG

Sadax fee no gimu we

¹ No ke jofna koy no ke na fokataneel tedu we kam Yeerusaleem, kaam bug nu mbi’tan ne laytanuuma pokatax ke no gimu waa no jegel olaa Galati.

² Na bes diiboor fuu refna, fat o kiin oo kiin na nuun a geek podu naa doole um a daawna. Nu mbi’tangaa neene, ta moƴ o faax, yaam waaj yaaga moƴu nu cung boo um gar, soo o ndimle nqe a sog o ƴufaneel.

³ Boo garuuma koy, soƥ fop a konjomel, xam bind o leetar, yoonandtin o ndimle nqe nuun, we nu njilkaa a ƥis a den Yeerusaleem.

⁴ A soƥangaa yee deyaam o ret, xam yoonandoor fa den boo maaga.

Pool a fexeya a ñaaƈ

⁵ Boo ƴutuuma a ñaaƈ es no jegel ole Makedoni, xam ɗeetiid a nuun, yaam xam xaañ a Makedoni.

⁶ Kaa koy, boo garuuma, bugaam o moof fa nuun. Xeƈa sax um ƴiidkaa fa nuun, boo taaga nu ndimle’aam boo um waag o ret muu waruuma o ret.

⁷ Ke moƴanaxama daal um moof fa nuun, o Yaal oxe a jaɓangaa. Bugiim o gar a gar rek, suuraa.

⁸ Ndeer mene koy boo yaa Pantekot a fadiidkaa, mene Efees um refkaa,

⁹ yaam kaa jeg meeke calel maak kaa njegna o njiriiñ lool, ke fañ we a mayna may fop oo.

¹⁰ Timote a fadiidangaa me nuun koy, ngela ndamteenoo ƥay ƭik boo jambatkee dara, yaam nen a mi a fi’aa fi no calel ke no Yaal oxe.

¹¹ Yaaga koy, ba o leng a xeefin. Fat nu mbeltiidin na jam fa jam boo na caf es, yaam naa ta retu kaam tayaa ta gat, mi fo fog lakas we.

¹² Apolos fee o pog in koy, kaam bam’an rek, ndax ta ɗeetiid a nuun, ten fo fog lakas we, ndaa ke moƴan’uuna ta cung boo taa. Boo ta jegna o daaw rek, xan a gar.

Pool oxe simnaa gimu we

¹³ Ndiiki koy, yetooxyo, saƭik no ngim onqe, ndef goor, too saƭakinooxaa.

¹⁴ Kuu nu mbi’aa, fat a ref fo o mbeq.

¹⁵ Fog es, a jega lakas kaa um xeɗaa a nuun: Nu anda yee Akayi boo Akayi a xet, mbind Estefanaas eetu o ngim, too nu nga’a ne da mboŋkitna o ndimle’aa tedu we Roog.

¹⁶ Ngela nananyo wiin nandu neene fo fop we andoona yee kaa ndaaran calel leng kut ke.

¹⁷ Sawaraam lool yaam ne Estefanaas fa Fortinatis fa Akaykis a ngarna meen. Yaaloortaam a den a nuun,

¹⁸ boo da ndalin yiif es ne da ndalnitna ake nuun. Kaam ee ngela ndamityo wiin nandu neene ƥay ƭik.

¹⁹ Gimu we ndefna Asi fop mbokatooru, a simnaa a nuun. Akilaas fa Pirisil fo gimu we na mbokatooraa no mbind den owe simnaa a nuun a paax itam no Yaal oxe.

²⁰ Fog gimu we fop na simnaa a nuun. Naangyo o simniraa a ndeer nuun, mboonraa fo o mbeq!

²¹ Mi Pool itam, mexe simnaa a nuun, bindtan o ɓay es.

²² Oxuu fexeerna o Yaal oxe, yaasam ta halakel. Maranaa ta! (O Yaal in, koo gari!)

²³ Yaasam yirmande no Yaal oxe Yeesu a ref fa nuun!

²⁴ Fat nu and ee o mbeq es oxe took nuun na Yeesu Kiristaa.