1 Korint 14 - NQAARIIT NE ROOG

Ke Yiif le Roog a ci’taa

¹ Keene koy taxu nu mbar o ndiirooxaa o mbeq. Kaa koy, mbaaƭyo itam lakas ke Yiif le Roog a ci’taa. Ci’it ne nu mbarna o moƴ o mbug teen refu ci’it o njo’tanaa a Roog.

² Oxe Yiif le a ci’na ta layaa na lak-yiif, oxaaga layee fo wiin we, Roog a laytaa, yaam we ta refitna nanee lak fee ta layaa. Yiif le Roog rokun, ta layaa kunpa.

³ Oxe andoona koy ee kaa Yiif le a ci’in, ta waag o jo’tan a Roog, oxaaga, wiin we a daawnaa fa lay Roog, a umbaa o ngim den, a ɓaataa a den njambaar no ngim onqe, a yaalaa a den.

⁴ Oxe na layaa lak-yiif, xoox um a jokaa, oxe na jo’tanaa a Roog o mat, a jokaa mbokatax ne no gimu we.

⁵ Um waag’angaan, nuun fop, Yiif le ci a nuun nu layaa lak-yiif, ndaa ke moƴuuma o bugan a nuun refu nu njo’tanaa a Roog. Yaam oxe na jo’tanaa a Roog hupu oxe na layaa lak-yiif, a refangeerna boog oxe na layaa lak-yiif kaa Yiif le ci’in, ta waag o lapatoox ke ta layna, ndax gimu we a ƥaatoorin.

⁶ Fog es, o njiriiñ onqum jegkoogum na nuun, yaa gar’uuma gar rek, layaa fa nuun lak faa nu naneerna, too daawniim a nuun na lak nuun mbeeñil mbaat o and mbaat um jo’tanaa a Roog mbaat um jangnaa?

⁷ Ƭeetteeno no ke andoona yee jegee o ñis. A liit a suxangaa mbaat o nqilimb a yomb, ndax xan o kiin a waag o and ke na liiteel mbaat ke na xilimbeel?

⁸ A soƥangaa yee famb xire laa ŋaayin ne a fudooxna yoo, an na nankaa tig boo a inooxanaa xire?

⁹ Neene itam, boo nu layaa lak faa wiin we a naneerna, an na andkaa ke nu layaa? O leng!

¹⁰ Nuu lak ke a mayitna na adna yoo, lak fa leng teen refaƭaree lak.

¹¹ O kiin a naagangaa o layaa, too naniim ke ta layaa, o kenar um refkaa no ten, ta ref o kenar na mi, yaam i nanree.

¹² Yaaga koy, feek ke Yiif le Roog a ci’taa nu ngindaa, mbaaƭyo ke na jokaa mbokatax ne no gimu we fop.

¹³ Oxuu na layaa lak-yiif, fat a xeɗ a Roog, ndax ta ci’in ta waag o lapatoox ke ta layna.

¹⁴ Um naagangaa o xeɗaa na lak-yiif, yiif es oxe na qeƭ, ndaa o and es rimee dara. Refee yee ten na laynooraxam.

¹⁵ Yaaga koy, xar na fi’keel? Xeɗaa fo yiif, xeɗtaa o and, gimaa fo yiif, gimtaa o and.

¹⁶ Yaam a reftangee neene, too o xeɗaa fo yiif soom, nam o kiin sang um sang um oxe a waagu o doonit ee: «Amiini!» too andee ke xeɗoona, a refangaa sax ee kaa o gidmoogu a Roog?

¹⁷ Gidmaa tigi a Roog, ndaa dara teen jokee oxe dendtoona.

¹⁸ Kaam gidmaa o Yaal oxe yaam ne moƴuuma o layaa a nuun lak-yiif, nuun fop.

¹⁹ Kaa koy, no mbokatax ne no gimu we, jangnit a ƭelem a ƥetak na lak faa wiin we a nanna moƴanaxam o layaa a ƭelem a pagkatar na lak-yiif.

²⁰ Fog es, ngela ba nu saq yiif no ndeɓandoong. No paaxeer koy, njaɓyo o ndef xa qeq, ndaa fat nu ndef maak no Yiif le Roog,

²¹ yaam a binde yee: «Wiin lak fa njan fo xa ton na xa kataakoon um layitkaa fa xeet fene, ndaa taxkee da nan-gilooxaam.»

²² Lak keene ndefee o anddiloor no we ngimna boo a ƈut, ndaa kaa ndef o anddiloor no we ngimeerna. Jo’tanaa a Roog koy, refu o anddiloor no we ngimna, ndaa refiran no we ngimeerna.

²³ A soƥangaa yee kaa gimu we fop a mbokatoor, oxuu refna teen a layaa lak-yiif, boo gimeer a ngarna, a soƥ a den teen, ndax njambkee a den ɗof?

²⁴ Kaa koy, boo fop a njo’tanaa a Roog, o kimeer a fadiid, a soƥ a den teen, xan a ga’ood ne ta nandna, ta fi nen hate no ten,

²⁵ ke reeƭna no xeeñ um fop a huytoox, too oxaaga xan a gung, a faɗoox a Roog, a yegnitik ee «Roog oxey a ndeer nuun tigi».

Fop a hela o ñaaƴit ne warna kam mbokatax ne no gimu we

²⁶ Yaaga koy, fog es, xar waru? Boo nu mbokatoorna, fat nu ƭofit kuu fi’eena a jok o ñoow no we mbokatoorna, oxuu jegna a kim a tedu mbaat kaa ta janginna mbaat mbeeñil naa ta bugeena o xaajir mbaat lak-yiif mbaat a lapatax, fat a inoox, a geenoox, ndax fop a jokteel o ñoow no gimu we.

²⁷ Ndax a jega waa na layaa na lak-yiif? Fat a lay, ndaa waree o hup daduk, too fat a jeg oxaa lapatooxna.

²⁸ O laalapatax a jegangee, fat we na layaa lak-yiif a naang tek, oxuu jegna kaa ta layna, a layin a ndeer um fa Roog.

²⁹ No we na njo’tanaa a Roog itam, fat ɗik mbaat daduk a lay, lakas we a ƥaal ke layeena.

³⁰ A soƥangaa yee o leng no we moofna, Roog a feeñlaan tig, fat a inoox, o palakaand oxe layoogna a nan-gilooxataa.

³¹ We na njo’tanaa a Roog fop a mbaaga o layaa o leng o leng, ndax fop a njang, a ƥaatoox doole no Yaal oxe.

³² We na njo’tanaa a Roog ngame’u ci’it ne Roog a daawinna a den.

³³ Roog samaree, ndaa jam fa ƥor a refu. Ne ta fi’teel kam pokatax ke no gimu we fop,

³⁴ baa o tew a yaƥat yaa wiin we a mbokatoorna, yaam ci’aand o ten. Kaa war o nanan, ne ta layteena no kebil ke itam.

³⁵ A jegangaa kaa xooleeruuna, too ta bugin o dapatin, fat a cung boo a xaad, a laamtin o kor um, yaam jofee o tew a layaa no mbokatax ne no gimu we.

³⁶ Ndax me nuun fa lay fee Roog a inooru? Ndi nuun soom ndaawun?

³⁷ O kiin a foogangaa yee oxaa na jo’tanaa a Roog oo mbaat ta foog ee kaa daaw ci’it lakas no Yiif le, fat a ɓek no yiif um ee keene binduuma kebil no Yaal oxe yoo.

³⁸ A jaɓangiran koy, baa a ƭat no leng a yong no ten.

³⁹ Fog es, yaaga koy mbaaƭyo ci’it ne refna o jo’tanaa a Roog, too oxuu na layaa na lak-yiif, ba nu mbañtin o ten.

⁴⁰ Naangyo o mbi’taa fop wargal fo o jof.