1 Korint 11 - NQAARIIT NE ROOG

¹ Ndeefyo o jaf es, ne um reeftaa o jaf Kiristaa.

A muxlax

² A jega koy kaa gidmituuma a nuun boo paam Roog, ta ref ee nu mosiraam o mbeec na dara, ndeefaa ke jangnuuma a nuun a paax.

³ Kaa koy, a jega kaa buguuma nu and: O koor kelfa’u o tew, Kiristaa a kelfa o koor, Roog a kelfa a Kiristaa.

⁴ O koor oxuu na xeɗaa mbaat ta jo’tanaa a Roog kam mbokatax ne no gimu we, soo a rokoox o maxanda, oxeene, gaci rek a doonaa oxe kelfa’uuna.

⁵ Kaa koy, o tew oxuu na xeɗaa mbaat ta jo’tanaa a Roog, too muxlooxee, oxeene, gaci rek a doonaa oxe kelfa’uuna itam. O tew um kaa nand nen o tew o tuusooxu ɓula.

⁶ O tew o muxlooxkeer kaa war o ruusoox ɓula. Foy wiil mbaat ruusoox ɓula koy gaci yoo no tew, too a refangaa gaci no ten, muxloox moƴu.

⁷ O koor waree o muxloox, yaam ten refu nitaal fo o ndam Roog, o tew o mat a ref o ndam no koor.

⁸ Keeke ndigil kak oo: Refee yee o koor sakte no tew, o tew o mat sakte no koor.

⁹ Roog sakee o koor yaam o tew itam, o tew kañ a saku yaam o koor.

¹⁰ Ten taxu o tew a war o muxloox, a saq o anddiloor no kelfa um mbaambir malaaka ke, ta ref a muxul.

¹¹ Kaa koy mbaambir no Yaal oxe, ne o koor a jegitna o njiriiñ no tew, neene o mat o tew a jegtun no koor.

¹² Yaam ne o tew a sakteena no koor, neene o koor a rimteel no tew, too keene fop, na Roog a inooru.

¹³ Ƥaalyo keeke boo nga’an a qoox nuun: Ndax o tew a wara o xeɗaa a Roog kam mbokatax ne no gimu we, too muxlooxee?

¹⁴ Nu ƭeetangaa ne tige a garitna, xan nu nga ee wiil jiig gaci yoo no koor,

¹⁵ ndaa ne ta refitna gaci no koor, a reftu kañoor no tew, yaam kaa Roog a cooxin wiil jiig, ta ref a muxul.

¹⁶ A soƥangaa koy ee kaa jeg oxaa jaɓeerna keene, fat nu yeg fo and ee na in fo no pokatax ke no gimu we Roog fop, a mbanuu o tew a xeɗaa kaa muxlooxaa.

A cu’ax ale no Yaal oxe

¹⁷ A maƭax aleeke feliraam dara, yaam kaam ga ee mbokatoor nuun no paaxeer soom a ɓekaa a nuun:

¹⁸ Nanaam ee a mbanuu nu mbokatoorna, a sayax a doonoox teen, nu mbi a qaaj a qaaj, too yaacanum o gim.

¹⁹ A qaaj akeene mbaagee ñak a ndeer nuun, ndax we na nqoxkaa ƭeetlax neene a andel a qool qac.

²⁰ Refee yee a cu’ax ale no Yaal oxe na fokataa a nuun,

²¹ yaam a mbanuu nu layna yee ten nu nqetanu, mbug o mbogandoor itam ñaamel nuun, oxuu refna na nuun kaa sayooxaa fo o rox um boo fop ñaamkee, ndax weeke a nqeexel, lakas we a ñaam, a yer boo a mbay.

²² A soƥangaa yee o fud o maak fo way rek na inaa a nuun, nu mbaagee o nday no pind nuun? Ndi boog kaa nu nqeef mbokatax ne no gimu we Roog boo mbi’aa kaa taxna ta ref a siind gaci, ndoonaa gaci took we njegeerna? Xar nu mbugu um lay a nuun? A tagas nu cungaa na mi? Koo boo muk um tagas a nuun no keene!

²³ Ke daawtuuma no Yaal oxe, jangnaanum a nuun, ta ref ee: O Yaal oxe Yeesu, no yeng olaa ta ɓoxotkeel kaa jang’u mbuuru,

²⁴ a gidim a Roog, a xustin, soo a lay ee: «Kene refu cer es ke cooxteena yaam nuun. Mbetandooraamoo keene.»

²⁵ Yaa da nju’ooxna boo a ƈut, a janga o kaas biiñ itam, soo a lay ee: «O kaas biiñ oleeke refu ngiɓoor nqas ne sinjeena took fo’oy le mi. A mbanuu nu yeruuna, fat nu mbetandooraxam o ten.

²⁶ A mbanuu nu ñaamaa mbuuru ne, yeraa no kaas ole, kaa nu yegnitaa fa nqon fee no Yaal oxe boo no ñaal naa ta nomtooxiidkaa.»

²⁷ Ten taxu oxuu jangitna ne wareerna o kaas oleene fo mbuuru neene, a tooña cer ke fo fo’oy le no Yaal oxe.

²⁸ Yaaga koy, fat oxuu refna a ɗeetaqin xeeñ um, soo a sog o ñaamaa mbuuru ne, a yeraa no kaas ole.

²⁹ Oxuu andoona yee kaa ñaamaa no mbuuru ne, a yeraa no kaas ole, a fañ o ɗeet ne ta hiɓooritna fo cer ke no Yaal oxe, oxeene kiin kaa qicaa hate fa ƭomu fee Roog took xoox um.

³⁰ Ten taxu a cir fo nqiiboon a may a ndeer nuun boo mayu a nqonaa sax.

³¹ I ngorooxoogangaa a qoox in, Roog hate’koogee a in.

³² Kaa koy, o Yaal oxe kaa hate’aa a in, a yaraa a in, ndax i saŋkooxandoorkee fo wiin adna we.

³³ Ten taxu, fog es, boo nu mbugna o mbogandoor ñaamel, naangyo o cungraa, soo sogkaa o ndeer, ñaam.

³⁴ Oxuu xeexeena, fat a ñaamit no mbind den soo a garaa, ndax nu qickee hate fee Roog took nuun. Lakas ke koy, xam laytin yaa fadiiduuma.