1 Caloori ke 12 - NQAARIIT NE ROOG

Yoon eetaand we Dawid kam Siklag

¹ Na jamaane faa Dawid a laqookna Siklag ndax ta daɗ a Sawul fee o ƥiy Kiis, a jeg’a goor waa mbokatooriidna fo ten, a ndef xir say too a njagandoox ndax da ñoxoranin.

² A ƥonoox’a a qali fo xa suusaand, too a mbaag’a o suusaand ɗak mbaat da nqaƴ a kas fo a canoon mbaat a ñamaak Weeke ndefu we inoor’ina na carind ale Bensame, Sawul fa xoox um a fogna:

³ Ahiyeseer fee o aa-adax oxe fa Yowaas we xa ƥiy Sema’a ngen’ina Gibe’a, Yesi’el fa Pelet we xa ƥiy Asmawet, Beraka fa Yehu fee gen’ina Anatot,

⁴ Yismaya fee gen’ina Gibe’on too a ref o leng no aa-adax we na yaj ale no xir say qarɓeen tadik we,

⁵ Yeremi, Yahasi’el, Yohanan fa Yosabad we ngen’ina Gedera,

⁶ Elusay, Yerimot, Be’aliya, Semariya fa Sefatiya we ngen’ina Haruf,

⁷ Elkana, Isiya, Asarel, Yo’eseer fa Yasobe’am we xa taan Koora,

⁸ fo itam Yo’ela fa Sebadiya we xa ƥiy Yeroham ngen’ina Gedoor.

⁹ Goor lakas a inoor’a na carind ale Gaad a mbokatooriid fa Dawid no loqooxand naa ten kam a koƥ-a-ƥor alaa. Kaa ndeeƭu xir say waa mbaagna a ñoq too a mbaag o njiriiñoor pegoor fo a salma. Kaa njambaarit’u nen cogoy, a ñofit nen pat ke took xa coong axe.

¹⁰ Xarɓaxay fo leng a ndeeƭu, da ndef: Eseer fee reeƭna o aa-adax oxe, Abjaas a ref o ƭikandeer oxe, Eliyab a ref o tadkandeer oxe,

¹¹ Mismana a ref o nahkandeer oxe, Yeremi a ref o ƥetkandeer oxe,

¹² Atay a ref o ɓetuu fa lengandeer oxe, Eli’el a ref o ɓetuu ƭikandeer oxe,

¹³ Yohanan a ref o ɓetuu tadkandeer oxe, Elsabad a ref o ɓetuu nahkandeer oxe,

¹⁴ Yeremi a ref o xarɓaxayandeer oxe, Makbanay a ref o xarɓaxay fo lengandeer oxe.

¹⁵ Gaagaad weene aa-adax no xiixire a ndeeƭu. O aa-adax oxe moƴna o neew na den a adooxan’a xiixire teemeed soo oxe moƴna o magin a adooxan xiixire juni.

¹⁶ Den nqaañ’u o xuluɓ olaa Yordaan no nqool o eetaand onqe, a soƥ ta ref na waame, a ndax we ngen’ina na yulanq ake no batand fo na ke no mudand.

¹⁷ A yaj no Beebensame we fo Yuuyudaa we a soƥka a Dawid no laqooxand naa ten.

¹⁸ Dawid a faambra fa den, a lay a den ee: «A soƥangaa yee kaa nu soƥiidaam yaam o mbug jam fo ndax nu ndimle’aam, xam dalin a nuun fo xeeñ xoolu. Kaa koy, a soƥangaa yee nu ngodaam soo ƥoxotaam na xa ƥay no fañ es taxun, ke fi’eeruuma paaxeer fop oo, yaasam Roog fee no daan in a hate a in soo a xaw a nuun.»

¹⁹ Maaga, Yiif le Roog a fudooxa took Amasay o aa-adax oxe na yaj ale no qarɓeen tadik we soo ta lay ee: «Fa wo i yoonu, fa wo o mat i mbaru, wo Dawid fee o ƥiy Isay! Yaasam jam fee a ref fa wo, a ref fo we na ndimle’ang, yaam o Yaal oxe a ƴufgaang.» Dawid a dalna a den soo a doxin a den da adooxanaa a yaj ale ten.

²⁰ Goor a inoor’a na carind ale Manaase, a mbokatooriid fa Dawid ye ta fokatoorikna fo Fiifilista waa ndax da ñoxoriid fa Sawul. Kaa koy, Dawid fo goor we ten yoon’ee fo Fiifilista we yaam gelwaar we den kaa nomit’u a den cinj ye da nga’irna. Kaa layroogu yee: «A wootooxangee rek Dawid a farik fo yaal mbind um o eetand soo a ɓoxot a in na xa ƥay um.»

²¹ Ye Dawid a nomtooxaa Siklag, yaaga goor we na carind ale Manaase a mbadiidu me ten. A ndeeƭa: Adnax, Yosabad, Yeja’el, Mika’el, Yosabad, Elihu fa Siletay we aa-adax no xiixire juni na carind ale Manaase.

²² Den fop xir say a ndeeƭu waa ndimle’iidna a yaj ale Dawid. A ndefata aa-adax no xiixire we ten.

²³ Ñaal oo ñaal goor a ƥaatooxiidooga na yaj ale Dawid ndax da ndamtin boo a tax a yaj ale a fodat naa o leng a andeerna.

Ne yoon we Dawid inoorna Hebron a mbodna

²⁴ Weeke ndefu goor fodne mbaagna o ndet na xire too a mbokatooriid fa Dawid Hebron ndax da cooxin maat ne Sawul ne o Yaal oxe a heblit’uuna:

²⁵ Na carind ale Yudaa a jeg’a xiixire cuni ɓetuu fa leng fo xiixire teemeed ɓetuu tadik waa ƥonooxna pegoor fo a salma.

²⁶ Na carind ale Simewon a jeg’a xir say cuni ɓetuu ƭik fo xir say teemeed.

²⁷ Na carind ale Lewi a jeg’a goor cuni nahik fo goor teemeed ɓetuu fa leng,

²⁸ fa Yehoyada fee o aa-adax oxe na qaw ale Aaroon, yoon’ina fo goor cuni tadik fo goor teemeed ɓetuu ƭik.

²⁹ A jeg’a itam a Saadok fee reeƭna o fes o qiixire say fo aa-adax qarɓeen ƭik fo aa-adax ɗik no ƥasil um.

³⁰ Na carind ale Bensame refna ref ale Sawul a fogna a jeg’a goor cuni tadik too moƴ-o-jaak ole a maad’u o njalanaa ƥasil ne Sawul.

³¹ Na carind ale Efrayim a jeg’a xiixire cuni qarɓeen ƭik fo xiixire teemeed ɓetuu tadik waa fop a njegna a kon no ƥasil den.

³² Na genwal a carind ale Manaase goor cuni xarɓaxay fo goor cuni ɓetuu tadik a nqoye oxuu refna no gon um, ndax da ndet a ndalin a Dawid nen o maad.

³³ Na carind ale Isakaar a jeg’a aa-adax teemeed ƭik fo we da adooxan’ina, waa mbaagna o njektirand a mban fo nam Ii-isra’el we a mbaru o mbesoor.

³⁴ Na carind ale Sabulon a jeg’a xiixire cuni qarɓeen ƥetik waa mbaagna o ndet na xire, a saq ƥonax qire’ir kuu ndefna, too a yekooraa tigi na xire den.

³⁵ Na carind ale Neftali a jeg’a aa-adax juni fo xiixire cuni qarɓeen tadik fo xiixire cuni ɓetuu ƭik waa ƥonooxna pegoor fo a sakoor.

³⁶ Na carind ale Dan a jeg’a xiixire cuni qarɓeen ƭik fo xiixire cuni ɓetuu tadik fo xiixire teemeed ɓetuu fa leng waa njagandooxanna a ñoq boo a ƈut.

³⁷ Na carind ale Aseer a jeg’a xiixire cuni qarɓeen nahik waa aqatooxna xire tigi den itam too a njagandooxan a ñoq.

³⁸ Na carind ake ndal’ina no batand ne Yordaan ndefna ale Ruben, ale Gaad fa genwal a carind ale Manaase, a jeg’a goor cuni teemeed fo goor cuni qarɓeen ƭik waa ƥonooxna ñoxorir kuu ndefna.

³⁹ Xiixire weene fop njagandooxanna a ñoq a ngara Hebron soo a ndalin a Dawid o maad, a mbi’in fo xeeñ letu, ta maadooxan a Isra’el fop. Ii-isra’el lakas we fop a njaɓ’a ta cooxel maat ne.

⁴⁰ A moofa maaga fa Dawid boo ñaal tadik, a ñaamaa a yeraa no ke fog den a njawan’ina a den.

⁴¹ Kaa hupna keene, wiin we na xa cegel axe mbidna maaga boo sax no le Isakaar fo no le Sabulon fo no le Neftali kaa ƥisiidoogu ñaamel kaa sufeena took xa paam mbaat took keeleemb mbaat took perkele mbaat took qoox: Mbiɗel, xa kaf axaa mbi’teena xa tun, tuunq xa biiñ xa beeru, biiñ fo diwliin. Naak fo paal sax a ƥisiidooge too saax laa fop a ñoowooga kam o ɗaay.