1Saŋ 4 - NQAARIIT NE ROOG

Jaajangin maamaaɓ we

¹ Fog es we fexuuma, baa yiif luu garna gar nu ngimin! Kaa koy, ngorooxyo a yiif ake boo nga, ndax na Roog a inooru ndax nam, yaam kaa duleer maamaaɓ mayu a ndokiid na adna fee.

² Mene i anditkaa Yiif le Roog: Yiif luu jaɓna o weejil a Yeesu Kiristaa fee ceroox’ina, na Roog a inooru.

³ Kaa koy, yiif luu jaɓeerna o weejlit a Yeesu neene, inooree na Roog, too o Mbodandoor-Kiristaa yoo. Nu nan’a yee xan o podandoor oxeene a gar, too oxey kam adna fee ndiiki sax.

⁴ Nuun xa teɓandoong es, na Roog nu mbogu, too nu maafa duleer maamaaɓ weene, yaam oxe refna na nuun hupu oxe refna na adna fee.

⁵ Den koy, na adna fee a mbogu, ten taxu da laytaa nen wiin adna, too wiin adna we kaa nan-gilooxaa a den.

⁶ In o mat, na Roog i mbogu. Oxe andna a Roog, kaa nan-gilooxaa a in. Oxe fogeerna na Roog koy, nan-gilooxkee in. Meene i andtaa Yiif le no ndigil ne fo yiif le na mo’andaa.

Roog o mbeq oo

⁷ Fog es we fexuuma, fat i mbexir, yaam o mbeq, na Roog a inooru. Oxuu jegna o mbeq, Roog rimun, too a anda a Roog.

⁸ Oxe jegeerna o mbeq koy, andee a Roog, yaam Roog o mbeq oo.

⁹ Mene o mbeq onqe Roog a feeñtu na in: A luliida o Ƥiy o leng kut onqe ta jegna kam adna fee, ndax i ñoow na pexey um.

¹⁰ Mene o mbeq onqeene a refu: Refee yee in mbexu a Roog, ndaa Roog o mat fexu a in boo a luliid o Ƥeem, ndax ta ref sadax faa na ñufaa a qaw ale Roog no pakaad ke in.

¹¹ Fog es we fexuuma, Roog a fextangaa a in neene, i mbara o mbexir a ndeer in, in itam.

¹² O leng mosee o ga a Roog. Boo i mbexirna a ndeer in, Roog kaa genaa na in, soo o mbeq um a fadnoor na in.

¹³ Mene i anditkaa yee i ngena no ten, ta gen na in: A ci’a a in Yiif um.

¹⁴ In o mat, i nga’a, too seede’aa a nuun ee: Faap fee a luliida o Ƥeem ta ref o Muumucil adna.

¹⁵ Oxe jaɓna o weejil ee Yeesu o Ƥeenqe Roog oo, Roog a gena no xeene kiin, too ten itam, oxe na Roog.

¹⁶ In o mat, i anda ne Roog a fexitna a in, too i ngimaan. Roog o mbeq oo. Oxe genna no mbeq, na Roog a genu, too Roog itam, no ten a genu.

¹⁷ A soƥangaa yee o mbeq onqe a fadnooxa na in, xan i njeg njambaar na bes fee na hate fee na garaa, yaam o ñoow in na adna feeke kaa nand fo ole Yeesu Kiristaa.

¹⁸ Caƭar refee kam o mbeq, ndaa o mbeq o ñaku sik kaa raxaa caƭar. Muu caƭar a refna, a qaw kaa foogooxeel, too oxe na saɗaraa, o mbeq um a jega sik.

¹⁹ In o mat, kaa i mbexin, yaam ten eetu o fex a in.

²⁰ O kiin a layangaa yee: «Fexaam a Roog», soo a sib o pog um, oxeene o maamaaɓ oo. Oxe waageerna o fex o pog um oxe ta ga’aa, nam a waagu o fexit a Roog fee ta ga’eerna?

²¹ O ten sax cooxu a in kebil nene: Oxuu fexna a Roog, fat a fex o pog um itam.