1Saŋ 2 - NQAARIIT NE ROOG

Kiristaa kaa dimle’aa a in

¹ Xa teɓandoong es, kaam bindaa a nuun keene, ndax nu mbakaadkee. Kaa koy, o kiin a bakaadangaa, i njega o paafarit paam Faap fee, ta ref Yeesu Kiristaa, o cofu xe.

² Ten fa xoox um kaa ref sadax faa na ñufaa a qaw ale Roog yaam pakaad in. Refee koy sax ee yaam pakaad in soom, ndaa yaam pakaad ke na adna fee fop.

³ I ngayangaa kebil ke ten, maaga i anditkaa yee i anda o Yaal oxe.

⁴ Oxuu layna yee: «Andaanum», too gaykee kebil ke ten, oxeene kiin o maamaaɓ oo, too ndigil leng refee no ten.

⁵ Kaa koy, oxuu na gayaa fa lay um, o mbeq onqe Roog a fadnooxa no ten. I ngayangaan, maaga i anditkaa yee in wey no ten.

⁶ Oxe na layaa yee a foga fa Yeesu, a wara o ñaaƴtaa ne ta ñaaƴitna, ten fa xoox um.

Kebil nqas ne

⁷ Fog es we fexuuma, refee yee kebil nqas um bindaa a nuun, ndaa kebil ngiid naa nu njeg’ina, yaa nu eetna o ngim boo ndiik. Kebil ngiid neene refu fa lay fee nu nanna.

⁸ Kaa koy, a refa itam kebil nqas naa um bindaa a nuun, yaam ndigil a reeƭu no ñoowooƭ Yeesu, a ref ndigil itam no ñoowooƭ nuun, yaam o niɓaan ole xe faafaa, soo a qoolaand ndigil ale a meleƈiidaa.

⁹ Oxe na layaa yee: «Mexey kam a qoolaand ale», too fexee o pog um, a maada no niɓaan ole.

¹⁰ Kaa koy, oxe fexna o pog um, kaa gen kam a qoolaand ale, too jegee no ten a panq a leng alaa waagna o tolofnoor o kiin.

¹¹ Kaa koy, oxe fexeerna o pog um, no niɓaan ole a refu. Kaa ñaaƴaa no niɓaan ole itam, too andee me ta jofaa, yaam o niɓaan ole kaa muur a kid um.

¹² Nuun xa teɓandoong axe, mexe bindaa a nuun yaam pakaad nuun a mbaasante no gon Yeesu.

¹³ Nuun paap ke, mexe bindaa a nuun yaam nu anda oxe refna yaa fo mberaandoong naa. Nuun xa pes axe, mexe bindaa a nuun yaam nu maafa o paaxeer oxe.

¹⁴ Nuun xa teɓandoong axe, bindaam a nuun yaam nu anda a Faap fee. Nuun paap ke, bindaam a nuun yaam nu anda oxe refna yaa fo mberaandoong naa. Nuun xa pes axe, bindaam a nuun yaam nu njega doole, fa lay fee Roog na nuun a genu, too nu maafa o paaxeer oxe.

¹⁵ Ba nu mbex adna fee mbaat tig adna. O kiin a fexangaa adna fee, o mbeq onqe na Faap fee refee no ten.

¹⁶ Ke cer ke fo a kid ake a yaawaa, a magnandax yaam kalal adna, tig adna yoo. Keene fop koy, inooree na Faap fee, ndaa na adna fee a inooru.

¹⁷ Adna feene koy fo a yaaw um, kaa mbaafaa, ndaa oxe na fi’aa ke Faap fee a bugna, xan a maadaa boo kili.

O Mbodandoor-Kiristaa

¹⁸ Xa teɓandoong es, waxtu fa mbalakaand fee yoo. Ne nu nanitna yee o Mbodandoor-Kiristaa xe garaa, a jega ndiiki sax fo Mbodandoor-Kiristaa fo mayu. No keene i andtu yee waxtu fa mbalakaand fee a fadiida.

¹⁹ Kam in a sutooru, ndaa mbog’ee na in, yaam a mbog’angaa na in tigi, a yoqkooga fa in. Keene a xewa, ndax ta woor a in ee fop mbogee na in.

²⁰ No ke farna na nuun koy, o Tedu xe a daawna a nuun Yiif um, too nuun fop, nu njega o and.

²¹ Bindaam a nuun, refee yee yaam nu andee ndigil ne, ndaa ne nu anduuna. Nu anda itam ee o maaɓ o leng inoorkee no ndigil ne.

²² An refu o maamaaɓ koy? Ten refu o podandoor oxe na xañaa yee Yeesu refu Kiristaa fee, o Muumucil oxe regteena. O maamaaɓ oxeene refu o podandoor oxe Kiristaa na xañaa a Faap fee fo o Ƥeenqe.

²³ Oxuu xañna o Ƥeenqe, jaɓee a Roog Faap fee itam. Oxuu na weejlaa yee a gima no Ƥeenqe, a jega a Faap fee itam.

²⁴ Yaasam fa lay fee nu nanna no mberaandoong naa a gen na nuun. Boo ke nu nanna no mberaandoong naa a maadna o genaa na nuun, xan nu ngen no Ƥeenqe fo na Faap fee.

²⁵ Ke ta regna a in refu ndegit ne no ñoow o fagkeer ole.

²⁶ Bindaam a nuun keene, yaam we na mo’andaa a nuun.

²⁷ Nuun o mat, Yiif le nu ndaawitna no ten a gena fa nuun, too nu soxla’ee o lakas a jangnaa a nuun. Kaa koy, ne Yiif le ten a jangnitaa a nuun ke refna ndigil fop, too jegee o maaɓ o leng, ngenyo no ten, ne ta jangnituuna a nuun.

²⁸ Ndiiki koy, xa teɓandoong es, ngenyo no ten, ndax nu njeg njambaar, yaa ta feeñkaa, soo ñak o sed, yaa ta garkaa.

²⁹ Yaam ne nu andna yee Roog a jofa, andyo itam ee oxuu na fi’aa ke jofna, o ƥeem a refu.