Rimljanenge 9 - Romski prevod Novog zaveta - Srbija

Devleso angladićhipe vaš e Izrailjese. Mukljuno alope e Devleso

¹ Čaćipe vakerav ano Hristo, na xoxavav, odova mothovela mange mlo mincope e Đesa Sumnalesa,

² kaj si mange but dukhavne thaj o vilo mlo dukhala man bi aćhavdipesoro;

³ Kaj bi mangava kaj me korkoro te ovav ćhinavdo kotar o Hristo baše phrala mle, bijande mle po trupo,

⁴ save si e Izrailjci, kasoro si lindoj o ćhavope thaj glorija thaj xapesovli thaj kanuni thaj devlesoro kandipe thaj dinde lafija,

⁵ kasere si thaj e dada, thaj kotar save si o Hristo po trupo, savo si upral sarijende Devel bahtardino ane bimeripa. Amin.

⁶ Aj na sar te perela o lafi e Devlesoro. Kaj nane sare Izrailjcija save si kotar o Izrailj;

⁷ Ni nane sare e ćhave save si kotar e kućin e Avraamesiri, aj: Ano Isako ka vičinel pe tuke e kućin.

⁸ Odova va, nane odola ćhave e Devlesere so si po trupo ćhave, aj ćhave dinde lafenge saćedime ane kućin.

⁹ Kaj si akava lafi dinde lafengoro: Ane akava vakti ka avav thaj ane Sare ka ovel ćhavo.

¹⁰ A na semo oj, aj vi e Reveka savi khamnili jekhestar, kotar o Isak o dad amaro.

¹¹ Kaj pana o ćhave na sine bijande, ni kerde laćhipa ni džungalipa, te aćhol ađahar sar o Devel po alope ćhinavđa,

¹² na bašo kotora, aj bašo Odova savo vičinela, phenđa pe lake: O pobaro ka kandel e potikorese.

¹³ Sar so si hramome: E Jakove kamlem, a e Isave mrzindem.

¹⁴ So akana, ka, phena? Sar isi bihakajipe ko Devel? Nisar!

¹⁵ Kaj e Mojsijese phenel: Ka maznonav kas maznonav, thaj ka dukhavav ma pe kaste ka dhukavav.

¹⁶ Ađahar, akana, nane ni đi odova savo mangel, ni đi odova savo prastal, aj đi o Devel savo maznonel.

¹⁷ Kaj o Lil vakerela e Faraonese: Odolese vazdinđum tut kaj pe tute te sikavav e zor, mli thaj te buljarelpe pe o anav mlo pe sa e phuv.

¹⁸ Ađahar, akana, kas mangel maznonel, a kas mangel zoralela o šero.

¹⁹ Ka phene mange: Sose teg krisinela? Kaj ko arlisajlo lesere kamipase?

²⁰ A ko san tu, o manušeja, te kere čingara e Devleja? Sar o vastkerutno vakerel e phirnese plese: sose ađahar kerdan man?

²¹ Ja sar o pirjari nane le thagarni upral e ćika, kaj kotar e jekhuni ćik kerel jek vaso bašo sumnipe, a o dujto bašo lađipe?

²² A so ako o Devel, manglindoj te sikavel e bari xoli pli thaj te mothovel e zor pli, ingarel bare pharipnasa e vasija bare xolinake, save si gatime bašo peravipe.

²³ Kaj te sikavela o barvalipe pla glorijako pe vasija e dindipase, save kerda baše glorija,

²⁴ amen saven thaj vikinđa, na semo kotar e Judejcija aj vi kotar e nađangledevlesere.

²⁵ Sar so thaj vakerel ko Osije: Ka vičinav mle seloreja o seloro savo nane mlo, thaj e bikamle kamlipasa;

²⁶ Thaj ka ovel kaj po than kaj lenge sine phendino: Tumen nasijen mlo seloro, odori ka vičinen pe ćhave e Devlesere dživde.

²⁷ A o Isaija del vika bašo Izrailj: Te ulo đendo e ćhavengoro e Izrailjesoro sar pošik e deravesi, o aćhipe ka ikalel pe.

²⁸ Kaj ka agorisarel sigo o anav plo po hakajipe, ka agorisarel o Devljutno sigo o lafi plo pe phuv.

²⁹ Thaj sar so anglalmothovđa o Isaija: Kaj amenge o Devljuto Savaot te na aćhaj e kućin, bi ovaja sar e Sodom thaj miazutne e Gomorose.

³⁰ So akana, ka, phena? Kaj e nađangledevlesere save na rodinde hakajipe resle hakajipe, aj hakajipe kotar o paćape;

³¹ A o Izrailj rodindoj kanuni e hakajipesoro na resla kanuni hakajipesoro.

³² Sose? Odolese so na rodinde kotar o paćape, aj kotar e kotora kanunesere. Kaj khuvdepe ko Bar e peripnasoro,

³³ sar so si hramome: Ake ćhivava ano Siono Bar peripnasoro thaj Bar barengoro peravipe; thaj sakoj savo ane leste paćal na ka lađardol.