Rimljanenge 8 - Romski prevod Novog zaveta - Srbija

Devlikano ćhavolelipe thaj adžikeripe pe glorija

¹ Nisave, akana krisipa nane odolenge save ano Hristo Isuso na dživdinena po trupo aj po Đi.

² Kaj o kanuni e Đeso e dživdipasoro ano Hristo Isuso mukljarda man kotar o kanuni e bezehesoro thaj o meripe.

³ Kaj so e kanunese sinele bišajune, kana sinele ćišljardo trupoja, o Devel bićhalindoj ple Ćhave ane manušikano trupo e bezehesere thaj bašo bezeh, krisinđa o bezeh ano trupo,

⁴ kaj o hakajipe e kanunesoro te pherel pe ana mende save na dživdina po trupo aj po Đi.

⁵ Kaj save si po trupo trupone gndinen, a save si po Đi đesune.

⁶ Kaj si trupuno gndinipe meripe, a đesuno gndinipe dživdipe thaj šalomipe.

⁷ Kaj si trupuno gndinipe naamalipe e Devlese, kaj na peravel pe e Devlesere kanunese, ni pak šaj.

⁸ A save si po trupo našti keren kamipe e Devlese.

⁹ A tumen nasinjen po trupo aj po Đi, kaj o Đi e Devlesoro dživdinel ane tumende. Te pak điko nane le Đi e Hristosoro, ov nane lesoro.

¹⁰ A te si o Hristo ane tumende, teg si o trupo mulo bašo bezeh, a o Đi si dživdipe bašo hakajipe.

¹¹ Te li dživdinel ane tumende o Đi Odolesoro savo dživdinđa e Isuse andar o mule, Odova savo vazdinđa e Hristo andar e mule ka dživdinel vi tumare mule trupora ple Đesa savo dživdinel ane tumende.

¹² Ađahar, akana, phraljalen, nasinjam kamutne e trupose kaj po trupo te dživdina;

¹³ Kaj te dživdinđen po trupo, ka meren; te li Đesa e kotora e truposere muljaren, ka dživdinen.

¹⁴ Kaj saven legarel o Đi e Devlesoro on si ćhave e Devlesere.

¹⁵ Kaj na lijen o đi robipesko, kaj palem te daran; aj lijen o Đi ćhavipesoro, saveja vičinaja: Ava, Dade!

¹⁶ Akava Đi mothovel amare đese kaj sijam ćhave e Devlesere.

¹⁷ A kana sijam ćhave, thaj kustikutne sijam: kustikutne, akana, e Devlesere a pokustikutne e Hristosere; kaj oleja mudarđova kaj oleja thaj te glorisinamen.

¹⁸ Kaj gndinav kaj o mudaripe e akale vakteso nane niso premal e glorija savi amenge ka phućarel pe.

¹⁹ Kaj jagale ađikeripnaja o keripe ađikerel te mothoven pe o ćhave e Devlesere.

²⁰ Kaj o keripe peravdilo e čućipase, na kotar plo kamipe, aj baše odova savo čućardala, ađikeripasa.

²¹ Kaj vi korkoro keripe ka mukljardol kotar o roboipe e peripesoro po muklipe e glorija e ćhavengere Devlese.

²² Kaj džana kaj sa o keripe khatane duhminel thaj dukhavel đi akana.

²³ A na semo oj, aj vi amen save anglune dindipa e Đesere isiamen, thaj amen korkore an amende duhmina ađikerindoj ćhavosaripe, mukljaripe amare trupesoro.

²⁴ Kaj e ađikeripnaja ikalđamen. A ađikeripe savo dikhela pe nane ađikeripe. Kaj kana ko dikhela neso, sar thaj te na ađikerel pe?

²⁵ Te li ađikeraja odova so na dikha, ađikera trajune inđaripasa.

²⁶ A ađahar amenge thaj o Đi ažutinela ane amare bizoralipa: kaj na đana so ka ruđinamen sar so valjani, aj o korkoro o Đi ruđinela pe baš amenge bisikavde duhmipnaja.

²⁷ A Odova so phućarel o vile, đanel so si mangipe e Ođesoro, kaj po kamipe e Devlesoro ruđinela pe baš e sumnalenge.

²⁸ A đana kaj odolenge save ćumiden e Devle sa ažutinel po laćhipe, lenge save si vičime pe arada;

²⁹ Kaj saven anglal penđarda, anglal thaj ćhinavđa, te oven laćharde e Ćhavesere mujese, kaj ov te ovel Anglunobijando maškar e but phralja.

³⁰ A saven anglal ćhinavđa, odolen thaj akharđa; a saven akharđa odolen vi čaćavđa; a saven čaćavđa odolen thaj glorisinđa.

³¹ So ka, akana, phena pe akava? Te si o Devel amencar, ko ka ovel opipe amende?

³² Ov savo ple Ćhave na arakhlja, aj les anglaldinđa baše sa amenge, sar kaj sa oleja thaj sa na ka del?

³³ Ko ka davijinel e alosarde e Devleseren? O Devel si odova savo čaćavel.

³⁴ Ko ka krisinel? O Hristo si odova savo mulo, ta vađe thaj dživdinđa, savo si pe laćhi rig e Devlese, savo thaj maškarinela amenge.

³⁵ Ko amen ka ulavel kotar o kamlipe e Hristosoro? E dukha ja tangaripe, ja prastavipe, ja bokh, ja nangipe, ja daravipe, ja bari ćhuri?

³⁶ Sar si hramome: Baše tute amen mudarena celodive, dikhena amen bakrencar bašo ćhinipe.

³⁷ Aj an pe sa akava vidžaina andar Odova savo amen kamlja.

³⁸ Kaj paćav kaj amen ni o meripe, ni o dživdipe, ni e phakale, ni e šerutnipa, ni e zora, ni akanutnipe, ni avutnipe,

³⁹ ni ućipe, ni xoripe, ni nisavo aver keripe na kašti te ulavel amen kotar o khamnipe e Devlesoro, savo si ano Hristo Isuso o Devljutno amaro.