Rimljanenge 6 - Romski prevod Novog zaveta - Srbija

Mukljardipe kotar o roboipe e bezehese

¹ So, akana, ka phena? Mangaja li te aćhova ano bezeh kaj o dindipe te butbijanđol? Nisar!

² Amen save muljam e bezehese, sar pana ka dživdina ane leste?

³ Ja sar ni džanen kaj sare save bolamen ano Hristo Isus, ano meripe lesoro bolamen?

⁴ Ađahar leja parunđamen andar o bolipe ano meripe, te bi, sar so o Hristo so uštino andar e mule gloripnaja e Dadesara, ađahar thaj amen phiraja ano nevo dživdipe.

⁵ Kaj te uljam khatane formaja lesere meripnaja, napal ka ova thaj e dživdipnaja,

⁶ đanglindoj akava, kaj o purano amaro manuš inzardilo Leja, te bi merela o trupo o bezehutno, kaj te na robojina e bezehese.

⁷ Kaj ko merela mukljarela pe kotar o bezeha.

⁸ Te li muljam e Hristoja, paćaja kaj ka thaj dživdinaja leja,

⁹ džanglindoj kaj o Hristo uštindoj andar e mule, naj na merela; o meripe naj na thagarinela leja.

¹⁰ Kaj so mulo, e bezehese mulo jekhvar baše sa; a so dživdinel, e Devlese dživdinel.

¹¹ Ađahar thaj tumen gndinen tumen kaj sijen mule e bezehese, a dživde e Devlese ano Hristo Isus, Devljutnese amarese.

¹² Te na thagarinel, akana, o bezeh ane tumaro mulikano trupo, te šunen le ane thabutna lesere;

¹³ Ni ma den tumare kotora e truposere e bezehese baše maripnaso bihajipe; aj doden tumen e Devlese, sar dživdinisarde andar e mule, thaj kotora e trupose tumare e Devlese baše maripnaso hakajipe.

¹⁴ Kaj o bezeh na ka thagarel tumencar, kaj na sijen telal o kanuni thaj telal o bahtardipe.

¹⁵ So akana? Manga li te bezehtara kana na sijam telal o kanuni aj telal o bahtardipe? Nisar!

¹⁶ Na đanena li kaj kase dena tumen bašo kandine ano kandipe, kandine sijen odolengo kole kanden: ja bezeh bašo meripe, ja kandipe bašo hakajipe.

¹⁷ Aj nais e Devlese so sinenle kandine e bezehese pa kandinijen vilestar e regula đanipase savake dinđen tumen;

¹⁸ Mukljarindoj pak e bezehestar, uljen kandine e hakajipase.

¹⁹ Sar manuš vakerav bašo bizor tumare truposo. Kaj sar so dijen tumare kotora e truposere te robuinen e melalipnase thaj bikanunese bašo bikanunipe, ađahar akana den tumare kotora e truposere te kanden hakajipnase baše sumnalosaripe.

²⁰ Kaj kana sinjenle robija e bezehese, mukline sijena kotar o hakajipe.

²¹ Savo, akana, bijando sinele tumen teg kotar odova sostar akana lađan? Kaj si agor odolesoro meripe.

²² A akana, mukljarindoj kotar o bezeh thaj ulindoj kandine e Devlesere, isitumen bijando tumaro baše sumnalosaripe, a agor o dživdipe e bimeripnasoro.

²³ Kaj si e pokindi bašo bezeh meripe, a dindipe e Devlesoro si dživdipe bimeripnasoro ano Hristo Isuso, o Devljutno amaro.