Rimljanenge 5 - Romski prevod Novog zaveta - Srbija

Šalom e Devleja thaj adžikeripe ko ikaldipe

¹ Čaćavindoj, akana, paćamnaja, isi amen šalom ano Devel andar o Devljutno amaro o Isuso Hristo,

² andar savo thaj pašealjam paćapnaja ane akava dindipe ane savo terđova, thaj ašarina pe ađićeripnaja e Devlesere gloripnaja.

³ Thaj na semo odova, aj vi ašarape ane bilaćhipa, đanindoj kaj o bilaćhipe kerel pharipe,

⁴ a o pharipe siklipe, a o siklipe ađikeripe;

⁵ A o ađikeripe na lađavel, kaj o kamlipe e Devlesoro ćhordilo ane vile amare Đesa Sumnalesa savo dindo amenge.

⁶ Kaj o Hristo, pana đikaj sinjamle bizorale, mulo ano ćhinado vakti baš e nađandedevleserenge.

⁷ Kaj phare ko ka merel baš e hakajutnese; a baš e šukarese šaj ka ma vi ko krisilape te merel.

⁸ Aj o Devel sikavel plo kamipe mamuj amende, kaj pana sinjamle bezehutne, o Hristo mulo amenge.

⁹ But, akana, angle ka ova andar leste ikalde kotar e bari xoli akana kana sam čaćavdune lesere rateja.

¹⁰ Kaj kana sar biamala baraštisajlam e Devleja andar o meripe lesere Ćhaveja, but majangle ka, akana baraštime, ka ikalamen lesere dživdipnaja.

¹¹ A na semo odova, aj pa thaj ašisaramen e Devleja andar o Devljutno amaro Isus Hristo, andar savo akana leljam o baraštipe.

Durardipe e anglabijandengoro bezeh

¹² Odolese sar so andar jekh manuš đerdinđa ano them o bezeh, thaj andar o bezeh o meripe, thaj ađahar o meripe đerdinđa ane sa manuša, kaj sare kerde bezehinde.

¹³ Kaj o bezeh sine po them đi o kanuni, aj o bezeh na saćedelape kana nane kanuni.

¹⁴ Aj o meripe thagarinđa kotar o Adam đi o Mojsije thaj upral odola save na bezehinde miazutne phagipastar sar o Adam, savo si tasvir Odolestar savo ka avel.

¹⁵ Aj o bahtardimnaso dindipe nane ađahar sar o phagipe, kaj ako phagipnaja jekhesoro mule butđene, but so najbut o bahtardipe e Devlesoro thaj dindipe ano bahtardipe jekhe manušesoro e Isus Hristosoro barvaline ćhordilo ko butđene.

¹⁶ Thaj na bi e dindipnaja ađahar sar bi e phagipnaja andar jekheste; kaj o kris bašo jekheste sine krisipe, a bahtardipnaso dindipe sine čaćavdipe kotar o but phagipa.

¹⁷ Kaj te phagipnaja jekhesoro thagarinđa o meripe andar jekheste, teg anglal odola save len barvalipe e bahtardipnaso thaj dindipe hakajipnaso ano dživdipe ka thagarinen andar jekhoro Isus Hristo.

¹⁸ Ađahar, akana, sar so jekhe phagipnaja alo o krisipe pe sa e manuša, ađahar thaj jekhe čaćavdipnaja alo pe sa e manuša čaćavdipe e dživdipasoro.

¹⁹ Kaj sar so andar bikandipe jekhe manušesoro ule butđene bezehutne, ađahar vi andar o kandipe jekhesoro ka oven butđene hakajutne.

²⁰ A o kanuni uzal odova alo kaj te butbijanđol o phagipe; a kote butbijanđol o bezeh othe si pobut butbijanđol o bahtardipe,

²¹ te bi, sar so thagarinđa o bezeh ano meripe, ađahar thaj o dindipe thagarinela e hakajipnaja bašo dživdipe e bimeripasoro andar o Isuso Hristo, Devljutno amaro.