Rimljanenge 4 - Romski prevod Novog zaveta - Srbija

¹ So ka, akana, te phena e Avraamese, dadese amarese, kaj si reslonđa po trupo?

² Kaj te o Avraam ćerdipnaja čaćavdilo, i sile ašaripe, aj na anglo Devel.

³ Kaj so phenel o Lil? Thaj paćaja o Avraam e Devlese thaj odova lese saćedinđape ano hakajipe.

⁴ A odolese savo ćerel buti, na saćedelape e poćindi po davipe aj palo dužnipe;

⁵ Odolese kaj ni ćerel buti, a paćal ane Odova savo čaćavel e bezexutne, saćedela pe lesoro paćape ano hakajipe.

⁶ Sar so thaj o David vakerela kaj si bahtadino odova manuš savese o Devel saćedela o hakajipe bizo ćerdipe:

⁷ Bahtadine si odola savenge jertisajle e bikanunja thaj savenge ućhardile e bezeha.

⁸ Bahtardino si o manuš savese o Devljutno na saćedela o bezeh.

⁹ Akava bahtadinipe, akana, da li ičerelpe po sunetipe ja vi po nasunetipe? Kaj vakeraja kaj e Avraamese saćedela pe o paćape ano hakajipe.

¹⁰ Sar lese, akana, saćedela pe? Kana sine ano sunetipe ja nasunetipe? Na ano sunetipe, aj ano nasunetipe.

¹¹ Thaj lelja semno sunetipeso, štambili hakajipeso e paćapeso savo sinele ano nasunetipe, kaj te bi ov ovela dad sarijengo save paćana ano nasunetipe, kaj vi lenge te saćedel pe ano hakajipe;

¹² Thaj te bi ovela dad e sunetipaso na semo odolenge save si kotar o sunetipe, aj vi odolenge save phirena pe patuma paćapese e dadese amarese e Avraamese save sinele ano nasunetipe.

¹³ Kaj dinde lafija e Avraamese ja lese kućinake kaj ov te ovel kustikutno e themeso na bi kanuneja aj hakajipnaja e paćapeso.

¹⁴ Kaj te si e kustikutne odola save si kotar o kanuni, andodilipe si o paćape thaj pele o dinde lafija.

¹⁵ Kaj o kanuni kerel bari xoli; a kote nane kanuni nane ni bezeha.

¹⁶ Odolese si kotar o paćape, te ovel po bahtardipe, kaj e dinde lafija te oven arakhavne sa e bijatutnenđe, na semo odolese savo si kotar o kanuni, aj savo si kotar o paćape e Avraameso, savo si dad sarijenge amenge.

¹⁷ Sar kaj si hramome: Kaj ćhutem tut baš dadese bute selorenge angal o Devel kase paćajan, savo dživdinel e mulen thaj vikinel e namanušen te oven manuša.

¹⁸ Kana na sine nisavo adžićeripe ov adžićeripnasa paćaja kaj ka ovel dad bute selorenge, sar so phendilo: Ađahar ka ovel klo bijatutno.

¹⁹ Thaj na ćišljindoj paćapesa na gndinđa pe plo eke mulikano trupo, a sine lese varekaj trujal šel berša, ni po mulikanipe e Sarake matericako.

²⁰ Thaj ano dinde lafija e Devlese ni sungaja napaćapesa, aj zorardilo ano paćape thaj dinđa glorija e Devlese,

²¹ thaj sinele pherdo paćape kaj odova so o Devel dela lafija, kadari si thaj te ćerel.

²² Odole se thaj saćedinđape lese ano hakajipe.

²³ A na bi hramome semo lese kaj si lese saćedimo,

²⁴ aj em amenge savenge ka saćedelape, save paća ane Odova savo dživdinisarinđa e Isuso Hristo e Devljutne amare andar o mule,

²⁵ savo sinele dindo baše bezeha amare thaj uštino bašo čaćavdipe amaro.