Rimljanenge 3 - Romski prevod Novog zaveta - Srbija

¹ Savo si, akana, anglazoralipe e Judejcongo, ja savo si šukaripe e sunetipesoro?

² But ane sarsavo dikhipe. Angluno, kaj si lenge dindime o lafija e Devlesere.

³ Kaj so te na nesave na paćaje? Sar bi lengoro bipaćajipe e Devlesere paćapese ka ćhinavel?

⁴ Nisar! Aj, nek ovel o Devel čaćuno, a o manuš si sako xoxavipe, sar kaj si hramome: Te ikale tut ane lafija kle thaj te perave kana krisinen tut.

⁵ Te li amaro bihakajipe mothovel e Devlesoro hakajipe, so ka phena? Sar si o Devel bihakajutno kana sikavel e bari xoli? Sar manuš vakerav.

⁶ Nisar! Sar šaj bi teg o Devel te krisinel e themese?

⁷ Kaj te o čaćipe e Devlesoro andar mlo xoxavipe sikavdilo butune pe glorija e Lesiri, sose pana thaj me sar bezexutno te ovav krisime?

⁸ Thaj sar ka, sar so kušen amen thaj sar so phenen nesave kaj amen vakera, ker džungalipe te avel o šukaripe? Lengiri krisuni si hakajuni.

⁹ So, akana? Isiamen li anglazoralipe? Nisar! Kaj angleder mothovđam kaj si thaj e Judejcija thaj e Jelinija sare telal o bezeh.

¹⁰ Sar so si hramome: Nane nijekh hakajutno,

¹¹ nane odova savo haljovel, nane odova savo rodela e Devle.

¹² Sare rigosajle thaj khatane bilaćhe ule: nane odova savo kerel laćhipe, nane čaće nijekh.

¹³ Lengoro si krlo limori phravdo, ple ćhibijencar xoxavena, drab si e aspidinako telal e vošta lengere.

¹⁴ O muja si lengere pherde armanja thaj čerkipe.

¹⁵ O pre si lengere sigutne te ćhoren rat.

¹⁶ Mulanipe thaj ćororipe si ko droma lengere;

¹⁷ Thaj drom šalomnasoro na penđarde.

¹⁸ Nane dar e Devlesiri anglal e jakha lengere.

¹⁹ A džana kaj odova so o kanuni vakerela, vakerela odolenge save si ano kanuni, kaj te phanden pe sako muj, thaj sa o them te ovel bango e Devlese;

²⁰ Kaj e kanunesere kotorencar nijekh trupo na ka čaćavelpe anglal o leste; kaj andar o kanuni avela o penđaripe e bezehesoro.

O hakajipe resela pe paćapesa ano Isus Hristo

²¹ A akana pak bizo kanuni sikavdilo o hakajipe e Devlesoro, mothovdino kotar o Kanuni thaj o Profeto;

²² Thaj odova o hakajipe e Devlesoro andar o paćape ano Isus Hristo bašo sa thaj pe sarijende save paćan, kaj nane ulavdipe.

²³ Kaj sare kerde bezeh thaj mukline si kotar glorija e Devlesiri,

²⁴ a čaćavenape dindipnaja, lesere bahtaripnaja, andar ćedinipe savo si ano Hristo Isuso,

²⁵ save ulavđa o Devel te ovel ple rateja viktima baraštibasiri andar o paćape, te sikavel hakajipe plo jertipnaja e angleder bezehengoro,

²⁶ ano lungo dukhavipe e Devlesoro, te sikavel pe o hakajipe lesoro ano akava vakti, kaj si Ov hakajutno thaj kaj čaćavela odole kova si kotar o paćape e Isosesoro.

²⁷ Kaj si, akana, o ašaripe? Aćhavdo si. Save kanuneja? Da li ćerdipna e kanunesere? Na, aj kanunesere paćapnaja.

²⁸ Gndinaja, akana, kaj o manuš ka čaćavelpe paćapnaja bizo ćerdipe e kanunesoro.

²⁹ Ja si o Devel semo e Judejcongoro, a na thaj e nađangledevlengoro? Va, thaj e nađangledevlengoro.

³⁰ Kaj jekh si Devel, savo ka čaćavel o sunetipe andar o paćape thaj nasunetipe paćapnaja.

³¹ Ćhinava li, akana, o kanuni paćapnaja? Nisar! Aj o kanuni zorara.