Rimljanenge 16 - Romski prevod Novog zaveta - Srbija

Bićhalde sastipa thaj palune ćhivipene same

¹ Anglabićhalav tumenge eke e Fiva phenja amara, savi si kandinutni e khanđirjaki ane Kenhreja,

² te len la ano Devljutnipe sar so miazil e sumnalenge, thaj te oven laće ano ažutipe ano sako šej savo tumendar ka rodel; kaj thaj oj butenge ažutinđa, thaj mange korkorese.

³ Bićhalen sastipe e Priskilese thaj e Akilese, khetanutne mle ano Hristo Isus,

⁴ save baš e mlo dživdipe ple menja pašljarde, savenge na ašarisajvav semo me, aj thaj e sa Khanđirja andar e nađangledevlesere; bićhalen sastipe thaj e ćherutna khanđirjake lengarake.

⁵ Bićhalen sastipe mange kamle Epenetose, savo si anglalutno e Ahajako ano Hristo.

⁶ Bićhalen sastipe e Marijake, savi but trudinđape amenge.

⁷ Sastipe e Andronikose thaj Junijose, njamutnen mlen, thaj mle amalen ano phandipe, save si penđarde maškar e apostolja, save thaj angleder mande paćardine ano Hristo.

⁸ Sastipe e Amplijase, ćumudime mange ano Devljutno.

⁹ Sastipe e Urbanose, ažutno amaro ano Hristo, thaj mle kamle e Stahija.

¹⁰ Sastipe e Apelijase, zorardine ano Hristo. Sastipe e Aristovulonge.

¹¹ Sastipe e Irodionese, mle njamutnese. Sastipe e Narkisovenge, save si ano Devljutno.

¹² Sastipe e Trifenake thaj e Trifose, save but keren ano Devljutno. Sastipe e kamlja Persidake, savi but kerđa ano Devljutno.

¹³ Sastipe e Rufose alosarde ano Devljutno, thaj e daja lesera thaj mla.

¹⁴ Sastipe e Asinkritose, Flemerontose, Ermose, Patrovose, Ermijose, thaj e phralja save si lencar.

¹⁵ Sastipe e Filologose thaj e Julijose, Nijerose thaj e phenja lesera, thaj e Olimpese, thaj e sa sumnalen save si lencar.

¹⁶ Bićhalen sastipe jekh averese e sumnale ćumudipnaja. Sastipe bićhalena tumenge e Khanđirja e Hristosere.

¹⁷ Ruđinav tumen eke, phraljalen, te arakhen pe odola save keren ulavdipa thaj dukhavdipa opipe džanipasoro sava tumen siklijen, thaj durarjon lendar;

¹⁸ Kaj asavke na kanden e Devljutnese amarese Isus Hristose aj pumare vogijenge, thaj kovle thaj pherde ašaripase lafonencar xoxaven e vile nađungalenge.

¹⁹ A tumaro kandipe buljardilo pe sa e riga. Odolese lošalisavav baše tumende; aj mangav te oven gođaver bašo laćhipe, a bidžungalutne baš e džungalipnase.

²⁰ A o Devel e šalomnipaso sigate ka xurdarel e benge telal e pre tumare. Baxtaripe amare Devljutnesoro e Isus Hristosoro tumencar.

²¹ *Bićhalen tumenge sastipe o Timotej, o pašutno mlo e bućakoro, thaj o Lukije thaj o Jason thaj o Sosipatar, njamutne mle.

²² Bićhalav tumenge sastipe ano Devljutno thaj me o Tertije, savo hramosardem akaja bićhalutni.

²³ Bićhalel tumenge sastipe o Gaj, kherutno mlo thaj e sa khanđiri. Bićhalel tumenge sastipe o Erast, arkari e forosoro, thaj o phral Kvart.

²⁴ Dindipe amare Devljutnesko e Isuso Hristosko sarijencar tumencar. Amin.