Rimljanenge 15 - Romski prevod Novog zaveta - Srbija

¹ Kamutne sem eke amen e zorale ćišljimastar e ćišljen te legara, thaj na pese te kera.

² Sako amendar nek kerel e najpašutnese ko šukaripe bašo anglipe.

³ Kaj thaj o Hristo na kerđa pese, aj sar so si hramome: Akošipe odolengoro kola akošena tut peravde pe amende.

⁴ Kaj so angleder hramosajlo baše amare siklipase hramosajlo, kaj andar o pharipe thaj zoralipe e Lilesko isiamen ađićeripe.

⁵ A o Devel e pharipnaso thaj ađićeripnaso nek tumenge del jekhune te gndinen maškaro tumende po Hristo Isus,

⁶ te bi jekhođine, jekhe mujesa ašarasa e Devle thaj Dade e Devljutnesere amare e Isus Hristo.

⁷ Odolese len jekh avre, sar so vi o Hristos lelja tumen pe glorija e Devlesiri.

⁸ Aj phenav, kaj o Isus Hristo sine kandino e sunetipaso baše Devlesoro čaćipe, te čaćavel o dindipa e dadengere.

⁹ A e nađangledevlesere te ašaren e Devle bašo dindipe, sar so si hramome: Odolese ka mothovav tut maškar e nađangledevlesere, Devljutneja, thaj ka đilabav kle anavese.

¹⁰ Thaj pale vakerel: Lošalen tumen, e nađangledevlesere, lesere seloresa.

¹¹ Thaj pale: Naisaren e Devljutne sa e nađangledevlesere, thaj glorisaren le sa e selora.

¹² Thaj pale o Isaija vakerel: Ka ovel darhin e Jesejevoso, thaj savo uštinđa te thagarel upral e nađangledevlesere, ane leste ka paćan e nađangledevlesere.

¹³ A o Devel ađićeripnasoro tumen te pherel sakone lošalipasa thaj šalomnipasa ano paćape, te barvaren ano ađićeripe zorasa e Đeso Sumnalesoro.

E Apostolesoro čačavdipe thaj lesere irade

¹⁴ A me sem, mle phraljalen, thaj korkoro paćamno ane tumende, kaj sen thaj korkore pherde laćhipa, pherde sarsave džanipnasa, kaj šaj thaj jekh avren te sikaven.

¹⁵ A hramonđum tumenge, phraljalen, ari zorale sar liparindoj tumenđe po baxtaripe savo dindilope mange kotar o Devel.

¹⁶ Te ovav kandutno e Isus Hristoso maškar e nađangledevlesere rašajune kandindoj e Devlesere evangeliumose, kaj bijanipe e nađangledevleserengo ovel ćajljardipe sumnalo sime e Đesa Sumnalesa.

¹⁷ Isima, akana, naisipe ano Hristo Isuso ane odova so si po Devel;

¹⁸ Kaj na ka krisinav man te vaćerav neso so o Hristo na kerđa maškar mande lafesa thaj kotoresa baš o kandipe e nađangledevlenđe.

¹⁹ Ane zor e semnongoro thaj prašukaripengo, ane zor Đeso e Devlesoro; ađahar kaj kotar o Jerusalimo thaj trujal sa đi o Iliriko pherdem evangeliumosa e Hristosoro.

²⁰ Thaj ađahar phurardilem te buljarav o evangeliumo, na odori kaj o anav e Hristosoro sine penđardo, te na duvarav pe avresoro temelji;

²¹ Aj sar so si hramome: Savenge na sikavđape baše lese, ka dikhel; thaj save na šunđe, ka haljoven.

²² Odolese thaj but droma sema aćhavdo te avav ke tumende;

²³ A akana majbut nanindoj thana ane akala agora, a manglindoj manglin kotar e but berša te avav ke tumende,

²⁴ kana ka džav ane Španija, ka avav tumende; kaj ađućarav, kaj tumen ano nakhlipe ka dikhav, thaj tumen man ka prohodinen odori kana majangle eke đivarekaj ćaljardovav tumendar.

²⁵ A akana džava ano Jerusalim kandindoj e sumnalenge.

²⁶ Kaj e Makedonija thaj e Ahaja laćhekamipasa ćhinade te ćeden nesavo khatano dindipe baš e ćororenge maškar e sumnale ano Jerusalim.

²⁷ Laćhekamipasa ćhinade, aj thaj kamutne si lenge; kaj kana e nađangledevlesere ule lipeutne ane lengere đesikane laćhipa, kamutne si thaj on lenge ane trupone trubupa te kanden.

²⁸ Kana akava, akana, agorinav, thaj akava lenge bijanipe dav, ka pođinav ane Španija prekalo tumende.

²⁹ A džanav kaj kana ka avav ke tumende, ka avav ano pherdipe e baxtaripnaso e evangeliumosoro e Hristosoro.

³⁰ Aj tumen ruđinav, phraljalen, bašo Devljutno amaro o Isus Hristo, thaj bašo kamlipe e Đesoro, mange te oven amala ruđutnake e Devlese baše mande;

³¹ Te ikalav man kotar e nakandune ane Judeja, thaj kaj o kandipe mlo baš o Jerusalim ovel po kamipe e sumnalenge;

³² Kaj lošalipnaja te avav ke tumende, po kamipe e Devlesoro, thaj te loćharama tumencar.

³³ A o Devel šalomnipaso nek ovel sarijencar tumencar. Amin.