Rimljanenge 14 - Romski prevod Novog zaveta - Srbija

¹ A e ćišlje ano paćape len, bizo čingaripa kotar e gndipa.

² Kaj jekh paćal kaj tromal sa te xal, a savo si ćišlo xala šava.

³ Savo xal ma te teljarel odole savo na xal; thaj savo na xal ma te krisinel odole savo xal, kaj le o Devel lelja.

⁴ Ko sijan tu so krisine averesere kandine? Ple šerutnese ov terđola ja perela. Aj ka terđol, kaj si o Devel zoralo le te vazdele.

⁵ Ađahar jekh ulavel o dive kotar o dive, a o aver ićeri sa o dive kaj si jekhune. Sako nek ovel emčaćuno ane godi pli.

⁶ Savo ulavel o dive, e Devljutnese ulavel, a savo na ulavel o dive, e Devljutnese na ulavel. Savo xal e Devljutnese xal, kaj ašarisarda e Devlese; thaj savo na xal, e Devljutnese na xal thaj ašarisarda e Devlese.

⁷ Kaj nikoj amendar na dživdinel korkoro pese, thaj nikoj na merel korkoro pese;

⁸ Kaj te dživdinđam, e Devljutnese dživdina; te li mulam, e Devljutnese mera. Akana, thaj kana dživdina thaj kana mera, e Devljutnesere sijam.

⁹ Kaj odolese o Hristo thaj mulo thaj dživdinisajlo thaj dživdinđa te thagarel vi e mulencar vi e dživdencar.

¹⁰ A tu, sose krisinea e phrale kle? Ja tu, sose teljare e phrale kle? Kaj sare ka terđova e Hristose krisose.

¹¹ Kaj si hramome: Dživdo sem me, vakerel o Devljutno, ka peren pe koča sarsavi ćang, thaj sarsavi ćhib ka del glorija e Devlese.

¹² Akana, sakoj amendar ka del e Devlese iripe po phućipe baše peste.

¹³ Odolese te na krisina maj jekh avre, aj majbut odolestar phurederisaven te na ćhuven e phralese pharipe ja dukhavdipe.

¹⁴ Đanav thaj paćav ano Devljutno Isus kaj niso nane nakhoslo pe peste, semo kana ko gndinel te si so nakhoslo, odolese si nakhoslo.

¹⁵ Te li o phral klo bašo xape dukhavel, eke na kere po kamlipe; ma te našale kle xapesa odole baše kaste o Hristo mulo.

¹⁶ Ma te, akana, akošel pe tumaro šukaripe.

¹⁷ Kaj o Thagaripe e Devlesoro nane xape ni pipe, aj hakajipe thaj šandipe thaj lošalipe ano Đi Sumnalo.

¹⁸ Kaj kova akaleja kandela e Hristose, ćajljardo si e Devlese thaj e manušenge bućarno.

¹⁹ Te phurardija, akana, baše odova so ažutinel šandipese, thaj uđiljune anglipese.

²⁰ Ma arav o kotor e Devlesoro bašo xape, kaj si sa khoslo; aj si džungalipe baš o manuš savo xal pharipnaja.

²¹ Šukar si te na xa mas thaj na pije mol thaj na kere odova pe soste o phral klo perela ja dhukavđola ja ćhišljola.

²² Tut isi paćape? Nek ovel tut korkoro baše tute anglo Devel. Baxtalo si odova savo na krisinel pes baše odova so arakhel baše šukar.

²³ A savo sungal krisime si te xala, kaj na kerel po paćape; a sa so nane kotar o paćape bezeh si.

²⁴ A Odolese savo tumen šaj te zorjarel po evangelium mlo thaj vakerel e Isus Hristo, po phućardipe e garadipeso kotar savo na vakerdilo kotar e bimeripaske vaktija,

²⁵ a akana mothovde thaj andar e lila e profetonenge, po ćhinadipe e bimerutne Devlese, mothovdine sarijenđe e nađangledevleserenge bašo kandipe e paćapese,

²⁶ jekhune baredžandipne Devlese, andar o Isuso Hristo, lese glorija ano bimeripa. Amin.