Rimljanenge 13 - Romski prevod Novog zaveta - Srbija

¹ Sakoj đi te kandel e kanunenge save thagarinena, kaj nane kanuno kaj nane e Devlestar, a e kanunija so isi e Devlestar si kerdine.

² Odolese ko opipesavol e kanunose opipesavol e Devlesere ćhinadipenake, a save opipesavon, ka len o krisipe pe peste.

³ Kaj e phurederutne nane dar baše šukar kotora aj baše džungalipa. Mange li pak te na dara e kanunendar? Ker šukaipe, thaj ka ovel tut ašarutni latar,

⁴ kaj si kandino e Devlesoro tuke bašo šukaripe. Te li džungalipe kerđan dara, kaj na legarel o mači andodijipe, kaj si e Devlesoro kandino, badlutno, te ćhorel e xoli pe odova savo džungalipe kerel.

⁵ Odolese si valjani te kandel pe na semo baše xoli, aj vi bašo mincipe.

⁶ Kaj baše odova thaj porezi pokinen, kaj si e anavarutne e Devlesere save odoleja sajekh kerena.

⁷ Doden, akana, sakonese so sijen kamutne: kase o porezi – porezi, kase dogana – e dogana, kase dar – e dar, kase paćiv – e paćiv.

⁸ Ma oven nikase niso kamutne semo te ćumidinen jekh avre; kaj savo ćumidinel e avere pherđa o kanuni.

⁹ Kaj odova: Ma ker anglaćumidipe, ma mudar, ma ćor, ma vaker xoxamne, ma mang, thaj fije savo ćhinadipe, pherela pe ane akava lafi: Ćumid e najpašutne kle sar tut korkore.

¹⁰ O kamlipe na kerela džungalipe e najpašutnese; kamlipe si, akana, pherdipe e kanunesoro.

¹¹ Thaj akava angla aveste so đanen o vakti, kaj si eke o časo te ušta kotar o sojbe, kaj amenge si akana o ikaldipe popaše aj kana paćajam.

¹² E rat majnakhli, a o dive si popaše.

¹³ Te phira paćivale sar ko dive: na ano barohabipe thaj matipe, na ano namorali thaj bilađipe, na ane ćingara thaj zavisto.

¹⁴ Aj urjaven tumen ano Devljutno Isuso Hristo; thaj phuripe bašo trupo ma anglaćeren ano prekalmanglipe.