Rimljanenge 12 - Romski prevod Novog zaveta - Srbija

Ćhivipe sama thaj phurederipa

¹ Ruđinav tumen, akana, phraljalen, bašo dindipe e Devlesoro te den e trupija tumare ane viktima dživdi, sumnali, ćaljardi e Devlese, sar tumaro ođikano devlesokandipe.

² Thaj te na laćharen tumen akale themese, aj prelaćharen tumen iripna tumara gođaja kaj sikavipnaja te penđaren so si laćho thaj ćaljardo thaj pherutno kamipe e Devlesoro.

³ Kaj andar o dindipe savo dindilo mange, vakerav svakonese savo si maškar tumende: te na gndinel pestar majbut aj so valjani te gndinel, aj te gndinel pašautnegođasa, sako po napi paćapesko sar lese o Devel ulavđa.

⁴ Kaj sar so an jekh trupo isiamen bute kotora, a sa e kotora trupose nanolen jekhuni buti,

⁵ ađahar sem bute jekh trupo ano Hristo, a korkorune kotora trupose sem jekh averenge.

⁶ Isi amen pak, averćhane dindipa po baxtaripe savo si amenge dindo: te si profetipe, mek ovel po napi e paćapeso;

⁷ Te si kandi, mek ovel ano kandipe; sikavnipe, mek ovel ano sikamnipe;

⁸ Te si kovljarutno, mek kovljarol; savo del, mek del putarune; savo vastarel, mek ovel bućarno; savo kerel dindipe, mek kerel lošalune.

⁹ O khamlipe te na ovel dujemujengo. Mrzindoj o đungalipe ićeren tumen ko šukaripe.

¹⁰ Khamen jek avere e phralesere khamnipanaja; paćipnaja keren jekh avre pobare tumendar.

¹¹ Ano bućaripe ma oven bigrižale; oven đesa jagale; e Devljutnese kanden.

¹² Oven ano ađićeripe lošale, ano bilaćhipe trpinen, ano ruđipe jekhune.

¹³ Ažutinen e sumnalenge ano valjanipe; oven laćheašuđarutne.

¹⁴ Baxtaren odolen save prastaven tumen, baxtaren a ma den arman.

¹⁵ Lošalen tumen e lošalutnencar, thaj roven odolencar save roven.

¹⁶ Oven jekha gndipasa maškar tumende. Ma barikane gndinen aj ićeren tumen e pašavutnencar. Ma haćaren korkore tumen gođavarutne.

¹⁷ Nikase ma irinen džungalipe bašo džungalipe; dikhen laćhipe te keren anglal o sa manuša.

¹⁸ Te si šajune, kobor dži tumende terđola, mek ovel tumen šandipe sa e manušenca.

¹⁹ Ma keren irinipe baše tumende, ćumudninalen, aj den than xolinake (e Devlesarake), kaj si hramome: Mlo si irinipe, me ka irinav, vakerela o Devljutno.

²⁰ Te si, akana, bokhalo o dušmani klo, parvar le; te si trošalo, dele pani te pijel; kaj ađahar kerindoj ka gramadine dživde angara ko šero lesoro.

²¹ Ma de kaj o džungalipe te peravel tut, aj perav o džungalipe šukaripnaja.