Rimljanenge 11 - Romski prevod Novog zaveta - Srbija

¹ Thaj phenav, akana: Sar o Devel frdinđa o seloro plo? Nisar! Kaj sem thaj me Izrailjco, kotar e kućin e Avramosiri, kotar o njamo e Venijaminoso.

² Na frdinđa o Devel o seloro plo, savo anglal penđarda. Ja na đanen so vakerel o Lil bašo Ilija sar davijinel pe e Devlese ko Izrailj vakerindoj:

³ Devljutneja, e profeton klen mudarđe thaj e viktima kle hondarde, thaj me aćhiljum jekhuno thaj roden o dživdipe mlo.

⁴ A so lese phenela e Devlesoro iripe? Aćhavdem mange efta milje manuša, save na telile e čangencar anglal o Vaalo.

⁵ Ađahar, akana, thaj ane akava vakti isi jekh aćhipe po alope e dindipase.

⁶ Te li si po dindipe, teg nane kotar o xabe, kaj o dindipe eke ne bi ovela dindipe; te si li kotar o kotora, thaj nane dindipe, kaj o kotor eke ne bi ovela kotor.

⁷ So, akana? Odova so o Izrailj rodela na resel, a e alosarde resle; e aćhutne eke kororile,

⁸ sar so si hramome: Dija lenge o Devel đi bihaćaripaso, jakha te na dikhen thaj kana te na šunen đi o dive avdisutno.

⁹ Thaj o David vakerel: Nek ovel lengere astalja šelo umblavdimaso thaj astarutni thaj crdipe thaj poćindi lenge;

¹⁰ Nek kaljardon e jakha lengere te na dikhen, thaj e dume lengere sajekh te banđon!

¹¹ Vakerav, akana: Zapninde li te otperen? Nisar! Kaj lengo peripe si ikaldipe e nađangledevleserenge, te bi thaj on đungavđona po bućarnipe.

¹² A te si o peripe lengo barvalipe e themese thaj o phagipe lengo barvalipe e nađangledevleserengo, kozom li si majbut o pherdipe lengoro?

¹³ Kaj vakerav tumenge e nađangledevleserenge; poso sem me apostolo e nađangledevleserenge, ašarav o kandipe mlo,

¹⁴ na bi li sar đangavava po bućarnipe mlo njamo thaj ikaldav nesaven kotar lende.

¹⁵ Kaj te si o ćhudipe lengoro baraštipe e themese, so bi ovela lenipe – te na dživdisaripe andar e mule?

¹⁶ Te si e maja sumnal, odova si thaj o umer; thaj te si e darhin sumnal, odova si thaj e krangora.

¹⁷ Te li si nesave krangora phađile, thaj tu, savo san divo maslina, kalemisajlan pe lende thaj uljan khatanutno e darhinakoro thaj sokija e maslinengoro,

¹⁸ ma barjar pe upral e krangora; te pak tu barardiljan, na legare tu e darhin aj e darhin tut.

¹⁹ Ka phene, akana: Phađile e krangora, kaj me te kalemisinama.

²⁰ Šukar! Napaćapesa phađile, a tu paćapesa terđove. Ma te barjove, aj te dara.

²¹ Kaj kana o Devel e naturake krangora na arakhlja, na ka šaj ni tut te arakhel.

²² Dikh, akana, o šukaripe thaj o ostripe e Devlesoro: pe okola save so otpele ostrope, a pe tute o šukaripe, te aćhiljan ano šukaripe; paše odova thaj tu ka ove ćhindo.

²³ A thaj on, te na aćhile ano napaćape, ka ove, kalemime, kaj si o Devel zoralo kaj len Pale te kaleminel.

²⁴ Kaj kana san tu ćhindo kotar e maslina, pe natura divo, thaj kalemisajlan, na pe natura, pe kovli maslina, kozom ka bi anglal, akala save si pe natura, kaleminenape pe pli maslina?

²⁵ Kaj na mangav, phraljalen, kaj tumen te na đanen akava garavdipe, te na gndinen kokore tumenđe: kotor e Izrailjesoro zorardilo, điko te na đerdini pherdo đendo e nađangledevlesere.

²⁶ Thaj ađahar ka ikalel pe sa o Izrailj, sar so si hramome: Ka avel kotar o Sion Ikalutno thaj ka irisarel o bidevlikanipe kotar o Jakov.

²⁷ Thaj akava lenge si xapesovli kotar mande, kana huljarav o bezeha lengere.

²⁸ Po evangelium, akana, dušmanja si baše tumende; a po alope, kovle si bašo dada.

²⁹ Kaj o Devel na ka jertini pe baše ple dindipenge thaj vičipnase.

³⁰ Kaj sar so thaj tumen varekana na kandijenpe e Devlese, a akana sen maznome baše lengoro nakandipe,

³¹ ađahar on thaj akana na kandinde bašo tumaro maznope te bi thaj on ovena maznome;

³² Kaj o Devel phandlja sa ano bikandipe, kaj sa te maznonel.

³³ O xoripe e barvalipeso thaj barogođaveripe thaj haljovipe e Devlesoro! Sar si naphućljune e krisora lesere thaj narodime e droma lesere!

³⁴ Kaj ko penđarđa e godi e Devljutnesiri? Ja ko lese sine phurederutno?

³⁵ Ja ko lese anglal dinđa, kaj lese te irinelpe?

³⁶ Kaj si olestar thaj andar lestar thaj bašo leste sa. Lese glorija ano bimeripe. Amin.