Rimljanenge 1 - Romski prevod Novog zaveta - Srbija

Andripe thaj tema e bićhalutnakiri

¹ O Pavle, kandino e Isus Hristosoro, vičindo apostoli, alome baš o evangelium e Devlesoro,

² save o Devel anglal dinđa prekalo ple profetija ane Sumnale Lila,

³ e Ćhavestar plestar, savo si po trupo bijando kotar kućin e Davidesiri,

⁴ e Isus Hristose Devljutnese amarese, savo si mothovdo ani zor po Đi Sumnalo baš o Ćhavo e Devlesoro dživdisaripnaja andar e mule,

⁵ maškar savo leljam dindipe thaj apostolipe, kaj bašo Anav lesoro anaja ano kandipe e paćapesoro sa e nađangledevleseren,

⁶ maškar save sinjen thaj tumen akhardine e Isus Hristosere,

⁷ sare kola si ano Rim ćumudime kotar o Devel, vičime sumnalenca dindipe tumenge thaj šalom kotar o Devel o Dad amaro thaj o Devljutno o Isuso Hristo.

⁸ Jekto, akana, ašarisavav mle Devlese andar o Isus Hristo baše sa tumenge kaj kotar o paćape tumaro vakerela pe po sa o them.

⁹ Kaj si mange sadikhutno o Devel, savese kandava mle đesa ano evangelium lesere Ćhavese, kaj tumenge dava godi bi ćhinavdipesoro,

¹⁰ ruđindoj sajekh e Devlese ane ruđutna mle te bi mange nesar e Devlesere khamipasa resava te avav ke tumende;

¹¹ Kaj jagale mangava tumen te dikhav, te dav tumenge nesavo đesoro dindipe baše tumaro zoralipe,

¹² odova čaće, kaj othe tumencar te kovljardivav khatane paćapesa, vi tumaraja thaj mlaja.

¹³ Aj tumendar na garavava, phraljalen, kaj but droma mangljum tumenge te avav, kaj bi maškar tumende te ovela man nesavo bijando sar vi maškar e aver nađangledevlesere, ta sema điakana aćhavdo.

¹⁴ Kamuno sem vi e Jelinenge vi e Varvarenge, vi e gođaverenge vi e bihaljovnenge.

¹⁵ Odothar mlo mangipe si kaj vi tumenge save sijen ano Rim te vakerav o evangelijum.

¹⁶ Kaj na lađav e Hristosere evangeliumostar, kaj si odova zor e Devlesiri ko inkaldipe sakonese savo paćal, a najangle e Judejese thaj e Jelinese.

¹⁷ Kaj ane leste phućarela pe hakaj e Devlesiri andar o paćape ano paćape, sar so si hramimo: A o hakajutno kotar o paćape ka dživdinel.

O čačavdipe si trubuno savorenge, e butedevlengere thaj e Judejenge

¹⁸ Kaj phućarela pe xoli e Devlesiri kotar o badali pe sako bidevlipe thaj bihakajipe e manušengoro save ićerena o čaćipe ano bihakajipe.

¹⁹ Kaj so šaj te dođanđolpe bašo Devel pendžardo si lenge, kaj o Devel mothovđa lenge.

²⁰ Kaj so si pe Leste bidikhlino, kotar keripe e themesoro gođaja pe kerutne haljovune dikhela pe, lesiri bimeripasiri zor thaj devlikanipe, kaj nanelen vakeripe.

²¹ Kaj kana pendžarde e Devle, na glorisarde le sar Devel, ni na ašarisinde, aj dilindile ane ple gođa, thaj kaljardilo o nahaljovuno vilo lengoro;

²² Vakerindoj kaj si gođavera, dilindile,

²³ thaj arlisarde e glorija e bimerutne Devlesoro e tasvira merutne manušesoro thaj čiriklengoro thaj štareprengere dživdinutna thaj crdino pe phuv.

²⁴ Odolese dinđalen o Devel ane mangipa lengere vilende ano melalipe, te oven melale e trupija lengere maškaro lende korkorende;

²⁵ Save arlisarde o čaćipe e Devlesoro xoxavipnaja, thaj najbut paćivalisarde thaj kandle e keripnase aj e Keripnaso, savo si baxtardo ano bimeripe. Amin.

²⁶ Odolese dinđalen o Devel ane lađamne gudlipa. Kaj vi e džuvlja lengere kerde naturuno kerdipe ano opipenaturuno,

²⁷ a jekhune ađahar vi e murša meklindoj o naturuno trubujipe e džuvljengoro, thabile pla mangipnaja jekh pe avereste, e murša e muršencar kerindoj ladž, lindoj pe peste trubuni pokindi baše plo xoxavdipe.

²⁸ Thaj sar na hajinena te pendžaren e Devle, dinđalen o Devel ane rumime godi te keren so si bimanušne,

²⁹ len save si pherde sarsavo bihakajipe, blud, džungalipe, lokoistaripe, bilaćhipe, pherde umblavipa, mudaripa, čingara, bižajipa, džungalearakhavdipa;

³⁰ Đišušurutne, phukavutne, bidevljutne, zorasilejđutne, barikane, ašarutne, gndisarutne e džungale lošipnastar, nakandutne e dadenđe,

³¹ bihaljovne, bipaćamne, bihaćarutne, bibarašutne, bikamljune.

³² On, penđarindoj hakaj e Devlesiri, ta save odova kerena lena meripe, na semo kaj odova kerena, aj vi mekena odolenge kola odova kerena.