Phućardipe 9 - Romski prevod Novog zaveta - Srbija

¹ Thaj o pandžto phakalo phudinđa, thaj dikhljum e čereni kaj peli kotar o badali ki phuv thaj dindilo pe laće o nahtari kotar o xoripe e biagoresoro,

² thaj phravđa o xoripe e biagoresoro, thaj iklilo o ćuro andar o xoripe sar čuro e loljarde kubakoro thaj raćatilo o kham thaj o ajri katar o ćuro andar o xoripe e biagoresoro.

³ A andar o ćuro iklile e xututne ki phuv thaj dindilo pe lenge o zoralipe sar so isilen zoralipe e skorpijen ki phuv.

⁴ Thaj vakerdino lenđe si, kaj te na globin e phuvljakere ćarjaće, a ni nisave zelenipnase, a ni nisave kaštese, aj semo e manušenge save nanolen o štambilji e Devlesoro pe lengere ćekata.

⁵ Thaj dindilo pe lenge na te mudaren len, aj te munčinen len pandž masekija; thaj o munčipe lengoro sinele sar munčipe kotar e skorpija kana xala e manuše.

⁶ Thaj ane odola dive ka roden o manuša meripe, thaj na ka arakhen la; thaj ka mangen te meren, thaj o meripe katar lende ka našel.

⁷ A o dikhipe e xututnengo sinele miazuno sar o grasta gatime bašo maripe, thaj ko šere lengere sinele sar nesave khuvdine miazune e sumnakajese, thaj o muja lengere sar muja e manušengere;

⁸ Thaj sinelen bala sar bala e džuvljakere, thaj e danda lengere sinele sar danda e lavengere;

⁹ Thaj sinelen sastrune šeja sar sastresko arakhaduno thaj sastrune šeja, thaj o bašipe lengere phakengo sinele sar šunipe bute grastengere vorda kana prastana ano maripe.

¹⁰ Thaj sinelen porika miazune e skorpijenđe, thaj posavutna, thaj ane ple porika zor te keren lošipe e manušenge pandž masekija.

¹¹ Olen sinelen thagar upral lende phakalo kotar xoripe e biagoresoro, kasoro anav si ko judengoro Avadon, a po grekikano Apolion.

¹² Jekh džungalipe nakhlo, ake avena pana duj džungalipa pale akava.

O dujto džungalipe

¹³ Thaj o šovto phakalo phudinđa, thaj šunđum jekh krlo kotar e štar sumnakajune šinga e viktimutnesoro savo si anglal o Devel,

¹⁴ kaj vakerel e šovtone phakalese savo sinele e truba: Phrav e štaren phakalen save si phandle ki bari len Eufrat.

¹⁵ Thaj sinele phravde o štar phakale gatime aso časo, thaj dive, thaj masek, thaj berš, te mudaren o tritunipe e manušengoro.

¹⁶ Thaj o đindo e urumnengoro pe grasta sinele dušel milionja; thaj šunđum lengoro đindo.

¹⁷ Thaj ađahar dikhljum ano dikhipe e grasten thaj odolen kaj bešena pe lende, saven sinelen sastrune šeja jagale, modra thaj sumporale; thaj o šere grastengere sinele sar šere e lavonengere, thaj andar e muja lengere ikljola jag thaj ćuro thaj sumpori.

¹⁸ Kotar akala trin džungalipa mudardilo trinunipe e manušengoro, kotar e jag thaj kotar o ćuro thaj kotar o sumpori so ikljola andar o muja lengere.

¹⁹ Kaj o zor e grastesiri si ane lengere muja thaj ane lengere porika, a lengere porika miazune si e sapenđe, isilen šere thaj lencar kerena lošipe.

²⁰ A e aver manuša save na mudardile kotar akala džungalipa, ni jertisajle kotar e ćeripna ple vastengere, te na teljardon e džungale ođenđe, ni e sumnakajune idolenđe thaj e srmaćenenge thaj e staćunenge thaj e barešerenge thaj e kašteserenge, save našti ni te dikhen, ni te šunen, ni te phiren;

²¹ Thaj ni jertisajle baše ple mudaripa, ni baše ple drabaripa, ni bašo plo lubnipe, ni bašo plo ćoripe.