Phućardipe 8 - Romski prevod Novog zaveta - Srbija

Efta trube

¹ Thaj kana putarda o eftato štambilji, ćerdilo š'tipe po badali trujal o ekvaš časo.

² Thaj dikhljum efta phakalen save terđovena anglal o Devel, thaj dindilope lenge efta trube.

³ Thaj o aver phakalo alo, thaj terdino anglal o viktimutno ićerindoj e sumnakajesi kandilutni, thaj sinele lese dindo but tamjano te aćhavel e ruđutnencar sa e sumnalenge po sumnakajuno viktimutno anglal e sumnali bešalutni.

⁴ Thaj uštilo o čuro katar o tamjano e sumnalesere ruđutnencar andar e vasta e phakalesere anglal o Devel.

⁵ Thaj lelja o phakalo e kandilutni thaj pherđala jagaja katar o viktimutno thaj frdinđala ki phuv. Thaj ule e grmavine thaj bašipe thaj strefipe e jagengo thaj phuvljakoro tresipe.

⁶ Thaj o efta phakale saven sinelen efta trube, gatisajle te phuden.

⁷ Thaj o angluno phudinđa, thaj uli kukudi thaj jag, hamime rateja thaj odova sine frdime ki phuv, thaj tritunipe e phuvljakoro thabilo, thaj tritunipe e kaštengoro thabilo, thaj sa e vunato ćar thabili.

⁸ Thaj o dujto phakalo phudinđa, thaj sar e bari plain jagaja thabili sinele frdime ano derav; thaj tritunipe e deravesoro ulo rat,

⁹ thaj mudardilo tritunipe e dživde ćeripnengoro ano derav thaj tritunipe e barkengoro peravdilo.

¹⁰ Thaj o trito phakalo phudinđa, thaj peli kotar o badali e čereni bari, savi thabljola sar umlal, thaj peli ko tritunipe e lenjenge thaj pe xajinga e panjengere.

¹¹ A o anav e čerenjako sinele Pelen. Thaj tritunipe e panjesoro ulo pelen, thaj but manuša mule kotar e panja, kaj ule čerke.

¹² Thaj o štarto phakalo phudinđa, thaj khuvdo sinele tritunitno e khamesoro thaj tritunitno e masekeso thaj tritunitno e čerenjengoro, ađahar kaj raćatilo lengoro tritunipe, thaj kaj o tritunipe e divesoro na rošinel, ađahar thaj o raća.

Angluno džungalipe

¹³ Thaj dikhljum thaj šunđum jekhe barephakengo kaj ural maškar o badali thaj vakerela zorale krleja: Ava, ava, ava odolenđe save dživdinena ki phuv kotar e avera krle e trubakere odole trine phakalenđe save tek ka phuden.