Phućardipe 7 - Romski prevod Novog zaveta - Srbija

144 000 Izrailjcirja

¹ Thaj napal dikhljum štaren phakalen kote terđona pe štar x'nza e phuvljakere, thaj ićerena štar balvalja e phuvljakere, te na phudel e balval ki phuv, ni ko derav, a ni pe nisavo kaš

² thaj dikhljum e avere phakale kaj vazdelpe kotar o istok e khameso, save sinele štambilji e dživde Devlesoro, thaj dija vika zorale krleja e štare phakalenđe savenđe sinele dindo te rumisaren e phuv thaj o derav, vakerindoj:

³ Ma rumisaren e phuvlja, ni e derava, ni e kašta, džikaj na ćhiva o štambilji amare Devlesere kandinenge pe ćekata lengere.

⁴ Thaj šunđum o đendo hramosarde e štambiljesa: šel thaj saranda thaj štar milje odolengoro e štambiljesa kotar e sa njamura e Izrailjesere ćhavenđe:

⁵ Andar o njamo e Judinosoro dešuduj milje štambiljesa; andar o njamo e Ruvimesoro dešuduj milje; andar o njamo e Gadovesoro dešuduj milje;

⁶ Andar o njamo e Asirovesoro dešuduj milje; andar o njamo e Neftalimosoro dešuduj milje; andar o njamo e Manasijesoro dešuduj milje;

⁷ Andar o njamo e Simeunesoro dešuduj milje; andar o njamo e Levijevesoro dešuduj milje; andar o njamo e Isaharovesoro dešuduj milje;

⁸ Andar o njamo e Zavulonovesoro dešuduj milje; andar o njamo e Josifovesoro dešuduj milje; andar o njamo e Venijaminesoro dešuduj milje odolengoro e štambiljesa.

Baro seloro

⁹ Napal dikhljum, thaj dikh, bute seloren save našti nikoj te đenel, kotar sako njamo thaj bijandino thaj seloro thaj ćhibija, terđona anglal e sumnali bešalutni thaj anglal o Bakroro, urjavde ane fostanja parne, thaj palme ane vasta lengere;

¹⁰ Thaj dena vika zorale krleja, vakerindoj: Ikaldipe si ano Devel amaro savo bešela pe sumnali bešalutni, thaj ano Bakroro.

¹¹ Thaj sa e phakale terđovena trujal e sumnali bešalutni thaj o phurederutne thaj štar dživde ćeripna, thaj pele natele mujesa anglal e sumnali bešalutni, thaj telile e Devlese,

¹² vakerindoj: Amin! Baxtaripe thaj glorija thaj baro đanipe thaj naisipe thaj paćiv thaj zoralipe thaj zor e Devlese amarese ane bimeripasoro bimeripe. Amin!

¹³ Thaj irisarda jekh kotar o phurederutne, vakerindoj mange: Akala urjavde ane parne fostanja, ko si, thaj kotar ale?

¹⁴ Thaj phendem lese: Devljutneja mleja, tu džane. Thaj phenda mange: Akala si odola save ale andar o bilaćhipe baro, thaj thovde e fostanja ple thaj parnjardo len ano rat e Bakroresoro.

¹⁵ Odolese si anglal e sumnali bešalutni e Devlesiri, thaj kanden lese dive thaj rat ano hramo lesoro; thaj Odova savo bešela pe sumnali bešalutni ka dživdinel ano lende.

¹⁶ Na ka maj bokhaljona, a ni na ka pečon panjese; thaj ni na ka pekelen o kham, a ni nisavo tatipe.

¹⁷ Kaj o Bakroro, savo si maškaral e sumnale bešalutnako, ka ćarjar len thaj ka legarel len pe xajinga e dživdipasere panjenge; thaj ka khosel o Devel sako asvi katar e jakha lengere.