Phućardipe 4 - Romski prevod Novog zaveta - Srbija

Vizija e devlikanesere baripnase

¹ Napal dikhljum: thaj dikh, o udara phravde ko badali, thaj šunđum odova jekhuno krlo kaj vakeri mancar sar truba thaj phenela: Ukli akari, thaj ka mothovav tuće so isi te ovel pale akava.

² Thaj sigo sema ano Ođi; thaj dikh, e sumnalesiri bešalutni terđola ko badali, thaj pe sumnalesiri bešalutni bešela Điko,

³ po dićhipe miazuno e barese jaspin thaj sard; thaj trujal e sumnalesere bešalutnake sinele duga po dikhipe sar smaragd.

⁴ Thaj trujal e sumnalesere bešalutnake sinele bišu štar sumnale bešalutne, thaj pe sumnale bešalutna dikhljum bišu štaren phurederutnen kaj bešen, urjavde ane parne fostanja, thaj e sumnale khuvdinencar pe pumare šere.

⁵ Thaj kotar e sumnale bešalutna ikljovena strefina thaj o krle thaj o grmavine; thaj efta jagakere memelja thabljona anglal e sumnalesiri bešalutni, a odola si efta ođe e Devlesere.

⁶ Thaj anglal e sumnalesiri bešalutni sar derav đamesoro, miazuno e kristalese; thaj maškaral e sumnale bešalutnakoro thaj trujal e sumnale bešalutnakoro štar đivde ćeripna, pherde jakha anglal thaj palal.

⁷ Thaj angluno ćeripe sinele miazuno e lavese, thaj o dujto ćeripe miazuno e guruvorese, thaj o trito ćeripe sinele le muj sar o manuš, thaj o štarto ćeripe sinele miazuno e orlose ano furjalipe.

⁸ Thaj sakoj kotar e štar dživde ćeripna sinelen po šov phaka, trujal thaj andral pherde jakha, thaj dive thaj rat na šalominde vakerindoj: Sumnalo, Sumnalo, Sumnalo o Devljutno Devel Saićerutno, Savo sinele thaj Savo si thaj Savo avela.

⁹ Thaj kana e dživde ćeripna dinde glorija thaj paćiv thaj naisipe Odolese savo bešela pe sumnalesiri bešalutni, Savo dživdinela ano bimeripasoro bimeripe,

¹⁰ pele o bišu štar phurederutne anglal Odova so bešela pe sumnalesiri bešalutni, thaj telile Odolese so dživdinela ano bimeripasoro bimeripe, thaj pašljarde e khuvdine ple anglal e sumnalesere bešalutnake vakerindoj:

¹¹ Paćivalo sijan, Devljutneja thaj Devleja amareja, te le e glorija tha e paćiv thaj e zor, kaj Tu ćerđan sa, thaj kla kamipnaja sa sikavdilo thaj ćerdilo.