Phućardipe 3 - Romski prevod Novog zaveta - Srbija

Lil e khanđirjaće ane Sarda

¹ Thaj e phakalesere Khanđirjake ane Sarda hramosar: Ađahar vaćeri Odova so isile efta ođe e Devlesere thaj efta čerenja: Džanav kle ćerdipna, isi tut anav kaj sijan dživdo, a mulo sijan.

² Džangavđov thaj ma sov, ta čačav aćhuno so si gotime te merel, kaj na arakhljum kle ćerdipna kaj si pherdine anglal o Devel mlo.

³ Ićer ane godi, eke, sar leljan thaj šunđan, ićer odova thaj jertin tu. Te li na sijan džangavdo, ka avav tuće sar ćor, thaj na ka džane ane savo časo ka avav pe tute.

⁴ Aj isi tut thaj ano Sardo nekobor len, save na meljarde e fostanja ple, thaj ka phiren mancar ane parne, kaj si paćivale.

⁵ Ađahar odova savo ka peravel ka ovel hurjavdo ane fostanja parne, thaj na ka khosav o anav lesoro andar e Pustik e dživdipnasiri, thaj ka lav pe mande o anav lesoro anglal o Dad mlo thaj anglal o phakale lesere.

⁶ Kas isi kan nek šunel so o Ođi vaćeri e Khanđirjenđe.

Lil e khanđirjaće ane Filadelfija

⁷ Thaj e phakalesere Khanđirjake ane Filadelfija hramosar: Ađahar vaćeri o Sumnalo, o Čaćuno, savo isile o nahtari e Davidesoro, savo phravela thaj nikoj na ka phandel, thaj savo phandela thaj nikoj na ka phravel.

⁸ Džanav e ćerdipna kle; eke, phravdem e udara anglal tute save nikoj našti te phandel; kaj hari zor isi tut, a ićerđan mlo lafi, thaj na durandiljan mle Anavestar.

⁹ Ake dava tute andar e sinagoga e satanesiri okolen save vakerena baše peste kaj si Judejcija a nane, aj xoxaven; ake, ka ćerav kaj on te aven thaj te teljon anglal o pre kle, thaj te džanen kaj me tut ćumidav.

¹⁰ Odolese so ićerđan mlo ćhinavdipe katar o trpipe, thaj me tut ka arakhav kotar o časo e zumavipnaso savo ka avel pe sa e vasionako them te zumavel odolen save dživdinena ki phuv.

¹¹ Avava sigate; ićer so isi tu, kaj nikoj te na lel o khuvdino klo.

¹² Okole savo peravela ka ćerav direkosa ano hramo mle Devlesoro, thaj maj nane te ikljol avrial; thaj ka hramonav pe leste o Anav mle Devlesoro, thaj o anav e forosoro mle Devlesoro, neve Jerusalimo, savo huljela katar o badali mle Devlestar, thaj nevo Anav mlo.

¹³ Kas isi kan nek šunel so o Ođi vaćeri e Khanđirjenđe.

Lil e khanđirjaće ane Laodikija

¹⁴ Thaj e phakalesere Khanđirjake ane Laodikija hramosar: Ađahar vaćeri Amin, O Sadikhutno paćivalo thaj čaćuno, Širdipeutno ćeripnasoro e Devlesoro:

¹⁵ Džanav o ćerdipna kle, kaj nasijan ni šudro ni tato. O, te ove šudro ja tato!

¹⁶ Ađahar, poso sijan tatoro, thaj na sijan ni šudro ni tato, ka ćhungarav tut andar o muj mlo.

¹⁷ Kaj vakerea: Barvalo sem, thaj barvalijem, thaj niso na valjani maj; a na đane kaj sijan bibaxtalo, thaj dobođino, thaj ćororo, thaj kororo, thaj nango.

¹⁸ Sikavava tut te ćine mandar sumnakaj jagasa jagalo, te barvaljove; thaj parne fostanja, te hurjave tut, ta te na sikavđol o lađavipe kle nangipasoro; thaj melemi te makhe o jakha kle, te dikhe.

¹⁹ Me odolen save ćumidava mahrinava thaj laćharava; odolese ćer, thaj jertin tu.

²⁰ Ake terđovava anglo udar thaj khuvava; ako ko šunela o krlo mlo thaj phravela o udar, ka đerdinav ke leste thaj ka xav raćako xabe leja, thaj ov mancar.

²¹ Odolese savo peravela ka dav te bešel mancar pe sumnali bešaldi mli, sar thaj me so peravđum thaj bešlem mle Dadeja pe sumnali bešaldi lesiri.

²² Kas isi kan nek šunel so o Ođi vakerela e Khanđirjenđe.