Phućardipe 22 - Romski prevod Novog zaveta - Srbija

¹ Thaj mothovđa mange len e panjesiri e dživdipasiri, bistro sar o kristali, savi ikljola kotar e sumnalesiri bešalutni e Devlesiri thaj e Bakroresiri.

² Maškar o trgo lesoro thaj kotar e sovduj riga e lenjakere o Kaš dživdipasoro, savo bijanela dešuduj bijanipa dindoj sakoj ćhon plo bijanipe, thaj e patrina e Kaštestar sinele bašo sastaripe e seloresoro.

³ Thaj maj nane te ovel nisavo armandindipe; thaj e sumnalesiri bešalutni e Devlesiri thaj e Bakroresiri ka ovel ano leste, thaj e kandine lesere ka kanden Le.

⁴ Thaj ka dikhen o muj Lesoro, thaj o Anav lesoro ka ovel ko čekatija lengere.

⁵ Thaj e raća maj nane te oven, thaj ni ka valjani o memelja, ni rošipe e khamesoro, kaj len ka strefisarel o Devljutno Devel, thaj ka thagarinen ane bimeripasere bimeripa.

O Isus avela

⁶ Thaj phenda mange: Akala lafija si paćamne thaj čaćune, thaj o Devljutno Devel e sumnale profetonengoro bićhalda e phakale ple te mothovel ple kandinenđe so ka ovel sigate.

⁷ Thaj ake avava sigate. Baxtardo si savo ićerela o lafija e profetimase akala pustikakoro.

⁸ Thaj me, o Jovan, šunđum thaj dikhljum akava. Thaj kana šunđum thaj dikhljum, telindoj peljum anglal o pre e phakalese savo mange akava sikavđa.

⁹ Thaj phenda mange: Arakh, ma! Thaj me sem kandino sar thaj tu thaj sar o phralja kle e profetija thaj okola save ićerena o lafija akala pustikakere. E Devlese teljov.

¹⁰ Thaj phenda mange: Ma štambiljin o lafija e profetimase akala pustikakere, kaj si o vakti paše.

¹¹ Ko ćerela bihakajipe nek pana ćerela bihakajipe, thaj o bikhoslo nek pana meljarelpe; a ko si hakajuno nek pana ćerela hakajipe, thaj ko si sumnalo nek pana sumnarelpe.

¹² Ake avava sigate, thaj e poćindi mli manca, te dav sakonese pe ćeripna lesere.

¹³ Me sem e Alfa thaj Omega, o Angluno thaj o Paluno, Širdipe thaj Agorisaripe.

¹⁴ Baxtarde si save kerena o ćhinavdipa lesere, te oven len hakaj ko Kaš e dživdipasoro, thaj te đerdinen ko kapije ano Foro.

¹⁵ Avrijal si o džukle thaj e drabara thaj e lubnara thaj e ratvarutne thaj e idoloteljutne thaj sako savo kamela thaj ćerela o xoxavipe.

¹⁶ Me, o Isus, bićhalđum e phakale mle tumenđe te mothoj akava ano Khanđirja. Me sem kustikutno e njamoso thaj Bijanutno e Davidesoro, strefuni Čereni e Danica.

¹⁷ Thaj o Ođi thaj e Bori vakerena: Ava! Thaj kova šunela nek phenel: Ava! Thaj ko si trošalo nek avel, thaj ko mangela nek lel o pani e dživdipasoro po dindipe.

¹⁸ Me mothovava sakonese savo šunela o lafija e profetimase akala pustikakoro: ako ko pherela akalese, o Devel pe leste ka ćhivel munke hramome ane akaja pustik;

¹⁹ Thaj ako ko lela kotar o lafija e pustikakere akale profetipestar, o Devel ka lel lesoro kotor kotar o Kaš e dživdipasoro, thaj kotar o Foro sumnalo, so si hramome ane pustik akaja.

²⁰ Vakerela Odova savo sadikhlja akava: Va, ka avav sigate. Amin, va ava, Devljutneja Isuse!

²¹ Dindipe amare Devljutnesoro e Isus Hristosoro sarijencar e sumnalencar. Amin.