Phućardipe 21 - Romski prevod Novog zaveta - Srbija

Nevo them thaj nevo Jerusalim

¹ Thaj dikhljum o badali nevo thaj e phuv nevi; kaj o angluno badali thaj e angluni phuv nakhle, thaj derav nane maj.

² Thaj dikhljum O Sumnalo foro, Jerusalim nevo, kaj huljela e badalestar kotar o Devel, gatisardo sar bori laćhardi ple romese.

³ Thaj šunđum krlo baro e badalestar savo vakerel: Ake e Skinija e Devlesiri maškar e manuša, thaj Ov ka bešel lencar, thaj on ka oven seloro lesoro, thaj korkoro o Devel ka ovel olencar;

⁴ Thaj o Devel ka khosel sakoj asvin andar o jakha lengere, thaj meripe na ka ovel maj, ni dukhajipe ni dobođipe, ni dukha na ka ovel maj; kaj o angluno nakhino.

⁵ Thaj phenđa Odova so bešela pe sumnalesiri bešalutni: Ake sa kerava neveja. Thaj phenda mange: Hramosar, kaj si akala lafija paćivale thaj čaćine.

⁶ Thaj phenda mange: Agorisav! Me sem e Alfa thaj e Omega, Anglunipe thaj Agorisaripe. Me e trošalese ka dav ano dindipe kotar e xajing pani e dživdipasoro.

⁷ Savo vidžainel ka kuštikinel sa akava, thaj ka ovav lese Devel, thaj ov ka ovel mlo ćhavo.

⁸ A e daravnenđe thaj e bipaćamnenđe thaj e bikhoslenđe thaj e mudarutnenđe thaj e lubninenđe thaj e drabarenđe thaj e idoloteljutnenđe thaj sa e xoxajmatenđe, lenđe si o kotor ane xajing savi thabljola jagaja thaj sumporeja, so si o dujto meripe.

Bahkovlipe e alosardengoro

⁹ Thaj alo jekh kotar o efta phakale, save sinele efta taxtaja pherde e efta palune džungalipa, thaj phenda mange vakerindoj: Phir te mothovavće e Borja, e Romnja e Bakroresera.

¹⁰ Thaj legarđama ano Ođi pe plain bari thaj ući, thaj mothovđa mange o Foro, o sumnalo Jerusalim, savo huljela e badalestar kotar o Devel,

¹¹ thaj save isile glorija e Devlesiri, thaj rošalipe lesoro sinele miazuno e kamle barese, sar bar o jaspis savo strefinela sar kristali;

¹² Thaj sinele duvari baro thaj ućo, thaj sinele dešuduj udara, thaj ko udara dešuduj phakale; thaj o anava upralhramome, a odola si o anava e dešuduj njamonengoro e Izrailjesere ćhavengoro.

¹³ Kotar o istoko trin udara, thaj kotar o severi trin udara, thaj kotar o jugo trin udara, thaj kotar o zapado trin udara.

¹⁴ Thaj o duvari e Forosoro sinele le dešuduj temelja, thaj pe lende dešuduj anava Dešuduj apostolija e Bakroresere.

¹⁵ A odova so vakerela mancar sinele o metari, e trska sumnakani, te meril o Foro thaj o udara lesere, thaj o duvari lesoro.

¹⁶ Thaj o Foro pašljola štarxnzune, thaj o lunđipe si lesoro kozom thaj o buhlipe. Thaj merisarda o Foro trskaja, pe dešuduj milje stadija: o lunđipe thaj o buhlipe thaj o ućipe jekhuni si.

¹⁷ Thaj merisarda o duvari lesoro ko šel thaj saranda thaj štar kunja, po mera e manušesiri, savi si thaj e phakalesiri.

¹⁸ Thaj sinele o materiali e duvareso lesoro jaspis, a o Foro sumnakaj khoslo, miazuno sar đami khoslo.

¹⁹ Thaj o temeljija e duvaresere Forose sinele laćharde sakone kamle bareja: o angluno temelji jaspiso, o dujto sapfiro, o trito halkidono, o štarto smaragdo,

²⁰ o Pandžto sardonikso, o šovto sardo, o eftato hrisolito, o ovtoto virilo, o enjato topazo, o dešto hrisopraso, o dešujekto jakinto, o dešudujto ametisto.

²¹ Thaj dešuduj udara dešuduj mirikle, sako udar sinele kotar jekh miriklo. Thaj o trgo e Forosoro sinele sumnakaj khoslo sar dikhinutno đami.

²² A o hramo na dikhljum ano leste, kaj o hramo si lesoro o Devljutno Devel Sainćarutno, thaj o Bakroro.

²³ Thaj o Foro na trubujinela o kham ni o masek te rošinena lese, kaj le e glorija e Devlesiri rošinela, thaj o rošipe si lesoro o Bakroro.

²⁴ Thaj o selore ka phiren ano rošipe lesoro, thaj o thagara e phuvljakere ka anen glorija thaj o paćiv plo ano leste;

²⁵ Thaj o udara lesere na ka phandljon diveste, kaj raća odothe na ka ovel.

²⁶ Thaj ka anen e glorija thaj o paćiv e seloresoro ano leste.

²⁷ Thaj na ka đerdini ano leste niso bikhoslo, ni savo ćerela skrbope thaj xoxavipe, aj semo o hramome ane Bakroresiri Pustik e dživdipasiri.