Phućardipe 20 - Romski prevod Novog zaveta - Srbija

Angluno dživdinisaripe thaj miljaberšengoro Thagaripe

¹ Thaj dikhljum e phakale kaj uljela e badalestar, savo sinele o naxtari kotar o xoripe e biagoresoro thaj sinđiri baro ano vast plo.

² Thaj astarđa e aždaja, e purane sapinka, savi sa o beng thaj o satana, thaj phandljala ko milja berša,

³ thaj frdinđala ano xoripe e biagoresoro, thaj phandljala thaj štambiljisarđala upral late, kaj maj te na xoxavel e seloren, džikaj na pherđola o milja berša; pale odova valjani te ovel mukljardi ko xarno vakti.

⁴ Thaj dikhljum e sumnalesiri bešalutni thaj beštine pe lende, thaj dindilo pe lenđe o kris; thaj ođe o ćhinde bašo dikhipnasoro vakeripe e Isusesoro thaj bašo lafi e Devlesoro, save na telile e divo dživdinutnaće thaj lakere mujese, thaj na lelje o belego ko čekatija ple thaj po vast plo; thaj dživdinisajle thaj thagarde e Hristoja milja berša.

⁵ A o avera mule na dživdisajle džikaj na agorisajlo o milja berša. Akava si angluno dživdisaripe.

⁶ Baxtardo si thaj sumnalo odova savo isile ćeripna ano angluno dživdisaripe; upral lende aver meripe nanole thagaripe, aj ka oven rašaja e Devlese thaj e Hristose, thaj ka thagarinen Leja milja berša.

Paluno maribe, o dujto dživdinisaripe

⁷ Thaj kana ka pherdon e milja berša ka ovel muklo o satana andar o phandlipe plo,

⁸ thaj ka ikljol te xoxavel e seloren so si pe štar agora e phuvljakere, kotar o Gog thaj o Magog, te ćedel len bašo maripe, kasoro dženipe si sar e pošik e deravesiri.

⁹ Thaj iklile po buhlipe e phuvljakoro, thaj trujalisarde o ćher e sumnalengoro, thaj o kamlo foro; thaj hulili e jag e badalestar kotar o Devel, thaj xalja len.

¹⁰ Thaj o beng savo len xoxavela sinele frdimo ane xajing jagali thaj sumporuni, kote si thaj e divo dživdinutni thaj o xoxamno profeto; thaj ka oven munčime dive thaj rat ane bimeripasere bimeripa.

¹¹ Thaj dikhljum bari, parni sumnalesiri bešalutni thaj Odole so bešela pe late, katar savesoro muj naštini e phuv thaj o badali, thaj than lenđe na arakhavdilo.

¹² Thaj dikhljum e mulen, baren thaj tikoren, kote terđovena anglal e sumnalesiri bešalutni, thaj e pustika phravdile, thaj e dujto pustik phravdili, koja si Pustik e dživdipasiri; thaj sinele krisime o mule pe ćeripna ple sar so si hramome ane pustika.

¹³ Thaj o derav dinđa e mulen save si ano leste, thaj o meripe thaj o pakao dinđe e mulen save sinele ano lende, thaj sinele krisime sako palo ple ćeripna.

¹⁴ Thaj o meripe thaj o pakao sinele frdime ane xajing jagali. Akava meripe si o dujto meripe.

¹⁵ Thaj ko na arakhljape hramome ane Pustik e dživdipasiri frdime sinele ane xajing jagali.