Phućardipe 2 - Romski prevod Novog zaveta - Srbija

Lil e khanđirjaće ano Efes

¹ E phakalesere Khanđirjake ano Efes hramosar: Ađahar vakerela Odova savo ikerela efta čerenja ane daxnori pli, thaj savo phirela maškaral e efta sumnakajune memeljara;

² Džanav o ćerdipna kle, thaj e buti kli, thaj o trpipe klo, thaj kaj našti te inđare e đungalen, thaj upraldikhljardan odolen save vaćarena pese kaj si apostolija a nane, thaj arakhljan kaj si xoxamne.

³ Thaj trpipe isi tut, thaj mučisajlan bašo Anav mlo, thaj na cidinđan tut.

⁴ No isima holi pe tute, so okova angluno kamlipe klo aćhavđan.

⁵ De tut godi, akana, kotar peljan, thaj jertin tut, thaj odola anglune ćerdipna ćer; te na li, ka avav tuće sigate, thaj ka duravav o memeljari klo katar o than lesoro te na jertisajlan.

⁶ Aj akava isi tut kaj ritosare o ćerdipna e Nikolaitesere, save thaj me ritov.

⁷ Kas isi kan nek šunela so o Ođi vakerela e Khanđirjenđe. Odolese ko peravela ka dav le te xal kotar o kaš e dživdipnasoro savo si ano rajo mle Devlesoro.

⁸ Thaj e phakalesere Khanđirjake ane Smirna hramosar: Ađahar vakerela o Angluno thaj o Paluno, savo sinele mulo thaj dživdinisajlo:

⁹ Džanav e ćerdipna kle, thaj o bilaćhipe thaj o ćororipe – aj sijan barvalo – thaj mahripe odolengoro save vakerena kaj si Judejcija a nane, aj sinagoga e satanesiri.

¹⁰ Ma dara nihari kotar odova so isi te trpine. Dikh, o beng nesaven tumendar ka frdel ano phandlipe, te bi tumen zumavela, thaj ka ovel tumen bilaćhipe deš dive. Ov paćavino dži o korkoro meripe thaj ka dav tut khuvdino dživdipnaso.

¹¹ Kas isi kan nek šunel so o Ođi vakerela e Khanđirjenđe. Odolese savo peravela ni ka ćerel đungale o dujto meripe.

Lil e khanđirjaće ano Pergam

¹² Thaj e phakalesere Khanđirjake ano Pergam hramosar: Ađahar vakeri Odova savo isile mačo ostro pe solduj riga:

¹³ Džanav e ćerdipna kle, thaj kaj beše, odothe kote si o than e sataneskoro; thaj ikereja o Anav mlo, thaj ni mekljan o paćape mlo ni ane odola dive ane save o Antipa, paćivalo sadikhutno mlo, mudardilo ke tumende, kote o satana bešel.

¹⁴ Aj hari si maje bange pe tute, kaj isi tut odothe save ićerenape po sikavipe e Valameso, savo sikavda e Valako te frdel peravipe maškar o ćhave e Izrailjesere te xan viktime e idolesere thaj te ljubnisaren.

¹⁵ Jekhune ađahar isi thaj tut odola save ićerenape o sikljojba e Nikolaitesoro.

¹⁶ Jertin tu, akana; te li na, ka avav tuće sigate, thaj ka marav ma lenca mačoja mle mujea.

¹⁷ Kas isi kan nek šunel so o Ođi vaćeri e Khanđirjenđe. Odolese savo peravela ka dav te xal kotar e mana garavdi, thaj ka dav le o bar parno, thaj ko bar nevo Anav hramosardo, savo nikoj na džanela semo okolestar savo lela le.

Lil e khanđirjaće ane Tijatira

¹⁸ Thaj e phakalesere Khanđirjake ane Tijatira hramosar: Ađahar vaćeri o Ćhavo e Devlesoro, kaseri si jakha sar o jagalo e jagakiri, a o pre sar e strefuni xarkuma:

¹⁹ Džanav e ćerdipna kle, thaj o kamlipe, thaj o paćape thaj o kandipe, thaj o trpipe klo, thaj akanutne ćerdipna kle si pođenutne kotar angleder.

²⁰ Aj hari si mange holi pe tute kaj mekea e džuvljaće e Jezaveljaće, savi phenela pese kaj si profetica, te sikavel thaj te crdel e kandinen mlen te ljubnisaren thaj te xan viktime e idolengere.

²¹ Thaj dinđum la vakti te jertilpe, aj voj na mangela te jertilpe kotar o ljubnipe plo.

²² Ake frdav la po buljardo than nasvalipnaso, a odolen save ćerena anglaćumidipe olaja ano bilaćhipe baro, te na jertisajle katar e ćerdipna lakere,

²³ thaj e ćhaven lakeren ka xasarav meripnaja; thaj ka penđaren sa e Khanđirja kaj sem me savo lačharel e bubrezi thaj o vile, thaj ka dav sakonese tumendar pe ćerdipna tumare.

²⁴ A vakerava tumenđe e aćhutnenđe e Tijatirconenge, save na ićerena o sikavipe akava, save na penđarena e xoripe e satanesere, sar so vakerena; na ka mekav upral tumende aver ladavipe,

²⁵ aj okova savo isitumen ićeren đikote ni avav.

²⁶ Thaj odolese savo peravela thaj ićerela o ćerdipna mle đi o agor, ka dav o thagaripe upral e biđangledevleserenge;

²⁷ Thaj ka thagaren upral lende sastrunale rovljaja, thaj on ka phađon sar vasore e pirjarengere;

²⁸ Sar thaj me kaj leljum kotar o Dad mlo; thaj ka dav lese e sabalesiri čereni.

²⁹ Kas isi kan nek šunel so o Ođi vaćeri e Khanđirjenđe.