Phućardipe 19 - Romski prevod Novog zaveta - Srbija

¹ Thaj pale akava šunđum sar krlo zoralo e seloreso butuno ko badali kaj vakerela: Aliluja! Inkaldipe thaj glorija thaj paćiv thaj zor e Devlese amarese;

² Kaj si čaćune thaj hakajune e krisa lesere, so krisisarda e lubnina e bara, savi ruminđa e phuv pla lubnipaja, thaj irinđa o rat ple kandinengoro kotar o vast lakoro.

³ Thaj pale phende: Aliluja! Thaj o ćuro lakoro vazdela pe ano bimeripasere bimeripa.

⁴ Thaj pele o biš thaj štar phurederutne, thaj o štar dživde džene, thaj telile e Devlese savo bešela pe sumnalesiri bešalutni, vakerindoj: Amin! Aliluja!

E Bakroresoro bijav

⁵ Thaj kotar e sumnalesiri bešalutni iklilo o krlo savo vakerela: Ašarinen e Devle amare sa e kandine lesere, thaj save lestar darana, o tikore thaj o bare.

⁶ Thaj šunđum sar krlo bute seloresoro, thaj sar krlo bute panjengoro, thaj sar krlo zorale grmavinengoro, kaj vakerena: Aliluja! Kaj thagarisajlo o Devljutno Devel Sainćarutno.

⁷ Lošalisajvamen thaj vestisajvamen thaj te da glorija Lese, kaj alo o bijav e Bakroresoro thaj e romni lesiri gatisajli.

⁸ Thaj dindo si lake te urjavelpe ane parni svila thaj khosli, kaj e svila mothovela o hakajune ćeripna e sumnalengere.

⁹ Thaj phenda maje: Hramosar, baxtarde si odola save si vičime ko bijavesoro raćako xape e Bakroresoro. Thaj phenda maje: Akala si čaćine lafija e Devlesere.

¹⁰ Thaj peljum anglal e pre lesere te teljardovav lese. Thaj phenda mange: Arakh, ma! Me sem kandino sar thaj tu thaj sar o phralja kle saven isilen dikhipnasoro vakeripe e Isusesoro; E Devlese teljov – kaj si dikhipnasoro vakeripe e Isusesoro o ođi e profetosoro.

O lafi e Devlesoro peravela e divo dživdinutna thaj e xoxamne profeto

¹¹ Thaj dikhljum o badali phravdo, thaj dikh, o gras parno, thaj Odova savo bešela pe leste vičini pe Paćavino thaj Čaćuno, thaj po hakajipe krisinela thaj marelpe;

¹² A o jakha si lesere sar o plameno e jagakoro, thaj ko šero lesoro krune butune, thaj isile Anav hramimo, savo nikoj na džanela dži Ov korkoro;

¹³ Thaj urjavdo si ano fostani lolo kotar o rat, thaj o Anav lesoro vičini pe: Logos (Anav) Devlesoro.

¹⁴ Thaj o karnale e badalesere džana palo Leste ko grasta parne, urjavde ani svila parni thaj khosli.

¹⁵ Thaj andar o muj lesoro ikljola o mačo ostro pe solduj riga, kaj lesa te peravel e nađangledevleseren; thaj Ov len ka ćarjarel sastrune rovljaja, thaj Ov uštavela e kaca moljaja e Devlesere xoljama xoljaja e Sainćarutnesereja.

¹⁶ Thaj isile ko fostani thaj ko kolin lesoro o Anav hramimo: Thagar e thagarengoro thaj Devljutno e devljutnengoro.

¹⁷ Thaj dikhljum jekhe phakale kote terđola ko kham thaj dija vika bare krleja, vakerindoj sa e čiriklenđe save uranena maškar o badali: Aven thaj ćeden tumen ko baro raćako xabe e Devlesoro.

¹⁸ Te xan mas kotar e thagara, thaj mas kotar o vojvode, thaj mas kotar o zorale, thaj mas kotar o grasta thaj odolendar save bešena pe lende, thaj mas kotar o sa mukljutne thaj o robija, thaj kotar o tikore thaj o bare.

¹⁹ Thaj dikhljum e divo dživdinutna thaj e thagaren e phuvljakere thaj karnalen lengeren ćedime te marenpe Odoleja so bešela ko gras thaj lesere karnalencar.

²⁰ Thaj sinele dolime e divo dživdinutni, thaj olaja o xoxamno profeto savo ćerda džungale ćeripna anglo late, savenca xoxavda odolen so lelje o belego e divo dživdinutnako, thaj save teljona lakere mujese; soduj dživde sinele frdime ane xajing jagali, savi thabljola sumporeja.

²¹ A o aćhutne sinele mudarde mačesa savo iklistilo andar o muj Odolesoro so bešela ko gras; thaj sa o čiriklja čajljardile kotar o mas lengoro.