Phućardipe 17 - Romski prevod Novog zaveta - Srbija

Peripe e lubnakoro

¹ Thaj alo jekh kotar o efta phakale save sinele efta taxtaja, thaj vakerela manca thaj phenda mange: Phir te sikavavće o krisipe e lubninakoro savi bešela ko but panja,

² savasa lubnisarde e thagara e phuvljakere, thaj e thanutne e phuvljakere matile e moljaja kotar lakoro lubinipe.

³ Thaj legarđa man ano Ođi ane drmina. Thaj dikhljum e romnja kaj bešela pe loli divo dživdinutni savi si pherdi anava akošimpnasere thaj sinela efta šere thaj deš šinga.

⁴ Thaj e romni sinele urjavdi ano porfiri thaj skerleto thaj laćhardi sumnakajesa thaj kamle barencar thaj miriklencar, thaj sinela taxtaj sumnakajuni ano vast plo, pherdo melalipe thaj bikhoslipe kotar lakoro lubnipe.

⁵ Thaj ko čekat lakoro hramimo anav, garavdipe: o Vavilon baro, daj lubnini thaj melalipe e phuvljengoro.

⁶ Thaj dikhljum e romnja kaj mačola kotar o rat e sumnalengoro thaj kotar o rat e Isusesere sadićhutnenge. Thaj dikhindoj la, biašuđarindema bare biašuđaripnaja.

⁷ Thaj phenđa mange o phakalo: Sose biašuđare? Me ka mothovav će o garavdipe e romnjakoro thaj e divo dživdinutnako so legarla thaj isila efta šere thaj deš šinga.

⁸ E divo dživdinutna sava dikhljan la sinele thaj nanetali, thaj ka inkljol andar o xoripe e biagoresoro thaj ka džal ano peripe; thaj ka biašuđarenpe odola thanutne e phuvljakere savengere anava nane hramome ane Pustik e dživdipnasiri kotar o ćerdisaripe e themesoro, dikhindoj e divo dživdinutna, savi sinele thaj nanetali, thaj ka mothovđol.

⁹ Akate si e godi savi isila džanipe. Efta šere, odola si o efta plaina pe save e romni bešela;

¹⁰ Thaj si o efta thagara: pandž on pele, thaj jekh oja, a o dujto pana ni alo, thaj kana ka avel hari valjani te aćhol.

¹¹ Thaj e divo dživdinutni savi sinele thaj nanetali, oj si thaj ovtoto, thaj kotar e eftatore si, thaj ano peripe džala.

¹² Thaj o deš šinga save dikhlja, odola si o deš thagara save o thagaripe pana na lelje, aj pa sar thagara ka len o thagaripe ko jekh časo e divo dživdinutnaja.

¹³ Akalen jekh gindipe isilen, thaj pli zor thaj o thagaripe dena e divo dživdinutnake.

¹⁴ Akala e Bakroreja ka marenpe thaj o Bakroro len ka vidžainel, kaj si Devljutno upral e devljutne thaj Thagar upral e thagara; thaj okola save si Leja, vičime thaj alosarde thaj paćavine.

¹⁵ Thaj phenđa mange: O panja save dikhljan, kote bešela e lubni, odova si o selore thaj o gramade, o njamora thaj o ćhibija.

¹⁶ Thaj o deš šinga so dikhljan, thaj divo dživdinutni, on ka ritinen e lubnja, thaj ka čućaren la thaj užarenla, thaj o mas lakoro ka xan, thaj ka tharenla jagaja.

¹⁷ Kaj o Devel dinđa ane vile lengere te ćeren o kamipe lesoro, thaj te ćeren jekh kamipe, thaj te den o thagaripe plo e divo dživdinutnake, džikaj na agorinelape o lafija e Devlesere.

¹⁸ Thaj e romni sava dikhljan, si foro baro, savo isile thagaripe upral e thagara e phuvljakere.