Phućardipe 16 - Romski prevod Novog zaveta - Srbija

¹ Thaj šunđum baro krlo andar o hramo kaj vakerela e efta phakalenge: Džan thaj ćhoren o efta taxtaja e xoli e Devlesiri ki phuv.

² Thaj dželo o angluno phakalo, thaj ćhorđa e taxtaj pli ki phuv; thaj ćerdile dukha džungale thaj xoljame pe manuša save isilen o belego e divo dživdinutnakoro thaj save teljarenape lakere mose.

³ Thaj o dujto phakalo ćhorđa e taxtaj pli ko derav, thaj odova ulo rat sar kotar o mudardo, thaj sa dživdo mulo ano derav.

⁴ Thaj o trito phakalo ćhorđa e taxtaj pli ko lenja thaj pe xajinga e panjesere; thaj ćerdilo rat.

⁵ Thaj šunđum e phakale e panjengoro savo vakerela: Hakajuno san Tu, Savo san thaj Savo sana, thaj Sumnalo, kaj akava krisinđan;

⁶ Kaj ćhorde o rat e sumnalengoro thaj e profetonengoro, thaj o rat lenge dijan te pijen, kaj therdisarde.

⁷ Thaj šunđum o viktimutno kaj vakerela: Hemčaće, Devljutneja Devla Sainćarutneja, čaćune thaj hakajune si e krisura kle.

⁸ Thaj o štarto ćhorđa e taxtaj pli ko kham, thaj dindilo lese sa te tharel e manušen jagaja.

⁹ Thaj thabljona o manuša kotar baro tatipe, thaj akošle o Anav e Devlesoro save isile o thagaripe upral o munke akala, thaj na jertisajle te den lese glorija.

¹⁰ Thaj o pandžto ćhorđa e taxtaj pli ki bešutni e divo dživdinutnaći; thaj o thagaripe lakoro ćerdilo raćutno, thaj dandarena e ćhibija ple kotar o dukha,

¹¹ thaj akošena e Devle e badalesere kotar o dukha thaj ple ratvaripa, thaj na jertisajle bašo ćeripna ple.

¹² Thaj o šovto ćhorđa e taxtaj pli ki bari len Eufrat; thaj šućilo o pani lakoro, kaj te gatisavolpe o drom e thagarengoro kotar o istoko khamalo.

¹³ Thaj dikhljum kaj andar o muj e aždajako thaj andar o muj e divo dživdinutnako thaj andar o muj e xoxamne profetosoro ikljona trin bikhosle ođe sar žambe;

¹⁴ Kaj akala si ođe e bengesere save ćerena bilaćhe ćerdipa, thaj džana e thagarenđe e sa vasionaće te ćeden len po maripe bašo Dive odova baro e Devlesoro e Sainćarutnesoro.

¹⁵ Ake avava sar ćor; šukaripe odolese savo si džangavdo thaj savo arakhela o fostanja ple, te na phirel nango thaj te na dikhen o lađavipe lesoro.

¹⁶ Thaj ćedinđa len ko than, savo judikane vičinipe Armagedon.

¹⁷ Thaj o eftato ćorđa e taxtaj pli ko ajri, thaj inklilo o krlo baro andar o hramo e badalesoro kotar e sumnalesiri bešalutni, vakerindoj: Agorisaj vov!

¹⁸ Thaj ćerdile e strefina thaj grmavine thaj krle, thaj sinele baro tresipe e phuvljakoro; asavko tresipe e phuvljakoro thaj asavko baro savo na ulo katarkana si o manuša ki phuv.

¹⁹ Thaj o foro baro ulavdilo pe ko trin kotora, thaj o forore e nađangledevleserenge pele; thaj o Vavilono baro sinele mothovdo anglal o Devel te delpe lese taxtaj mol kotar o zoralipe lesere xoljinake.

²⁰ Thaj sarsavi šuki phuv našaldili, thaj e plajina na arakhavdile.

²¹ Thaj kukudi bari sar talanto peli kotar o badali upro manuša, thaj akošena o manuša upro Devel bašo džungalipe kotar e kukudi, kaj si baro džungalipe lesoro.