Phućardipe 14 - Romski prevod Novog zaveta - Srbija

O Bakroro thaj e alosardine

¹ Thaj dikhljum, thaj dikh o Bakroro savo terđolape pe plain Sion thaj Leja šel thaj saranda thaj štar milje, saven sinelen o Anav lesoro thaj o Anav lesere Dadeso hramome ko čekata lengere.

² Thaj šunđum krlo e badalestar sar krlo e bute panjengoro, thaj sar krlo zorale grmavinako; thaj krlo savo šunđum sinele sar guslipe e guslareso ane ple gusle.

³ Thaj džilabena nevi đilib anglal o bešalutno thaj anglal e štar dživde džene thaj anglal e phurederutne; thaj nikoj naštine te sikljol akaja džilib semo odola šel thaj saranda thaj štar milje save si ćinde e phuvljatar.

⁴ Akala si odola save ni ratvardile e romnjencar, kaj si devutne; akala si odola save džana palo Bakroro sar kaj džala; akala si ćinde maškar e manuša sar anglune e Devlese thaj e Bakrorese;

⁵ Thaj ane lengere muja ni arakhljape xoxajipe, kaj si bi manevako.

Džangljaripe e krisesoro

⁶ Thaj dikhljem e dujtone phakale savo ural maškar o badali, save sinele bimerutno Evangeliumo te mothovel odolenge save dživdinena ki phuv thaj sakone njamose thaj bijanutnese thaj ćhibijake thaj selorese.

⁷ Thaj vakerela zorale krleja: Daran e Devlestar, thaj den lese glorija, kaj avilo o časo lesere kriseso; thaj teljon Odolese savo ćerda o badali thaj e phuv thaj o derav thaj e xajinga e panjesere.

⁸ Thaj o dujto phakalo džala palo leste vakerindoj: Pelo, pelo o Vavilono baro, savo zorale moljaja kotar plo lubnipe mačarda sa e seloren.

⁹ Thaj o trito phakalo džala palo lende vakerindoj grmavinakere krleja: Sar ko teljola e divo dživdinutnaće thaj lakere mose, thaj lela belego ko čekat plo ja po vast plo,

¹⁰ thaj ov ka pijel kotar e mol e Devlesere bara xoljatar, savi si nahamime čhordini ane taxtaj lesere bara xoljatar, thaj ka ovel munčime ane jag thaj sumpori anglal e sumnale phakale thaj anglal o Bakroro.

¹¹ Thaj o ćuro lesere munčipnastar ka uštel ano bimeripasoro bimeripe; thaj na ka ovel le bešipe dive thaj rat odola save teljona e divo dživdinutnaće thaj lakere mose, thaj ko godi lela belego lakere anavestar.

¹² Akate si munčipe e sumnalengoro, save ićerena o čhinavdipe e Devlesoro thaj o paćape e Isusesoro.

¹³ Thaj šunđum o krlo e badalestar savo mange vakerela: Hramosar: Baxtarde o mule kola od akana merena ano Devljutno! Va, vakerela o Ođi, mek aćhaven kotar e buti pumari, a e ćeripna lengere ka džan palo lende.

¹⁴ Thaj dikhljum, thaj dikh o nuveri parno, thaj ko nuveri bešela Nesavo miazuno e Ćhavese e manušeserese, savo sinele ko šero plo khuvdino sumnalo, a ano vast plo luno ostro.

¹⁵ Thaj o dujto phakalo iklistilo andar o hramo vikadindoj zorale krleja Okolese so bešela ko nuveri: Zorale ćhin kle luneja thaj ćhin o điv, kaj avilo o vakti te ćhinelpe o điv, kaj o điv ki phuv šućilo.

¹⁶ Thaj Okova so bešela ko nuveri frdinđa o luno plo ki phuv, thaj ćhindo sine o điv ki phuv.

¹⁷ Thaj o dujto phakalo inklilo andar o hramo so si ko badali, thaj ole sinele luno ostro.

¹⁸ Thaj o dujto phakalo inklilo andar o oltari, savo sinele o thagaripe upral e jag, thaj dija vika zorale krleja okolese savo sinele o luno ostro: Zorale ćhin kle luneja e ostroneja, thaj ćhin e drakh e phuvljakere drakhalinendar; kaj pećile o krangore lesere.

¹⁹ Thaj frdinđa o phakalo o luno plo ki phuv, thaj ćedinđa o drakhalina e phuvljakere, thaj ćhuta ane bari kaca e Devlesere xoljaće.

²⁰ Thaj uštadili e kaca avral o foro, thaj inklilo o rat andar e kaca sa dži e uzde e grastenđe ano buhlipe kotar e milja thaj šov šel stadijuma.