Phućardipe 12 - Romski prevod Novog zaveta - Srbija

E džuvli thaj e aždaja

¹ Thaj semno baro mothodilo ko badali: E romni urjavdi ano kham, thaj o masek telal o pre lakere, thaj ko šero lakoro o khuvdino kotar o dešuduj čerenja.

² Thaj oj sinele khamni, thaj dela vika kotar e dukha munčindoj pe te bijani.

³ Thaj mothovdilo o dujto semno ko badali, thaj dikh, bari loli aždaja kola sinela efta šere thaj deš šinga; thaj ko šere lakere efta krune;

⁴ Thaj e pori lakiri crdela o tritunipe e badalesere čerenjendar, thaj frdela len ki phuv. Thaj e aždaja aćhili anglal e romni savi valjani te bijani, ta kana ka bijanel te xal e čhavore lakere.

⁵ Thaj bijanđa murše Čhavore, savo ka thagarel sa e seloren sastrunala rovljaja; thaj o Čhavoro lakoro sine lindo ko Devel thaj lesere sumnale bešalutnake.

⁶ A e romni naštini ane drmina kote sinela than gatisardo e Devlestar, kaj odothe te parvarenla milja thaj dušel thaj šovardeš dive.

⁷ Thaj ulo maripe ko badali; O Mihail thaj lesere phakale leje te marenpe e aždajaja, thaj mardape e aždaja thaj e phakale lakere;

⁸ Thaj sinele peravde, a ni lenge maj na arakhavdilo than ko badali.

⁹ Thaj frdime sine e aždaja bari, e purani sapni, savi vičinela pe beng thaj satana, savi crdela sa e vasiona, thaj frdime sine ki phuv, thaj olaja frdime sine e phakale lakere;

¹⁰ Thaj šunđum krlo baro ko badali savo vakerela: Akana ulo ikaldipe thaj o zor thaj o Thagaripe amare Devlesoro thaj o thagaripe lesere Hristosoro, kaj si frdime o perutno amare phralengoro, savo len peravela anglal o Devel amaro dive thaj rat.

¹¹ Thaj on le peravdole rateja e Bakroresereja thaj ple sadikhipnasere lafeja, thaj na hajinđe pumare dživdipnase dži o meripe.

¹² Odolese lošalen tumen badalen, thaj tumen kola dživdinena pe lende! Pharipe e phuvljakere thanutnenge thaj e deravesere, kaj huljilo ke tumende o beng ane xoli bari, džanglindoj kaj hari vakti isile.

¹³ Thaj kana dikhlja e aždaja kaj sine frdime ki phuv, lelja te prastavel e romnja savi bijanda e murše Čhave.

¹⁴ Thaj e romnjaće sinele dinde duj phaka e bare orlosere te uralel ane drmina po than plo, kote ka parvardol o vakti thaj vaktija thaj ekvaš o vakti, dur kotar e sapni.

¹⁵ A e sapni muklja pala e romni andar o muj plo o pani sar len, kaj e len te inđarela.

¹⁶ Thaj e phuv ažutinđa e romnnjaće, thaj phravđa e phuv o muj plo thaj nakhavda e len savi muklja e aždaja andar o muj plo.

¹⁷ Thaj xolajli e aždaja pe romni thaj dželi te marelpe e aćhutnencar andar e kućina lakere, save ikerena o čhinavdipa e Devlesere thaj isilen o sadikhipe e Isus Hristosoro.