Phućardipe 11 - Romski prevod Novog zaveta - Srbija

Duj sadikhutne

¹ Thaj dija man trska miazuni e rovljoraće, vakerindoj: „Ušti thaj merisarin o hramo e Devleso thaj o viktimutno, thaj odolen save teljona ano leste;

² A e avruni avlin e hramosiri muk thaj ole ma te merisare, kaj si dindo e biđangle devleserenge, thaj on ka uštaven o sumnalo foro saranu duj ćhona.

³ Thaj ka dav duje sadikhutnenge mlenge thaj ka profetinen milja thaj dušel thaj šovardeš dive, urjavde ano gone.”

⁴ Akala si duj masline thaj duj memeljutna so terđona anglal o Devljutno e phuvljakoro.

⁵ Thaj ako lenge ko kerela bihakajipe, e jag ikljola andar e muja lengere thaj xala e dušmanjen lengeren; thaj ko lenge bi mangela te kerel bihakajipe, ov musaj ađahar te mudardol.

⁶ Akalen isilen o thagaripe te phanden o badali, te na perel o bršin ki phuv ano dive lengere profetipnase; thaji silen o thagaripe upral e panja te len anglaćeren ano rat, thaj te khuven e phuv sakona munkaja kana god ka mangen.

⁷ Thaj kana ka agorinen o sadićhipe plo, o divo so ikljola andar e xor e biagoresoro ka kerel maripe lencar, thaj ka peravela len, thaj ka mudarela len.

⁸ Thaj e trupora lengere ka mekel ko trgo e bare foreso, savo ođikane vičinipe Sodom thaj Egipat, kote thaj o Devljutno lengoro sinele kovime.

⁹ Thaj o manuša andar o seloro thaj bijanipna thaj ćhibija thaj njamija ka dikhen e trupora lengere trin thepaš dive, thaj na ka meken kaj e trupora lengere te pašljardon ano limori.

¹⁰ Thaj o thanutne e phuvljakere ka lošajvon baše lende thaj ka pherđon lengere vile thaj dindipa ka bićhalen jekh e averenđe, kaj akala duj profetija munčinde e thanutnen e phuvljakere.

¹¹ A palo trin thepaš dive đerdinđa ane lende o ođi e dživdipaso kotar o Devel, thaj terdine pumenđe ko pre, thaj e dar bari lelja odolen save olen dikhena.

¹² Thaj ašunde zuralo krlo katar o badali, savo lenge vakeri: Ikljon akari! Thaj iklile ko badali pe nuvera, thaj dikhle len o dušmanja lengere.

¹³ Thaj ane odova časo sinele baro tresipe e phuvljakoro, thaj pelo o dešutno kotor e foroso, thaj mudardile kotar o tresipe e phuvljakoro efta milje anava e manušengere, a e avera darandile thaj dinde glorija e badalesere Devlese.

¹⁴ O džungalipe dujto nakhlo; ake džungalipe o trito avela sigate.

O trito džungalipe

¹⁵ Thaj o eftato phakalo phudinđa, thaj ule bare krle ko badali save vakerena: Ulo o thagaripe e themesoro Thagaripe e Devljutnesoro amaresoro thaj e Hristoso lesoro, thaj ka thagarinela ane bimeripasere bimeripa.

¹⁶ Thaj biš thaj štar phurederutne, save bešena pe pumare sumnale bešalutne anglal o Devel, pele pe muja ple thaj telile e Devlese,

¹⁷ vakerindoj: Naisinaja tuke, Devljutneja Devla Sainćarutneja, Savo sijan, thaj Savo sijana, thaj Savo aveja, kaj leljan e zor kli bari, thaj thagarinđan tut;

¹⁸ Thaj e biđangledevlesere xoljande, thaj ali e xoli kli thaj o vakti e mulenge te krisinelpe, thaj te delpe e poćindi kle kandinenge, e profetonenge thaj e sumnalenge thaj odolenge save darana kle Anavestar, e tiknenđe thaj e barenđe, thaj te mudarenpe odola save ruminena e phuv.

¹⁹ Thaj phravdilo o hramo e Devlesoro ko badali, thaj mothovdilo o moxto e xapesovljakoro e Devljutnesoro ano hramo lesoro; thaj sinele jagale strefipa, thaj krle, thaj grmavine, thaj phuvljako tresipe, thaj kukudi bari.