Phućardipe 10 - Romski prevod Novog zaveta - Srbija

O phakalo e pustikorasa

¹ Thaj dikhljum e avere phakale zorale kote huljela e badalestar, savo sinele hurjavdo ano oblako, thaj e bojali kustik sinele pe lesoro šero, thaj o muj lesoro sinele sar o kham, thaj e pre lesere sar direkore jagale;

² Thaj ov ićerela ano vast plo e pustikori phravdi, thaj terdino ple daxne preja ko derav a e čućeja ki phuv;

³ Thaj dija vika bare krleja sar so del vika o lavo. Thaj kana ov dija vika, vakerdinde e efta grmavine ple krlencar.

⁴ A kana vakerdinde e efta grmavine, mangljum te hramonav, aj šunđum o krlo kotar o badali savo vakerel: Štambiljin odova so vakerde o efta grmavine, thaj odova ma hramosar.

⁵ Thaj o phakalo save dikhljum kaj terđola ko derav thaj ki phuv, vazdinđa plo daxno vast mamuj o badali,

⁶ thaj xala sovlji Odoleja savo dživdinel ane bimeripasere bimeripa, Savo ćerda o badali thaj so si pe leste, thaj e phuv thaj so si pe late, thaj o derav thaj so si ane leste, kaj vaktija nane maj te ovel;

⁷ Aj ano dive krloja e eftatone phakalese, kana ka phudel, tegani ka dindol agor e garavdini Devlesiri, sar so mothovda ple kandinenge e profetonenge.

⁸ Thaj o krlo savo šunđum e badalestar, palem vakerda mancar thaj phenđa: Dža, le e pustikori phravdi ano vast e phakalesoro savo terđola ko derav thaj ki phuv.

⁹ Thaj dželjum e phakalese thaj phendem lese te del man e pustikori. Thaj phenda mange: Lela thaj xal ola; thaj ka čerćarel tuće e por, aj ano muj klo ka ovel gudli sar o avđin.

¹⁰ Thaj leljum e pustikori andar o vast e phakalesoro, thaj xalem la; thaj sinele ano muj mlo gudli sar o avđin, a kana xalem la, uli ćerki e por mli.

¹¹ Thaj phende mange: Valjani pale te profetine anglal o selore thaj njamura thaj ćhibija thaj thagara butune.