Phućardipe 1 - Romski prevod Novog zaveta - Srbija

Andripe

¹ Phućardipe e Isus Hristosoro, savo lese dinđa o Devel, te mothovel ple kandinenge so ka ovel sigate; thaj mothovđa le bićhalindoj le prekal o phakalo plo ple kandinese e Jovanese,

² savo dikhovakerinda o lafi e Devlesoro thaj o dikhovakeripe e Isus Hristosoro, sa so dikhlja.

³ Baxtalo si odova savo drabarel thaj odola save ašunena e lafija anglalmothopnasere, thaj arakhena odova so si hramome ano leste, kaj o vakti si paše.

Andrimasoro lil

⁴ E Jovanestar ko efta Khanđirja save si ane Azija: Dindipe tumenđe thaj šalom e Devlestar, Savo si thaj Savo sinele thaj Savo avela; thaj kotar efta ođendar, save si anglal o astali lesoro;

⁵ Thaj kotar o Isus Hristo, savo si Sadikhutno paćivalo, Anglunobijando andar e mule, thaj Devljutnari upral e phuvljengere thagara. Odolese savo amen ćumidela thaj thovđa amen kotar e bezeha amare ple rateja,

⁶ thaj ćerda amen thagaripnasa, rašajencar e Devlese thaj ple Dadese, lese glorija thaj zor ane bimeripnasoro bimeripe. Amin.

⁷ Ake, Ov avela e badalencar, thaj ka dikhel le sako jakh, thaj odola save le posavde; thaj ka roven bašo leste sa e phuvljengere njamura. Va! Amin.

⁸ Me sem Alfa thaj Omega, vakerel o Devljutno Devel, Savo si thaj Savo sinele thaj Savo avela, Saićerutno.

⁹ Me, o Jovan, o phral tumaro thaj khatanutno ano bilaćhipe thaj thagaripe thaj trpipe ano Isus Hristo, injumle ki šuki phuv vičime Patmos bašo lafi e Devlesoro thaj samothovdipe bašo Isus Hristo.

¹⁰ Injumle ano Ođi ano dive e Devljutnesoro, šunđum krlo pala mande zoralo sar e truba, savo vakerelape:

¹¹ So dikheja hramosar ane pustik, thaj bićhal ko efta Khanđirja: ano Efes, thaj ane Smirna, thaj ano Pergam, thaj ano Tijatir, thaj ano Sard, thaj ane Filadelfija, thaj ane Laodikija.

¹² Thaj irisaljem odori te dikhav o krlo savo vakerela mancar, thaj irisarindoj dikhljum efta sumnakajune memeljara,

¹³ thaj maškaral ane efta memeljara Nekas savo ličini ko Ćhavo e manušesoro, urjavdo ano baro fostani, thaj kustikome ko kolin sumnakune kustikaja.

¹⁴ A o šero lesoro thaj e bala sinele parne sar e parni pošom, sar o iv, thaj e jakha lesere sar o jagalo e jagakoro;

¹⁵ Thaj o pre lesere sar e strefuno bakeri kana angarisavol pe ano šporeto; thaj o krlo lesoro sar bašipe e bare panjengoro.

¹⁶ Thaj sinele le ane plo daxno vas efta čerenja, thaj andar o muj lesoro inklela ostro mačo pe solduj riga, thaj o muj lesoro sinele sar o kham so strefinela ane pli zor.

¹⁷ Thaj kana le dikhljum, peljum ke pre lesere sar mulo, thaj Ov pašljarda o daxno vas plo upre mande, vakerindoj: Ma dara, me sem o Angluno thaj o Paluno.

¹⁸ Thaj Dživdo; thaj injumle mulo thaj ake dživdo sem ane bimeripasere bimeripa, thaj isi man e nahtara katar o meripe thaj katar o pakao.

¹⁹ Hramosar, eke, so dikhljan, thaj so si thaj so ka ovel palo akava:

²⁰ O garavdipe e efta čerenjengoro save dikhljan ki daxnori mli, thaj efta memeljara sumnakaje. Efta čerenja si o phakale e efta Khanđirjengere, a efta memeljara si efta Khanđirja.