Lukéstar 9 - Romski prevod Novog zaveta - Srbija

E apostolengiri misija, e Irodosiri dar

¹ Akharindoj ple sikljovnen e Dešudujen, dija lenge zor thaj baroderipe upral sa đungale đesa, thaj te sastaren e nasvalimastar.

² Thaj bičhalda len te vakeren o Thagaripe e Devlesoro, thaj te sastaren e nasvalen.

³ Thaj phenđa lenge: Khančik ma len po drom, ni rovli, ni trasta, ni maro ni love, ni po duj fostanja te ovel tumen.

⁴ Thaj ano savo kher đerdinen, athe aćhoven thaj athar te đan.

⁵ Thaj save god tumen ni len, iklindoj kotar e diz odoja, činosaren vi o praxo tumare prendar, baš vakeribe opipe lendar.

⁶ A on iklindoj nakhena pe gava vakerindoj o evangelium thaj sastarindoj pe sa e riga.

⁷ A o Irod štarengophirutno šunda so ov kerel, thaj sine dujgođasa. Kaj nesave vakerena kaj o Jovan uštino kotar o mule.

⁸ A aver kaj o Ilija sikavdilo; e aver palem, kaj đivdinisajlo nesavo kotar e phure profetonendar.

⁹ Thaj phenđa o Irod: E Jovane me čhindem; aj kova si odova savestar šunava ađahar khančik? Thaj manglja te dikhel le.

O Isus parvarel e selore

¹⁰ Thaj irindoj o apostolja, mothode lese sa so kerde. Thaj lija len pesa, ta crdinđape ano korkoripe karing i diz akhardi Vitsaida.

¹¹ A kana o seloro džanđarda, đele palo leste, thaj ov olen lelja thaj vakerda lenge kotar o Thagaripe e Devlesoro thaj sastarda odolen savenge trubuja sastaripe.

¹² A o dive ačhilo te teljarel. Atoska pašile e Dešudujore thaj phenđe lese: Mukljar e selore, mek đan po sojba ano trujale gava thaj gavora, thaj mek arakhen xape, kaj akate sinam ano pusto than.

¹³ A ov lenge phenđa: Doden len tumen te xan. A on phenđe: Ana mende naj majbut kotar e pandž mare thaj duj maćhe; sem kaj amen te đa thaj kina xape baš sa akava seloro.

¹⁴ Kaj sine manuša, trujal pandž milje. Aj ov phenđa ple sikljovnenge. Bešljaren len pe grupe po pinda.

¹⁵ Thaj kerde ađahar, thaj bešljarde olen sarijen.

¹⁶ A ov lelja odola pandž mare thaj solduj maćhe, thaj dikhindoj po badali baxtarda len thaj phaglja, thaj dijasa e sikljovnenge te čhiven e selorese.

¹⁷ Thaj xale thaj čalile sare, thaj kedle kotora so ačhilo lenge dešuduj korpe.

E Petrosoro mothovdinipe O Isus anglalmothovel piro meripe thaj đivdinisaripe

¹⁸ Thaj kana jekhdrom ruđisajlo e Devlese korkoro, lesa sine e sikljovne, thaj phučla len vakerindoj: So vakeren o seloro ko sem me?

¹⁹ A on irisarindoj vakerde: Jekh phenen kaj sijan o Jovan Bolipesarutno, a e avera kaj san o Ilija; a avera palem kaj si khonik kotar e purane profetura kaj đivdinisajlo.

²⁰ A ov lenge phenđa: A tumen so vakeren ko sem me? A o Petar irisarindoj phenđa: O Hristos e Devlesoro.

²¹ A ov len daravđa thaj čhinavđa kaj odova khanikaske te ni phenen,

²² vakerindoj kaj e Manušesere Čhavese trubul but te mudarđol, thaj kaj les e phurederutne thaj e anglunerašajune thaj e lilvarne ka frden, thaj kaj ka ovel mudardo, thaj o trito dive kaj ka uštel.

²³ A sarijenge vakerđa: Te ko mangela te đal pala mande, mek nakhel pestar thaj lel o trušul plo thaj pala mande te đal.

²⁴ Kaj ko mangel o đivdipe plo te arakhel, ka xasarel le; a ko xasarel o đivdipe plo kotar mande, odova ka arakhel le.

²⁵ Kaj savo si o therdipe e manušese te lel sa o them a pes aravel ja pese anel đungalipe?

²⁶ Kaj savo ka lađal mandar thaj mle lafonendar, olestar o Čhavo e Manušesko ka lađal kana ka avel ano ašundipe plo thaj e Dadesoro thaj e sumnale phakalenge.

²⁷ A phenav tumenge čače: Isi nesave maškar akala so terđon akate save ni ka zumaven o meripe đikaj ni dikhen o Thagaripe e Devlesoro.

Averćhandipe

²⁸ A trujal ofto dive palo akala lafija, lelja ov e Petre thaj e Jovane thaj e Jakove thaj ukljinđa pe plajin te ruđil pe e Devlese.

²⁹ Thaj đi kaj ruđisajlo kerdilo o rošlipe lesere mujesoro averčhane, vi e šeja lesere parne thaj strefisarne.

³⁰ Thaj dikh, duj manuša vakerena oleja, a odola sine o Mojsije thaj o Ilija,

³¹ save mothovdepe ano ašundipe, thaj vakerena kotar o iklipe lesoro sine le te pherel pe ano Jerusalim.

³² A o Petar thaj on lesa sine peravde sovimasa; aj džangavindoj dikhle o ašundipe lesoro thaj duj manuša save terđona oleja.

³³ Thaj kana ulavde pe on lestar, phenđa o Petar e Isusese: Sikamneja, šukar si amenge akate te ova; te kera trin khasora: jekh tuke, thaj jekh e Mojsijase, thaj jekh e Ilijase, – na đanglindoj so vakerel.

³⁴ A đikaj ov odova vakerđa kerdilo nuvera thaj garavđa len; thaj darandile kana đerdinde ani nuvera.

³⁵ Thaj šundilo pe kotar e nuvera o krlo savo vakerda: Akava si o Čhavo mlo čumudino, ole šunen.

³⁶ Thaj kana si šundilo o krlo, arakhlja pe o Isus korkoro. Thaj on trainde thaj khanikase ni mothode ane odola dive khančik kotar odova so dikhle.

Sastaripe e peravnengoro

³⁷ A o aver dive kana ulile kotar e plajin, resle le but selore.

³⁸ Thaj dikh, manuš kotar o seloro dija vika vakerindoj: Sikamneja, ruđinav tut, dikh po čhavo mlo, kaj si mange jekhoro;

³⁹ Thaj ake, astarel les o đi thaj del vika kotarjekh; thaj phagel le uzal e spuma, thaj phare cidelpe lestar kana phagel le.

⁴⁰ Thaj ruđisardem tire sikaden te traden le, ta naštine.

⁴¹ A o Isus irisarindoj phenđa: O bijavno bipaćavno thaj rumime! Đikote ka ovav tumencar thaj ka trpinav tumen? Ane akari e čhave tire.

⁴² A pana ov đikaj alo, ačhilo o đungalo đi te khinele thaj te phagel le. A o Isus daravda e đe biuže, thaj sastarđa e ćhavore, thaj dija le lesere dadeste.

O Isus pale anglalmothovel piro meripe Sikavipe e apostolengoro Mangimata e apostolengere

⁴³ Thaj sare but prašukarisajle e Devlesere barupnimase. A kana sare čhudisajle baš o sa so kerda o Isus phenđa ple sikljovnenge:

⁴⁴ Čhiven tumen ano kana tumare akala lafija: O Čhavo e Manušesko ka ovel dindo ane manušesere vasta.

⁴⁵ A on ni halile akava lafi; kaj sine garavdo lendar te na haljoven le; thaj darana te Phučen le baš akava lafi.

⁴⁶ A khuvđa dujgodi ano lende savo bi maškar lende ovela najbaro.

⁴⁷ A o Isus đanglindoj dejgodi olengere vilende lija e ćhavore thaj čhuta le uzal peste,

⁴⁸ thaj phenđa lenge: Savo lel akale ćhavore ano anav mlo, man lel; a savo man lel, lel Odole savo man bičhalda; kaj savo si najtikno maškar sarijende tumende, odova si baro.

⁴⁹ A o Jovan irisarindoj phenđa: Sikamneja, dikhljam jekhe kaj tire anaveja tradla e đungale đesa, thaj čhinadam le, kaj ni đala amenca pala tute.

⁵⁰ Thaj phenđa lese o Isus: Ma čhinaven, kaj naj opipe pe tumende; a kas nane opipe tumendar, tumenca si.

⁵¹ Thaj kana pherđona o dive lesero iklimasko, ov zorale čhinada te đal ano Jerusalim.

⁵² Thaj bičhalda e krleutnen anglal peste; thaj on đele thaj ale ano gav e samarjakoro te laćharen baš leste.

⁵³ Thaj ni lije le, odolese so ov đala ano Jerusalim.

⁵⁴ A kana dikhlje e sikljovne lesere o Jakov thaj o Jovan, phenđe: Devljutnea mange li te phena e jag te uljel e badalestar thaj len te xasarel, sar vi o Ilija so kerda?

⁵⁵ A ov irindoj daravđa len thaj phenđa: Ni đanen save sen tumen đesa.

⁵⁶ Kaj o Čhavo e Manušesko ni alo te xasarel e ođe manušengere aj te inkalel. Thaj đele ano aver gav.

⁵⁷ A kana on đana drumal, phenđa lese nesavo: Devljutnea, ka đav pala tute kuri tu đas.

⁵⁸ A o Isus leske phenđa: E baraporjakera isila xar thaj e čirikljen e badaleseren kujbo, a o Čhavo e Manušesko naj le kaj po šero te garavel.

⁵⁹ A e averese phenđa: Ava pala mande! A ov phenđa: Devljutnea, mek mange kaj najanglal te đav me dade te parunav.

⁶⁰ A o Isus lese phenđa: Mek nek e mule parunen ple mulen; a tu ava thaj mothov o Thagaripe e Devlesoro.

⁶¹ A vi o aver phenđa: Devljutnea, ka đav pala tute, aj najanglal mek mange te đav te jertisavav mle kherutnenca.

⁶² A o Isus lese phenđa: Nijekh savo čhuta o vast plo ko plugo ta irinipe palal, nane lačhardo baš Thagaripe e Devlesoro.