Lukéstar 8 - Romski prevod Novog zaveta - Srbija

¹ Thaj sine pale odova, thaj ov phiravđape ko dizija thaj pe gava vakerindoj thaj lošalindoj kotar o Thagaripe e Devlesoro, thaj e Dešudujore oleja,

² thaj nesave đuvlja save sine sastarde katar e đungale đe thaj nasvalipe: E Marija, akhardi Magdalina, andar savi iklile efta đungale đe,

³ thaj e Jovana, e romni e Huzesiri e Irodosoro upravniko, thaj e Susanesoro, thaj aver but save kandena lese pumare kherenca.

Paramiče

⁴ A kana kedle pe thaj but selore, thaj andar e sa dizija avena leste, mothovđa, ani paramiči:

⁵ Iklistilo o sijutno te sijinel ple kućina; thaj kana sijinđa, jekh peli pašo drom, thaj uštadili, thaj e čiriklja e badalesere xale las.

⁶ A e aver peli ko bar, thaj iklindoj šućili, kaj nasinela la pani ani phuv.

⁷ A e aver peli maškar o kare, thaj barile o kare thaj tasavde la.

⁸ A e aver peli ki phuv lačhi, thaj iklindoj anđa šeluno bijanipe. Vakerindoj akava dija vika: Kas isi kana te šunel, nek šunel!

⁹ A e sikljovne lesere phučle le vakerindoj: So mandavel akaja paramiči?

¹⁰ A ov phenđa: Tumenge dindo te đanen garajbe kotar Thagaripe e Devlesoro; a e averenge ovela ane paramiča, kaj dikhindoj te na dikhen, thaj šundidoj te na šunen.

¹¹ A akaja paramiči phenel: E kućina si o lafi e Devlesoro.

¹² A savo si pašo drom odola si save šunen, aj palo odova avel o beng thaj lel o lafi andar o vilo lengoro, te na paćan thaj te na inkalen pes.

¹³ A save si ko bar odola si save kana šunen lošalimasa len o lafi; thaj vi akalen darhina na nelen te baš nesavo vaxto paćan, a ano vaxto zumavipasko peren.

¹⁴ A save ano kare perena, odola si save šunde thaj, đivdindoj ano pharipe thaj barvalipe thaj gudlipe akale đivdimasko, oven tasavde, thaj ni anen bijanipe.

¹⁵ A save si pe lačhi phuv, odola si save šunde o lafi, ano lačho thaj khoslovilo ićeren la, thaj bijanipe anen ano nakhavipe. Akava vakerindoj dija vika: Kas isi kana te šunel, nek šunel!

¹⁶ A khonik ni ućharela vasosa e memeli kana tharela, ni čhivela telal o kreveto, aj čhivela pe memeljakoro than kaj odola save đerdinena te dikhen rošlipe.

¹⁷ Kaj naj khančik garavdo so ni ka ovel putarno, ni o garavdino so ni ka ovel džangljardo thaj ko rošlipe ka ikljol.

¹⁸ Arakhen, akana, sar šunen; kaj kas isi ka del pe lese, a kas nane, ka lel pe lestar vi odova so del godi kaj isi le.

Čače e Hristosere phrala

¹⁹ A e daj thaj e phrala leske avile leste, thaj naštine kotar e selore te malavdonpe lesa.

²⁰ Thaj mothode lese: E daj tiri thaj e phrala tire terđon avri, thaj mangen te dikhen tut.

²¹ A ov irisarindoj phenđa lenge: akala so šunena thaj agorisinena o lafi e Devlesoro – von si miri daj thaj mire phrala.

Aćhavdipe e bare balvaljakoro, biašuđarutno Gergesinco

²² Thaj kerdilo pe jekh dive thaj đerdinda ov thaj lesere sikljovne ani barka, thaj phenđa lenge: Te nakha pe okoja rig e deravesoro. Thaj gele.

²³ Thaj đikote miškosajle, vov suća. Thaj vazdisalji e zorali balval ko derav, thaj o pani đerdini thaj sine ano daravdipe.

²⁴ Thaj pašindoj đangade le vakerindoj: Sikamneja, sikamneja, xasardiljam! A ov uštino, thaj daravda e balvalja thaj e panjesere talasen, thaj aćhavdile thaj ulo bišundipe.

²⁵ A lenge phenđa: Kaj si tumaro paćape? A on darandile, thaj dikhena pe vakerindoj jekh avrese: Ko si akava ta vi e balvaljenđe thaj e panjese te čhinavel, thaj šunen le?

²⁶ Thaj resle ani Gadarinsko phuv savi si karing e Galileja.

²⁷ A kana ov iklistilo ki phuv, reslja le nesavo manuš kotar e diz an savo sine e đungale đe but vaxto, thaj ane šeja ni huravela pe, thaj na đivdinela ano kher, aj ane limora.

²⁸ A kana dikhlja e Isuse, dindoj vika pelo anglalo leste thaj andar sa o krlo phenđa: So mange mandar, Isuse, Čhavo Devlesoro e Najućesoro? Ruđisarav tut, ma mučin man!

²⁹ Kaj ov čhinavda e đeske biužeske te ikljol andar o manuš; kaj mučindale but berša, thaj phandela le verigenca thaj sinđirenca thaj arakhela le, thaj činela e phandine, thaj tradela le o đungalo đe pe drmine.

³⁰ A o Isus phučla le vakerindoj: Sar si tiro anav? A ov phenđa: Legion; kaj but đungale đe đerdinde ano leste.

³¹ Thaj ruđindo le kaj te na čhinavel te đan ano bezsan.

³² A gothe čarljona pe plajin bari gramada e balengiri, thaj ruđisarena le kaj te mekel len te đerdinen ano lede. Thaj meklja lenge.

³³ A kana iklile e đungale đe andar o manuš, đerdinde ano bale; thaj prastile e gramada katar o brego ano derav, thaj tasavdile.

³⁴ A kana dikhle e balengere arakhavne so kerdilo pe, našle thaj mothode ani diz thaj pe gava.

³⁵ Thaj iklistile te dikhen so kerdilo, thaj avile e Isusese, thaj arakhle e manuše andar savo sine iklistile e đungale đe kaj bešel urjavdo thaj džangado koro pre e Isusesere; thaj darandile.

³⁶ A odola so sine thaj dikhle, vakerde olenge sar inklilo o dilino.

³⁷ Thaj ruđisarde le sa o seloro kotar o trujalipe gadarinsko te đal lendar; kaj sine astarde bare daraja. A ov đerdinda ani barka thaj iranđa pe.

³⁸ A o manuš andar kaste iklistile e đungale đe ruđisarda le oleja te ovel; aj le o Isus muklja vakerindoj:

³⁹ Irin tut tire khereste, thaj mothov so tuke kerda o Devel. Thaj gelo vakerindoj pe sa o dizija so lese kerda o Isus.

Đivdisaripe e Jairosere ćhajakoro thaj sastaripe e romnjakere ratesoro thavdipe

⁴⁰ A kana iranđape o Isus, reslja le o seloro, kaj sare ađičerenale.

⁴¹ Thaj dikh, alo o manuš palo anav Jair, thaj ov sine phureder e sinagogakoro, thaj perindoj anglal o pre e Isusesere, ruđinela le te đerdini ano lesoro kher.

⁴² Kaj ano leste sine jekhori ćhaj trujal e dešuduj berš, a oj merela. A kana đala o Isus, o seloro spidenape uzalo leste.

⁴³ Thaj sine jekh đuvli nasvali kotar e ratesoro thavdipe dešuduj berša, savi sa po barvalipe dinđa e sastarutnenge thaj nijekh naštine te sastarela;

⁴⁴ Thaj pašindoj palal, azbavda pe pođa lesere fostanostar, thaj sigo ačhilo lakoro ratesoro thavdipe.

⁴⁵ Thaj phenđa o Isus: Ko si odova so azbavda ma? A kana sare trainde, phenđa o Petar thaj save sine oleja: Sikamneja, o seloro trujalisarde tu thaj bucinen tu, a tu vakere: Ko si odova so azbavda ma?

⁴⁶ A o Isus phenđa: Nesabo azbavda ma, kaj me haćardem e zor savi iklistili andar mande.

⁴⁷ A kana dikhlja e đuvli kaj na garađape, avili izdravindoj, thaj peli anglo leste, thaj phenđa lese anglo sa e selore sose azbavda le thaj sar sigo sastili.

⁴⁸ A ov phenđa lake: Ma dara, mi ćhaj, o paćape tiro inkalda tu; đa ano šandipe.

⁴⁹ Đikaj ov pana vakerela alo nesavo phureder e sinagogakoro thaj phenđa lese: Muli e ćhaj tiri ma mučin e Sikamne.

⁵⁰ A kana šunda o Isus, irisarda lese vakerindoj: Ma dara, gaći paćav, thaj ka ovel inkaldi.

⁵¹ Thaj avindoj ano kher, na meklja khanikaske te đerdini sem e Petrose thaj e Jovanose thaj e Jakovese, thaj e ćhajakere dadese thaj e dajake.

⁵² Thaj sare rovena thaj rikninena palo late. A ov phenđa: Ma roven, ni muli aj sovel.

⁵³ Thaj asandile lese đanglindoj kaj muli.

⁵⁴ A ov ikalindoj sarijen, lija la baš vastestar thaj akharda, vakerindoj: Čhaje, ušti.

⁵⁵ Thaj irinđape olakoro đi, thaj sigo uštili; thaj ov čhinada te den la te xal.

⁵⁶ Thaj prašukarisajle but e bijande lakere. A ov olenge čhinada kaj khanikaske te na mothoven so kerdilo pe.