Lukéstar 7 - Romski prevod Novog zaveta - Srbija

Sastaripe e kapetanosere kandine

¹ A kana agorisarda sa ple lafija anglal o seloro, dija ano Kapernaum.

² An kapetano sine jekh kandino nasvalo po meripe savo leske sine kamlo.

³ A kana šunđa e Isusese, bičhalda lese phurederen e judejakere ruđindoj le te avel thaj te inkalel lesere kandine.

⁴ A on avindoj e Isusese ruđisarde les putarune, vakerindoj: Paćivano si kaj leske odova te kere,

⁵ kaj čumudinel e manušen amaren, thaj kerda amenge e sinagoga.

⁶ A o Isus đala olenca. Thaj kana ake sine paše katar o kher, bičhalda o kapetano lese ple amalen kola lese vakerde: Devljutnea, ma munči tut, kaj najsem Paćivano kaj telal o ćatlo mlo te đerdine:

⁷ Odoleske vi ni haćarav man pačivune te avav tuke; aj numa phen o lafi, thaj ka sastol o kandino mlo.

⁸ Kaj vi me sem manuš telal o baroderipe, thaj isi man tela mande urumne, ta phenav jekheske: Đa, thaj đal; vi e dujtonese: Av, thaj avel; vi e kandineske mlese: Ker odova, thaj kerel.

⁹ A kana šunđa odova o Isus, prašukarisalo lese, thaj irisarindoj e selorese save đana palo leste phenđa: Vakerav tumenge ni ano Izrailj asavko paćape ni arakhljem.

¹⁰ Thaj kana e bićhalde irinđepe, arakhle e nasvale kandine sasto.

Đivdisaripe e ternesko ano Nain

¹¹ Thaj kerdilo pe atoska ov te đal ani diz savo akharel pe Nain, thaj oleja đana but sikade lesere thaj but selore.

¹² A kana alo paše uzalo udar e dizijaki, thaj dikh, ikalena e mule, jekhoro čhavo lesere dajako, thaj voj sine phivli; thaj but seloro kotar e diz đana pale late.

¹³ Thaj dikhindoj la o Devljutno kovlilo pe late, thaj phenđa lake: Ma rov!

¹⁴ Thaj pašindoj dolisajlo pe legarutne, a e legarutne aćhile; thaj phenđa: Terneja, tuke vakerav, ušti!

¹⁵ Thaj bešlo o mulo thaj ačhilo te vakerel; thaj dija le lesere dijake.

¹⁶ A e dar lelja sarijen, thaj ašundisarena e Devle vakerindoj: O baro profeto vazdinđa pe maškar amende, thaj o Devel dikhljarda ple selore.

¹⁷ Thaj gelo o krlo akava lestar pe sa e Judeja thaj pe sa o trujalipe.

Bićhaldipe e Jovanosko Bolipesarutno

¹⁸ Thaj mothode e Jovanose e sikljovne lesere baš sa akava.

¹⁹ Thaj akharda o Jovan dujen ple sikljovnendar thaj bičhalda len koro Isus, vakerindoj: Tu li sijan Odova so ka avel, ja avere te ađičera?

²⁰ Avindoj ta odola manuša koro leste phenđe: O Jovan Bolipesarutno bičhalda amen tuke vakerindoj: Tu li sijan Odova savo ka avel, ja avere te ađičera?

²¹ A ano odova časo ov sastarđa buten e nasvalimastar, thaj kotar rane thaj e đungale đendar, thaj bute kororenge dija dikhibe.

²² Thaj irisarindoj o Isus phenđa lenge: Đan thaj vakeren e Jovanoske so dikhlen thaj šunden: o korore dikhen, o bange phiren, o đeramne užaren pe, o kašuke šunen, o mule ušten, e čororenge vakerel pe o evangelium;

²³ Thaj baxtardino si odova savo na ka cidelpe mandar.

²⁴ A kana gele e Jovanosere sikljovne, lija e selorese te vakerel baš o Jovano: So ikliljen ani drmina te dikhen? E trska sava phudela e balval?

²⁵ Aj so iklistiljen te dikhen? E manuše ane kovle šeja urjavde? Eke, save rajonenge šeja phiraven thaj ano gudlipe đivdinen pe thagarenge palate si.

²⁶ Aj so iklistiljen te dikhen? E profeto? Va, me tumenge vakerav thaj pobuter e profetostar.

²⁷ Akava si odova baš savese si hramome: Ake, me bičhalav e phakale mle anglo muj tiro savo ka laćharen o drom tiro angla tute.

²⁸ Kaj tumenge phenav: Nijekh maškar o bijande e romnjendar naj pobaro profeto katar o Jovan Bolipesarutno; a o najcikno ano Thagaripe e Devlesoro pobaro si olestar.

²⁹ Thaj sa e selore save šunena thaj e hudutnara vortosarde e Devle, bolipen pes e Jovanosere bolipnasa;

³⁰ A o fariseja thaj o kanunđije frdinde o kamipe e Devlesoro olendar, save ni bolenape olestar.

³¹ Kasa akana, ka rindosarav e manušen akale bijanimaske thaj kaske si miazutne?

³² Miazutne si e ćhavorenge so bešen ko trgo thaj akharen jekke averen vakerindoj: Bašalđam tumenge, thaj na khelđen; kućisardam tumenge, thaj na runđen.

³³ Kaj avilo o Jovan Bolipesarutno savo maro na xal ni mol pijel, a tumen vakerena: O Đungalo đi si ano leste.

³⁴ Alo o Čhavo e Manušesko savo vi xal vi pijel, a tumen vakeren: Dikh manuše halane thaj mate, amale e hudutnengoro thaj bezehengoro.

³⁵ Thaj sas čačardo baro bižajipe katar sa e ćhavore lakere.

Phago vilo e bezehengakoro

³⁶ Ruđisarda le ta jekh kotar e fariseja ta te xal koro leste; thaj đerdindoj ano kher e farisejesko, bešlo baš o astalja.

³⁷ Thaj dikh, e romni ani diz savi sine bezehali, đanglindoj kaj si o Isus baš e astalja ano kher e farisejesko, anda sung ano vaso e alavastrostar.

³⁸ Thaj terdindoj palal ke lesere pre runđa, thaj terdini te thovel o pre lesere asvenca, thaj ple balenca kosja e pre lesere thaj čumidela e pre lesere, thaj makhela sungasa.

³⁹ A kana dikhlja o farisej savo le akharđa, phenđa ana peste: Te si ov profeto, ka đanel si ko thaj savi đuvli azbavel le; kaj si bezehali.

⁴⁰ Thaj irisarindoj o Isus phenđa leske: Simone, isi man tuke khančik te vakerav. A ov phenđa: Sikamneja, vaker.

⁴¹ A o Isus phenđa: Duj đene sine udžilime jekhe paćavutneske, jekh sine udžilime pandžšel dinara, a o aver pinda.

⁴² A kana on na sine len te irinen leske, davisarda soldujenđe. Vaker, savo les katar lende dujende pobuderi ka čumidel?

⁴³ A o Simon irisarindoj phenđa: Dav godi odova savese pobuderi dinđa. A ov leske phenđa: Čače si krisisardan.

⁴⁴ Thaj irindoj e đuvljake, phenđa e Simonose: Dikhe li akala đuvlja? Đerdinđum tuke ano kher, ni pani pe mle pre na dinđan, a oj pe asvenca thovđa me pre, thaj ple balencar kosljalen.

⁴⁵ Čumudipe na dinđan ma; a oj, sar đerdinđa, ni ačhavđa te čumidel me pre.

⁴⁶ Uljesa ni makhljan o šero mlo, a oj sungasa makhlja me pre.

⁴⁷ Odolese phenav tuke: Jertinen pe olake but bezeha, kaj baro kamlipe sinela; a kaske hari jertine pe cikno kamlipe isile.

⁴⁸ A lake phenđa: Jertinipe tire bezeha.

⁴⁹ Thaj aćhile ana peste te vakeren odola so bešena oleja baš e astalja: Savo si akava so vi e bezeha jertinel?

⁵⁰ A e đuvljake phenđa: O paćape tiro ikalđa tut; đa ano šandipe.