Lukéstar 5 - Romski prevod Novog zaveta - Srbija

Akhardipe e anglune sikljovnengo

¹ A kerdilo pe kana o seloro reslja leste te šunen o lafi e Devlesoro thaj ov ačhilo uzalo Genisaretesko derav,

² thaj dikhlja duj barke kaj ačhen uzalo derav, a e maćhara iklistile andar lende thaj xalavena e safina.

³ Thaj dija ani jekh barka, savi sine e Simonoski, thaj ruđisarda les te duralela ari katar e šuki phuv; thaj bešlo thaj sikavela e selore andi barka.

⁴ A kana ačhavda te vakerel, phenđa e Simonoske: Hajde po xoripe thaj čhuden e safina tumare baš o dolipe.

⁵ Thaj irisarindoj o Simon phenđa lese: Sikavneja, soro rat dijam zori, thaj khančik ni astardam; aj pe tiro lafi ka frdav i safin.

⁶ Thaj kerindoj odova astarde but bute maćhe, ta lenge e safin lija te pharavđol.

⁷ Thaj dije semno e amalenge save sine pe aver barka te aven kaj len te ažutinen; thaj avile, thaj pherde solduj barke ađakar kaj odola lije te pherđon pani.

⁸ A kana dikhla o Simon Petar, pelo pe čanga uzalo Isus vakerindoj: Ikljov mandar, Devljutnea, kaj sam manuš bezehalo.

⁹ Kaj o daravdipe lelja le thaj sarijen save sine lesa kotar astaripe e mačhengo so dolinde,

¹⁰ a ađakar jekhune vi e Jakove thaj e Jovano, e čhaven e Zevedejeskeren, save sine amala e Simonosere. Thaj phenđa o Isus e Simonose: Ma dara, kotar akana e manušen ka astare.

¹¹ Thaj ikalindoj solduj barke ki phuv mukle sa, thaj gele palo leste.

Užaripe e đeramnesko thaj sastaripe e lindesko

¹² Thaj kana sine o Isus ani jekh diz, thaj dikh, o manuš sa ani đeramni, ta dikhindoj e Isuse pelo pe čanga thaj ruđisarda le vakerindoj: Devljutnea, te mangljan šaj te užarema.

¹³ Thaj lunđarindoj po vast dolinđa le thaj phenđa: Mangav, užar tut! Thaj sigate e đeramni geli lestar.

¹⁴ Thaj ov leske vakerda kaj nikaske te na phenel: Aj đa thaj sikav tut e rašajeske, thaj legar davipe baš užaripe, tiro, sar čhinada o Mojsije baš o čačavdipe lenđe.

¹⁵ Aj o krlo lestar vađe majbut buhljola, thaj but seloro arakhadile pe te šunen le thaj len vov te sastarel lengere nasvalimastar.

¹⁶ A ov durardola pe ani drmina thaj ruđila pe e Devlese.

¹⁷ Thaj kerdilo pe jekh dive kana ov sikavđa, kaj bešle gothe o Fariseja thaj e kanunora save avile kotar o sa e gava galilejake thaj judejake vi andar o Jerusalim; thaj sine zor e Devljutnesiri len te sastarel;

¹⁸ Thaj dikh, e manuša ande po pašljardo e manuše savo sine lindo, thaj rodena sar le anenle thaj te pašljaren le anglo leste.

¹⁹ Thaj na arakhle kotar ka legarenle kotar o seloro, iklile po kher thaj andar o ćhatlo mekle le pašljardo ko maškar anglo Isus.

²⁰ Thaj dikhindoj o paćavipe lengoro phenđa leske: Manušeja, jertisaven pes tuke e bezeha tire.

²¹ Thaj lije te den godi ana peste e lilvarne thaj e fariseja vakerindoj: Ko si akava so vakerel mahripe? Ko šaj te jertisarel e bezeha sem jekh Devel?

²² A haljarindoj o Isus so dije godi irisarindoj phenđa lenge: So dijen godi ane tumare vile?

²³ So si po lokhe, te phene: Jertinpe e bezeha tire, ja te phene: Ušti thaj phir?

²⁴ Aj te đanen kaj o baroderipe isi e Čhave e Manušesere ki phuv te jertil o bezeha, – phenđa e lindeske: Tuke vakerav, ušti thaj le tiro pašljardo thaj đa tire khereste.

²⁵ Thaj sigo uštilo anglo lende, thaj lija pe soste pašljola, thaj gelo ple khereste ašundindoj e Devle.

²⁶ Thaj sare prašukarisajle, thaj ašudinde e Devle, thaj pherdine dar vakerena: Sastaripe baro dikhljam avdive!

E Matejesoro akhardipe

²⁷ Thaj atoska iklistilo, thaj dikhlja e hudutne palo anav Levije kaj bešel ki hudutni, thaj phenđa lese: Ava pala mande.

²⁸ Thaj mekljindoj sa, uštino thaj lijape palo leste.

²⁹ Thaj kerda leske o Levije ko kher plo baro xape; thaj sine but hudutnara thaj avera save bešena oleja ko astalja.

³⁰ Thaj mrminđe e lilvarne lengere thaj e Fariseja vakerindoj lesere sikljovnenge: Sose e hudutnencar thaj e bezehutnencar xana thaj pijena?

³¹ Thaj irisarindoj o Isus phenđa lenge: Ni trubun e saste sastarutne aj e nasvale.

³² Ni avilem te akharav e vortutnen aj e bezehen ko jertipe.

³³ A on lese phenđe: Sose o sikljovne e Jovanosere but postinena thaj ruđipe keren, a ađakar vi e farisejengere; đikaj tire xana thaj pijena?

³⁴ A vov lenge phenđa: Sar šaj te traden e abavaren te postinen đikaj si o terno lenca?

³⁵ Aj ka aven o divesa kana ka čorel pe o terno lendar, thaj atoska ka postinen ano odola dive.

³⁶ Mothoda lenge vi e paramiči: Khonik ni čhivel o kotor katar o nevo fostani pe purano fostani, kaj ka vi e nevi ka pharavel, thaj e puranjake naj lačho kotor e nevastar.

³⁷ Thaj khonik ni čhorel mol nevi ane purane morćha, kaj e mol nevi ka pharavel e morćha, thaj odova ka čhordol, thaj e morćha ka pharavđon.

³⁸ Aj e mol nevi ane morćha neve trubul te čhorelpe, thaj solduj ka arakhen pe.

³⁹ Thaj khonik kova pilja purani ni mangel sigo nevi; kaj phenel e purani si polaćhi.