Lukéstar 4 - Romski prevod Novog zaveta - Srbija

E Isusesoro zumavipe

¹ O Isus ta pherdo Đi Sumnalo irinđape katar o Jordan, thaj sine legardo Đesa ani drmina.

² Thaj saranda dive zumavda le o beng, thaj ni xalja khančik ane odola dive; thaj kana von pherdile, teg bokhalilo.

³ Thaj phenđa leske o beng: Te sijan Čhavo e Devlesoro, phen akale barese te ovel maro.

⁴ Thaj irisarda lese o Isus vakerindoj: Hramome si: Na đivdini o manuš numa e marestar, aj katar sarsavo lafi e Devlesoro.

⁵ Thaj legarda le o beng pe plajin e uči thaj mothovđa lese sa e thagariba akale themesko baš momenti e jakhako.

⁶ Thaj phenđa lese o beng: Tuke ka dav sa o barederipe akava thaj ašundipe lengo, kaj mange si dindini, thaj kase mangav dava ola.

⁷ Tu, akana, te teljardiljan anglal mande, sa tiri ka ovel.

⁸ Thaj irisarindoj o Isus phenđa lese: Đa mandar, Satano, kaj si hramome: E Devljutne Devlese teljardov, thaj lese jekheske kande.

⁹ Thaj legarda le ano Jerusalim thaj čhuta le pe phak e khangirako, thaj phenđa lese: Te sijan Čhavo e Devlesoro, ripin akatar tele.

¹⁰ Kaj si hramome so ple phakalenge ka vakerel baš tute ta te arakhen tut.

¹¹ Thaj ka len tut pe vasta te na khuvetu ko bar tire preja.

¹² Thaj irisarindoj o Isus phenđa lese: Vačerdo si: Ma zumav e tire Devljutne Devle.

¹³ Thaj kana agorinđa o beng sa e zumaviba, đelo lestar baš nesavo vaxto.

Vakeribe ani Galileja

¹⁴ Thaj iranđape o Isus ani zor e Đeski ani Galileja; thaj gelo krlo lestar pe sa o trujalipe.

¹⁵ Thaj vov sikavela pe lengere sinagoge, thaj savore le ašarena.

¹⁶ Thaj avilo ano Nazaret kaj sine arakhlo, thaj đerdinđa po siklipe plo ano dive savatosko ani sinagoga, thaj uštino te đinavel.

¹⁷ Thaj dije lese o lil e profetosoro Isaija, thaj putarindoj o lil arakhla than kaj sine hramome:

¹⁸ O Đi e Devlesoro si pe mande; odoleske maznosardas man te mothovav lošalo nevipe e čororenge; bičhalda ma te sastarav e phagen ano vilo; te vakerav e phandlenđe kaj ka oven mukle, thaj e kororenđe kaj ka dikhen; te mekljarav e uštaden;

¹⁹ Thaj te vakerav lačho berš e Devljutnesoro.

²⁰ Thaj phandindoj o lil, irinđa e kandineske thaj bešlo; thaj e jakha sarijengere ani sinagoga sine uperime pe leste.

²¹ A lija lenge te vakerel: Avdive pherdilo akava Lil ane kana tumare.

²² Thaj sare lese čačavde, Thaj pherdile lengere vile e bahtardimaskere laforenca, save ikljona andar o muj lesoro, thaj vakerena: Naj li akava o čhavo e Josifesoro.

²³ Thaj phenđa lenge: Sarjekh ka phenen mange akaja gođavarutni: Sastarutneja, sastar tut korkoro; so šunđam kaj sine ano Kapernaum ker vi akate ano tiro bijando than.

²⁴ Phenđa pale: Čače tumenge phenav kaj nijekh profeto nane penđardo ano plo bijando than.

²⁵ A o čačipe tumenge phenav: But phivlja sine ano Izrailj ano vaxto e Ilijasoro, kana o badali phandilo baš o trin berš thaj šov masek, thaj sine bari bokh pe sa e phuv;

²⁶ Thaj nijekhake katar lendar na sine bičhaldo o Ilija đi ani Sarepta e Sidonakiri e romnjake e phivljake.

²⁷ Thaj but sine đeramne ano Izrailj ano vaxto e profetosko Jelisejesko; thaj nijekh katar lendar ni khoslilo đi o Neeman Sirijano.

²⁸ Thaj sare ani sinagoga pherdile xoli kana šunde akava.

²⁹ Thaj uštindoj ikaldole avrijal andar i diz thaj legardole po ućipe e plajinako kaj sine lengi diz vazdime, thaj ole te frden upral.

³⁰ Aj ov nakhlo maškar olende, thaj gelo.

Vakeribe thaj sastaripe ano Kapernaum

³¹ Thaj hulilo ano Kapernaum, diz e galilejaki, thaj sikavela len savatose.

³² Thaj xasardilesa pe lesoro đandipe but; kaj o džanipe lesoro sine zoralo.

³³ Thaj ani sinagoga sine o manuš e đesa džungalesa, thaj akharđa andar sa o krlo

³⁴ vakerindoj: Nakh tu, so mange amendar, Isuse Nazarećanino? Avilan te xasares amen? Đanav tut ko sijan: Sumnalo e Devlesoro.

³⁵ Thaj daravda le o Isus vakerindoj: Phande to muj, thaj ikljov andar leste! Thaj peravindoj le o đungalo đi ko maškar, iklistilo andar leste thaj nihari leske nakerda.

³⁶ Thaj e dar astarda sarijen thaj vakerena maškar peste vakerindoj: Savo si odova lafi kaj barederimasa thaj zorasa kerel e đi đungalenge, thaj ikljon?

³⁷ Thaj gelo o krlo olestar pe sa trujalime thana.

³⁸ Vazdindoj pe pale andar i sinagoga, alo e Simonese ano kher; a e sasuja e Simonesera astarda sine bari šilavni, thaj ruđisarde les baš olake.

³⁹ Thaj terdindoj upral late daravda e šilavna, thaj meklala. Thaj sigo uštili thaj kandla len.

⁴⁰ Thaj kana phađilo o kham, savore saven sine nasvale katar e savetane nasvalimata anena len leste; a ov pe sarijende katar lendar čhivela pe vasta, thaj sastarena len.

⁴¹ A vi e đungale đe inkljona andar but đene vikindoj thaj vakerindoj: Tu sijan o Hristos Čhavo e Devlesoro. Thaj daravindoj len ni meklja te vakeren te đanen kaj si ov o Hristos.

⁴² A kana alo dive, iklistilo thaj gelo ano čučo than; thaj o seloro rodinđale, thaj avena leste thaj ačhavena le te na đal katar lendar.

⁴³ A ov lenge phenđa: Thaj vi e avere diza trubul mange te mothovav lošalo nevipe kotar o Thagaripe e Devlesoro; kaj sem pe odova bičhaldo.

⁴⁴ Thaj vakerela pe sinagoge e galilejakere.