Lukéstar 24 - Romski prevod Novog zaveta - Srbija

Đivdisaripe

¹ A ano angluno dive e kurkesoro avile but sabajle po limori, thaj ande sungipe so kerde, a olenca thaj nesave avera đuvlja;

² Aj arakhle o bar cidimo e limorestar.

³ Thaj đerdindoj na arakhle o trupo e Devljutnesoro e Isusesoro.

⁴ Thaj đikaj on odolese čudisajle, dikh, duj manuša aćhile anglo lende ane strefimasere fostanja;

⁵ A kana on darandile thaj peravde pe muja pe phuv, phende lenge: So roden e đivde maškaro mule?

⁶ Nane akate, aj uštino; den tumen godi sar tumenge phenđa đikaj pana sine ane Galileja,

⁷ vakerindoj sar o Čhavo e Manušesko trubul te ovel dindo ane vasta e manušengere e bezahengere thaj te ovel inzardo thaj o trito dive te đivdinel.

⁸ Thaj dindile gođate lesere lafonenge.

⁹ Ta irindoj e limorestar, mothovde sa akava e Dešujekhenge thaj sarijenge avrenge.

¹⁰ A odova sine e Magdalina Marija thaj e Jovana thaj e Marija Jakoveski thaj e avera olencar save phende akava e apostolenge.

¹¹ Thaj akalenge kerdilo pe lenge lafija sar vakeripe ano suno, thaj ni paćaje len.

¹² A o Petar uštilo ta prastandilo po limori, thaj telindoj dikhlja numa e učharutne kaj sa pašljardo, thaj gelo napaćavindoj ana peste odolese so kerdilo pe.

O Isus mothojpe e duje sikljovnenge

¹³ Thaj dikh, dujore lendar đana ane odova dive ano gav savo sine dur e Jerusalimestar šovardeš stadijura thaj akharela pe Emaus.

¹⁴ Thaj on vakarena maškaro peste kotar e sa akala kerdipa.

¹⁵ Thaj đikaj on vakerena thaj mothovena, pašilo vi o korkoro Isus thaj đala lencar.

¹⁶ Aj e jakha lengere sine ačhavde kaj le te na penđaren.

¹⁷ A ov lenge phenđa: Savo si odova vakeripe savo keren maškaro tumende dok phiren, thaj sose sijen bilošale?

¹⁸ A jekh palo anav Kleopa, irisarindoj phenđa lese: Sar tu san jekhuno avrutno ano Jerusalim, thaj sar ni džangljardan so ane leste kerdilo pe akala dive?

¹⁹ Thaj phenđa lenge: So? A on phende lese: Kotar o Isuso Nazarećano, savo sine manuš profeto, zoralo pe kotor thaj ane lafija anglo Devel thaj pe sa e selore;

²⁰ Sar le dinde e anglunerašaja thaj e barederutne amare te ovel krisime po meripe, thaj inzarde le?

²¹ A amen ašuđardam kaj si ov odova savo ka ikljarel e Izrailje. Aj upripe saheste odolese, akava si avdive o trito dive sarkana akava kerdilo.

²² A daravde amen vi nesave đuvlja maškar amende save sine sabajle po limori,

²³ ta ni arakhavindoj o trupo lesoro, avile vakerindoj kaj dikhle vi o sikavipe e phakalengoro savo vakerđa kaj si ov đivdo.

²⁴ Thaj nesave amarendar gele po limori, thaj arakhle ađahar sar so vi e đuvlja phenđe, aj le ni dikhle.

²⁵ A ov lenge phenđa: O bigođakere thaj polokine vilese baš paćajmase ano sa so vakerđe e profetija!

²⁶ Na li trubuja kaj o Hristos odova te nakhel thaj te đerdini ano ašundipe plo?

²⁷ Thaj lindoj kotar o Mojsije thaj sarijendar e Profetondar mothoda lenge so si ane sa Lila lestar hramome.

²⁸ Thaj pašile e gaveske ane savo đana, thaj ov kerdola pe kaj mangel podur te đal.

²⁹ A on le ačhavena vakerindoj: Ačhov amencar, kaj o dive teljarda thaj paše si e rat. Thaj đerdinđa te ačhol olencar.

³⁰ Thaj đikaj ov bešela lencar baš o astalja, lindoj omaro baxtarda thaj phagindoj le dija olenge.

³¹ A lenge pravdile e jakha thaj penđarde le. Thaj ov ulo nadikutno baš olenge.

³² Thaj phenđe on jekh avrese: Na li thabjola o vilo amaro anamende đikaj amenge vakerda drumal thaj đikaj amenge mothovđa e Lila?

³³ Thaj uštindoj odova časo, irisajle pe ano Jerusalim, thaj arakhle čedime e Dešujekhen thaj odolen save sine lencar.

³⁴ Save vakerena: Čače uštino o Devljutno, thaj mothovđape e Simonose.

³⁵ Thaj on mothovđe so sine po drom, thaj sar le penđarde kana phaglja o maro.

O Isus mothojpe e apostolonenge

³⁶ Thaj đikaj on akava vakerena, vi korkoro o Isus ačhilo maškar lende, thaj phenđa lenge: Šandipe tumenge!

³⁷ A on darandile, thaj avune darandine, gindisarde kaj dikhen e đe.

³⁸ Thaj phenđa lenge: So sen xasardine? Thaj sose asavke gindimata đerdinen ane tumare vile?

³⁹ Dikhen e vasta mle thaj e pre mle, kaj sem me šeresa; azbaven ma thaj dikhen; kaj o đi nanole trupo thaj kokala sar so dikhen kaj man isi.

⁴⁰ Thaj akava vakerindoj sikavđa lenge e vasta thaj e pre.

⁴¹ A đikaj vađe na paćana e lošalipestar thaj đikaj na paćana, phenđa lenge: Isitumen li akate so xapeske?

⁴² A on leske dinde kotor peke mačhesko, thaj avgin ane saća.

⁴³ Thaj lindoj xala anglo lende.

⁴⁴ A lenge phenđa: Akala si e lafija save tumenge vakerdem pana đikaj sema tumencar, kaj musaj sa te pherdol so si mandar hramome ano Kanuni e Mojsijasoro vi ano Profetija vi ano Psalmija.

⁴⁵ Tegani lenge putarđa e godi te haljoven e Lila.

⁴⁶ Thaj phenđa lenge: Ađahar si hramome, thaj ađahar trubuja kaj o Hristos te xasardol thaj te đivdinel andar e mule o trito dive,

⁴⁷ thaj kaj ano lesoro anav te mothovelpe o jertipe thaj meklipe e bezehengo pe sa e selore, lindoj kotar o Jerusalim.

⁴⁸ A tumen sen dikhutne akalese.

⁴⁹ Thaj eke, me ka bičhalav o alavdinipe mle Dadesoro pe tumende; a tumen bešen ani diz Jerusalim đikaj na ka urjaven tumen ane zor e učipestar.

Inkalipe po badali

⁵⁰ Thaj ikalđa len avri đi e Vitanija, thaj vazdindoj e vasta ple baxtarda len.

⁵¹ Thaj đikaj len ov baxtarela, durilo lendar thaj legardilo po badali.

⁵² A on lese teljardile thaj irinđepe ano Jerusalim bare lošalimasa.

⁵³ Thaj sine nakhinadine ano hramo ašarindoj thaj baxtarindoj e Devle. Amin!