Lukéstar 23 - Romski prevod Novog zaveta - Srbija

O Isus anglal o Pilato

¹ Thaj uštile but manuša thaj legarde le ko Pilato.

² Thaj lije le te krisin vakerindoj: Akale arakhljam kaj ulavel e selore amare, thaj čhinavel te den e thagarese porezi, thaj vakerel kaj si ov Hristos thagar.

³ A o Pilato phućja le vakerindoj: Aj tu li sijan o thagar e judejengo? A ov irisarindoj phenđa lese: Tu pheneja.

⁴ A o Pilato phenđa e anglunerašajenge thaj e selorenge: Ni arakhav nisavi doš pe akava manuš.

⁵ A on sajekh rupuzisarena vakerindoj: Ov vazdel e seloren sikavindoj pe sa e Judeja počindoj akatar e Galileja pa sa đi akate.

O Isus anglal o Irodo Antipo

⁶ A o Pilato ašundoj baš e Galilejake pučlja: Aj si akava manuš Galilejco?

⁷ Thaj đanglindoj kaj si kotar o agor e Irodosko, bičhalda le e Irodose, savo vi korkoro sine ano Jerusalim odole divende.

⁸ A o Irod dikhindoj e Isuse but lošalisajlo; kaj poangle manglja te dikhel le, kaj but šunđa lestar, thaj ašuđarela kaj ka dikhel lestar nesavo semno.

⁹ Thaj čhivena lese but phućipa; aj lese ov khančik ni irinđa.

¹⁰ Ačhena pale e anglunerašaja thaj e lilvarne thaj zorale le krisinena.

¹¹ A o Irod le teljarda ple askerencar thaj marda leja muj, urjavda le parno fostani thaj bičhalda le palal e Pilatose.

¹² Thaj ane odova dive baraštisajle o Pilat thaj o Irod maškaro peste; kaj angleder sine ane čingara.

E Isusesoro krisipe

¹³ A o Pilat, akharindoj e anglunerašajen thaj e phurederutnen thaj e seloren,

¹⁴ phenđa lenge: Anden mange akale manuše sar kaj ov dukhavel e seloren, thaj eke, me le anglal tumende phućljem, thaj ni arakhljem pe akava manuš nijekh doš kotar odola baš save le tumen krisinen;

¹⁵ A ni o Irod, adalese tumenge le palal bičhalda. Thaj eke, ni kerda khančik so bi therela o meripe.

¹⁶ Kaj le, akana, te pedepsiv thaj te mukav.

¹⁷ A musaj sa te lenge e bare divesestar te mukljarel jekhe.

¹⁸ A on savore khetane dije vika vakerindoj: Le akale, a mek amenge e Varava!

¹⁹ Akava sine čhudino ano phandipe baš nesavo vazdipe kerdo ani diz thaj mudaripe.

²⁰ A o Pilato palem dija vika manglindoj te mukel e Isuse.

²¹ A on dena vika vakerindoj: Inzar le, inzar!

²² A ov lenge po trito drom phenđa: Savo si, akana, đungalipe ov kerda? Me khančik pe leste ni arakhljem so ka ma therela meripe; akana, te pedepsiv le thaj te mekav le.

²³ A on jekhune rupuzisarena bare viknipasa, thaj rodena kaj ov te inzardol; thaj upralzorarda e vika lengiri thaj e anglunerašajengi.

²⁴ Thaj o Pilat anglakrisisarda te ovel po lengo rodipe.

²⁵ Thaj meklja lenge e Varave, čhudino ano phandipe baš o vazdipe thaj mudaripe, save rodena, a e Isuse dija lenge pe lengo kamipe.

Inzardipe

²⁶ Thaj kana legardele, ačhavde nesave Simone Kirinejco, savo irinelape kotar umalin, thaj čhute pe leste o trušul te legarel palo Isus.

²⁷ A palo leste đana baro bute selore thaj đuvlja, save rovena thaj rikninena palo leste.

²⁸ A o Isus irindoj pe lende phenđa: Ćhija e jerusalimesere, ma roven pala mande, aj roven pala tumende thaj palo ćhavore tumare.

²⁹ Kaj ake, avena e dive ane save ka phenel pe: Šukaripe e nabijanutnenge, thaj e vođijenge savena bijande, thaj e čučijenge save na dinde čuči.

³⁰ Teg ka lel te vakerel e plajinenge: Peren pe amende; thaj e ućipenge: Učharen amen!

³¹ Ked akana kerena ađahar e sapane kašteja, so li ka ovel e šukeja?

³² Legarena vi avera duj đungalećerutnen lesa te xasaren.

³³ Thaj kana avile po than akhardo Šeresko, odothe inzarde le thaj e đungalećerutnen, jekhe e daxne rigatar, a e dujtone zervatar.

³⁴ A o Isus vakerela: Dade, jertisar lenge, kaj na đanen so keren! Thaj ulavindoj e fostanja lesere čhudena barbuti.

³⁵ Thaj e selore ačhena dikhindoj. A vi e phurederutne marena muj oleja vakerindoj: Avren ikalđa, nek ikljarel vi pes, te si ov o Hristos, alosarutno e Devlesoro.

³⁶ A vi e askera marena muj, pašona thaj dena le šut.

³⁷ Thaj vakerena: Te sijan tu thagar e judejengo, ikal korkore tut!

³⁸ A sine upral oleste thaj hramope hramosardo grafemenca ko jelinsko thaj latinsko thaj ko jevrejsko: Akava si thagar e judejengo.

³⁹ A jekh kotar e umblavde džungalećerutne mahrisarela pe leste vakerindoj: Te sijan tu o Hristos, ikal tut thaj amen!

⁴⁰ A e aver irisarindoj krisarela le vakerindoj: Sar tu na dara e Devlestar, kana san vi korkoro krisime ađahar?

⁴¹ A amen sam vortome krisime, kaj leljam pe amare kotora sar so therisardam; a ov nisave džungalipa ni kerda.

⁴² Thaj phenđa e Isusese: Detu godi pe mande, Devljutnea, kana ka ave ano Thagaripe tiro.

⁴³ Thaj phenđa lese o Isus: Čače tuke phenav, avdive ka ove mancar ano raj.

⁴⁴ A sine trujal o šovto časo, thaj raćipe sine pe sa e phuv đi o časo enjato.

⁴⁵ Thaj raćisajlo o kham, thaj e perdava e hramoski pharavdili ano ekvaš.

⁴⁶ Thaj dindoj vika o Isus andar o sa krlo phenđa: Dade, ane vasta tire mekava o đi mlo. Thaj vakerindoj akava mulo.

⁴⁷ A kana dikhlja o kapetano so kerdilo pe, paćivisarda e Devle vakerindoj: Čače akava manuš sine vortutno.

⁴⁸ Thaj sa e selore save čedindepe te dikhen akava kerdipe, kana dikhle so ulo, irisajle marindoj ane kolina.

⁴⁹ A ačhena dural savore e pendžarutne lesere thaj e đuvlja save đana palo leste kotar e Galileja, dikhindoj akava.

E Isusesoro parunipe

⁵⁰ Thaj dikh, o manuš po anav Josif, savo sine phurederutno thaj manuš lačho thaj vortuno, kotar Arimateja, diz e judejakiri,

⁵¹ savo ni aćhilosa pe lengo čhinadipe thaj pe lengo kotor, a vi korkoro ađikerela o Thagaripe e Devlesoro,

⁵² pašindoj e Pilatose rodinđa o trupo e Isusesoro.

⁵³ Thaj huljarda le thaj ućharda poxtanosa, thaj pašljarda le ano limori čhindo ano bar, ano savo nasine nijek pašljardo.

⁵⁴ Thaj dive sine paračuvi, thaj o savato divesajvola.

⁵⁵ A đana ano phiripe vi e đuvlja, save ale e Isuseja kotar e Galileja, thaj dikhle o limori thaj sar sa pašljardo o trupo lesoro.

⁵⁶ Ta irisajle thaj gatisarde sungajipa thaj miro. O savato pale nakhavde ano šandipe po Kanuni.