Lukéstar 22 - Romski prevod Novog zaveta - Srbija

E Judasoro avrićhuvipe

¹ Pašola o baro dive e bimajavengere marenge akhardo Pasha.

² Thaj rodena e anglunerašaja thaj e lilvarne sar te mudaren le; aj darana e selorestar.

³ A o beng đerdinđa ano Juda, akhardo Iskariotski, savo sine kotar o gindo e Dešudujengoro.

⁴ Thaj gelindoj vaćerda e anglunerašajenca thaj lilvarnenca thaj e bare askeregenca sar lenge ole ka avrićhivel.

⁵ A on lošalisajle, thaj čhinavde te den le love.

⁶ Thaj ov dija po lafi, thaj rodela lačho momenti te del le lenge bi lipe e selorengoro.

Garavdo raćakoro xape

⁷ Aj alo o dive e bimajavengere marenge ane savo trubula te čhinel pe pashaluno bakro.

⁸ Thaj bičhalda e Petre thaj e Jovane phenindoj: Đan thaj gatisaren amenge Pasha te xas.

⁹ A on lese phenđe: Kaj mange te gatisara?

¹⁰ A ov lenge phenđa: Ake, kana đerdinen ani diz, ka arakhel tumen o manuš savo ingarel khoro pani; đan pale leste ano kher ane savo ov đerdini.

¹¹ Thaj phenen e kherutne khereske: O sikamno tuke phenel: kaj si o than kaj ka xav e Pasha mle sikljovnenca?

¹² Thaj ov tumenge ka sikavel bari ućhardi upruni soba; gothe gatisaren.

¹³ Thaj von gele thaj arakhle sar so lenge phenđa; thaj gatisarde e Pasha.

¹⁴ Thaj kana alo o časo, bešlo baš e astala, thaj dešuduj apostolja oleja.

¹⁵ Thaj phenđa lenge: But mangljem kaj akaja Pasha te xav tumencar anglal aj so ka mudarđovav;

¹⁶ Kaj tumenge vakerav kaj ni ka xav la đikaj ni pherdol ano Thagaripe e Devlesoro.

¹⁷ Thaj lindoj e taxtaj ašarisarda, thaj phenđa: Len thaj ulaven la maškaro tumende;

¹⁸ Kaj tumenge phenav kaj ni ka pijav kotar o bijanipe drakhengo đikaj ni avel o Thagaripe e Devlesoro.

¹⁹ Thaj lindoj o maro ašarisarda, phaglja le thaj dija lenge vakerindoj: Akava si o trupo mlo savo del pe tumenge; akava keren bašo mlo dindipe godi.

²⁰ A ađahar vi e taxtaj palo raćako xape, vakerindoj: Akaja taxtaj si Nevi sovli ano rat mlo, savi si baš tumenge čhorel pe.

²¹ Aj ake e vasta mle avrićhutinese manca pe astalja.

²² Thaj o Čhavo e Manušesko, akana, đal sar si čhinavdo; aj pharipe e manušese odolese savo ole avrićhudel!

²³ Thaj on aćhile te Phučen pe maškaro peste savo ka ma, akana, lendar ovela odova savo odova ka kerel.

²⁴ A ulo vi čingarori maškar lende savo lendar haćarel pe kaj si najbaro.

²⁵ A ov lenge phenđa: E thagara e selorengere rajosaren upral lende thaj e bareder inćarutne lengere akharen pe laćhekerutne.

²⁶ Aj tumen ma ađahar te keren; aj ko si maškar tumende najbaro, nek ovel sar najterno, thaj o phureder sar kandino.

²⁷ Kaj ko si najbaro, savo bešel baš e astalja ja savo kandel? Naj li odova savo bešel baš e astalja? A me sem maškaro tumende sar kandino.

²⁸ A tumen sen odola save inćardilen mancar ano zumavipe mlo.

²⁹ Thaj me tumenge mekav amaneti o Thagaripe sar so o Dad mlo mange muklja amaneti,

³⁰ te xan thaj pijen baše mle astalja ano Thagaripe mlo, thaj te bešen pe thana thaj te krisisaren upral e dešuduj njamora e Izrailjeske.

³¹ Thaj phenđa o Devljutno: Simone, Simone, ake tumen čače o beng mangela te paćarel tumen sar o điv.

³² A me ruđisajlem tuke kaj o paćavipe tiro ni ačhel: thaj tu, kana irinetu, zurar tire phraljen.

³³ A ov lese phenđa: Devljutnea, tusa sem gatime vi ano phandipe vi ano meripe te džav.

³⁴ A ov phenđa: Phenav tuke, Petre, na ka avdive đilabel o bašno đikaj trin droma na čhude kaj man penđare.

³⁵ Thaj phenđa lenge: Kana tumen bićhaldem bi kesako thaj trastako thaj pođimasko, da li tumenge so nasine? A on phende: Khanči.

³⁶ A ov lenge phenđa: Aj akana savo isi le kesa nek lela, ađahar vi e trasta; a savo naj le nek bikinel o fostani plo thaj te kinel čhuri.

³⁷ Egolese tumenge phenav, kaj vađe vi odova so si hramome: Thaj čhute le maškar e bikanunutne, trubul te kerelpe pe mande; Kaj so si mandar hramome agorisarel pe.

³⁸ A on vakerde: Devljutnea, ake akate si duj čhurja. A ov lenge phenđa: Ačhaven.

Ruđipni pe Maslinengi plajin

³⁹ Thaj iklindoj gelo po siklipe pe Maslinakiri plajin; a palo leste gele vi e sikljovne lesere.

⁴⁰ A kana sine po than phenđa lenge: Ruđin tumen te na peren ano zumavipe.

⁴¹ Thaj korkoro durilo lendar kobor šaj e bareja te frdel pe, thaj telindoj pe kočija ruđisarela pe

⁴² vakerindoj: Dade, kana bi mange te nakhave akaja taxtaj bizo mande! Aj na mlo kamipe, aj tiro nek ovel!

⁴³ A mothovđape lese o phakalo e badalestar zurarindoj le.

⁴⁴ Thaj avune ane merimasko maripe, ruđila pe tate; a o teri lesoro sine sar pića e ratesiri save pićan pe phuv.

⁴⁵ Thaj uštindoj e ruđutnatar avilo e sikljovnenge, thaj arakhlja len sovindoj dukhatar,

⁴⁶ thaj phenđa lenge: So soven? Ušten thaj ruđin tumen te na peren ano zumavipe!

⁴⁷ Đikaj ov vađe vakerela, dikh e selore, thaj jekh kotar e Dešudujore, akhardo Juda, đala anglo lende, thaj pašilo e Isusese te čumidel le. Kaj lenge dinđa asavko semno: kas čumidav, odova si!

⁴⁸ A o Isus lese phenđa: Judo, aj čumidimasa avri frde e Čhave e Manušesere?

⁴⁹ A kana on so sine lesa dikhle so ka ovel, phenđe lese: Devljutnea, te mara čhurjasa?

⁵⁰ Thaj khuvđa jekh lendar e kandine anglunerašajesere, thaj čhinđa lesoro daxno kan.

⁵¹ A o Isus irisarindoj phenđa: Meken tumen odolestar. Thaj dolindoj pe lesoro kan, sastarda le.

⁵² A e anglunerašajenge thaj e bare hramosere askerenge thaj phurederutnenge save avile pe leste phenđa o Isus: Aj tumen sar po čor ikliljen čhurjencar thaj čhinimasa te astaren man?

⁵³ Sako dive sinjum tumencar ano hramo thaj ni vazdijen e vasta pe mande; aj akava si tumaro časo thaj baroderipe e raćako.

E Petrosoro čhudipe O Isus anglal o Sinedriono

⁵⁴ A kana astarde le, inđarde le thaj čhute ane palata e anglunerašajeski. A o Petar đala pala leste dural.

⁵⁵ Thaj kana tharđe e jag maškar e avlin thaj bešle khetane, vi o Petar bešlo maškar lende.

⁵⁶ Dikhindoj le ta jekh kandini kaj bešel ke jag, thaj dikhindoj pe leste phenđa: Vi akava sine lesa.

⁵⁷ A ov lestar durilo pe vakerindoj: Đuvlije, na penđarav le.

⁵⁸ Thaj hari pale odova dikhlja le vi aver thaj phenđa: Vi tu san lendar. A o Petar phenđa: Manušeja, najsem.

⁵⁹ Thaj kana nakhlo trujal jekh časo, aver khonik čačavda vakerindoj: Čače vi akava sine lesa; kaj si Galilejco.

⁶⁰ A o Petar phenđa: Manušeja, na đanav so vakereja. Thaj sigo đikaj ov pana vakerela đilabda o bašno.

⁶¹ Thaj irindoj o Devljutno dikhlja po Petar, thaj pelo ane godi e Petroske e lafija e Devljutnesere sar lese phenđa: Anglal so ka o bašno đilabel ka čhudetu mandar trin droma.

⁶² Thaj iklindoj avrijal, runđa ćerke.

⁶³ A e manuša save inćarena e Isuse prasana le, thaj marena le.

⁶⁴ Thaj ućharindoj marena le vakerindoj: Anglalmothov ko khuvđa tut?

⁶⁵ Thaj but aver akošiba vakarena pe leste.

⁶⁶ Thaj kana divesajlo pe, kidle pe e phurederutne e selorengere, e anglunerašaja thaj e lilvarne, thaj ingarde le ano plo Sinedrion

⁶⁷ vakerindoj: Te sijan tu o Hristos, vaker amenge. A ov lenge phenđa: Te tumenge vi phendem, ni ka paćan.

⁶⁸ A te tumen vi phućlem, na ka irisaren mange, ni na ka meken man.

⁶⁹ Akanatar o Čhavo e Manušesko ka bešel kotar e daxni rig e Devlesere zoraki.

⁷⁰ Savore ta phenđe: Tu li san, akana, o Čhavo e Devlesoro? A ov lenge phenđa: Tumen vakerena kaj sem me.

⁷¹ A on phenđe: So amenge trubul čačavdimata? Kaj korkore šunđam lesere mujestar.