Lukéstar 21 - Romski prevod Novog zaveta - Srbija

E phivljakoro davipe

¹ A dikhindoj upre dikhlja e barvalen kaj mekena plo davipe ane xasna e hramosiri.

² A dikhlja vi jekha čororja phivlja sar čhivel duj lepte;

³ Thaj phenđa: Čače tumenge phenav: akaja čorori phivlji čhuta najbut sarijendar:

⁴ Kaj sare akala čhute po davipe e Devlese kotar najbutipe plo, a oj kotar o čororipe plo čhuta sa o barvalipe plo so sinela.

Anglovakeribe kotar o peravipe e hramosoro

⁵ Thaj kana nesave vakerena baš o hramo kaj si lačhardo lačhe bareja thaj sovljakere daripendar, phenđa:

⁶ Ka aven o dive ane save kotar sa so dikhen ni ka ačhel ni bar po bar savo ni ka čhudinil pe.

⁷ Thaj phučle le vakerindoj: Sikamneja, kana odova ka ovel? Thaj savo si semno kana odova ka kerel pe?

⁸ A ov phenđa: Arakhen te na xoxaven tumen, kaj bute ka aven ano anav mlo vakerindoj: Me sem, thaj: Alo paše o vaxto. Ma te, akana, te đan palo lende.

⁹ A kana šunena baš o mariba thaj bilačhimata, ma te daran; kaj sa odova najanglal trubul te ovel, aj najsi sigo agor.

¹⁰ Teg lenge phenđa: Ka ušten o seloro pe seloro thaj o thagaripe po thagaripe;

¹¹ Thaj barophuvjakoro izdrape ka ovel pe thana, thaj ka ovel bokhalipe thaj meripe, vi e darajmata thaj e semne bare ka oven e badalestar.

¹² A anglal akaleste akalesoro, ka vazden pe tumende ple vasta thaj ka traden tumen thaj ka den tumen ane sinagoge thaj ano phandipe; ka legaren tumen anglal e thagara thaj vortutne ando anav mlo.

¹³ A odova ka kerelpe tumenge baš o čačavdipe.

¹⁴ Čhiven, akana, ano vile tumare, te na godisaren sar anglal ka irinen;

¹⁵ Kaj me tumenge ka dav vakeripe thaj bižajipe savake na ka šaj te anglathovel aj te irisaren sa tumare opipeutne.

¹⁶ A ka anglameken tumen vi e bijande, vi e phralja, vi e bijanimasere, vi e amala, thaj ka mudaren nesaven tumendar.

¹⁷ Thaj savore tumen ka riton ando anav mlo.

¹⁸ Ni bal e šerestar tumarestar ni ka perel.

¹⁹ Tumare nakhavipnaja ikalen e đe tumare.

²⁰ A kana dikhen kaj e askera trujalisarde o Jerusalim, teg te đanen kaj alo paše o peravdipe lesoro.

²¹ Teg, save ka oven ani Judeja nek našen ane plajina, thaj save ka oven ano korkoruno foro nek ikljoven avrijal, thaj save si ane umalin ma te đerdinen ano foro;

²² Kaj akala si divesa irinmaske, te pherel pe sa so si hramosardo.

²³ A pharipe si e khamnjenge thaj kola den čuči ane odola dive. Kaj ka ovel belava bari pe phuv, thaj xolji pe seloro akava.

²⁴ Thaj ka perel kotar e ostro sablja, thaj ka oven legarde ano phandipe pe sa e selore; thaj o Jerusalimo ka uštaven e butdevlese đikaj ni pheren pe e vaxtija e butdevlengere.

Avipe Ćhavesko e Manušesko

²⁵ Thaj ka oven semne po kham thaj čhon thaj čerenja; thaj pe phuv pharipe thaj belava e selorenge ane dar kotar o šušuripe e deravesoro thaj e talasengoro.

²⁶ Ka meren o manuša daratar thaj kotar o ašuđaripe odolestar so avel pe lumija; kaj e zora e badaleske ka miškon pe.

²⁷ Thaj teg ka dikhen e Čhave e Manušesere kaj avel pe nuvero zorasa thaj bara ašundipasa.

²⁸ A kana ka lel pe akava te kerelpe, ortosavon thaj vazden e šere tumare, kaj avela paše o ikalipe tumaro.

²⁹ Thaj vakerda lenge e paramiči: Dikhen pe sumučinalin thaj pe sa e kašta;

³⁰ Kana dikhen kaj akana ikljen e luluđa, korkore đanen kaj si eke paše o nilaj.

³¹ Ađahar vi tumen kana dikhen kaj akava kerela pe, đanen kaj si paše o Thagaripe e Devlesoro.

³² Čače tumenge vakerav kaj akaja generacija ni ka nakhel đikaj akava sa ni ovel.

³³ O badali thaj e phuv ka nakhen, a e lafija mle ni ka nakhen.

³⁴ Aj arakhen pe peste kaj e vile tumare ni phararen bute xamasa thaj pimasa thaj grižasa akale đivdimasko, thaj kaj o Dive odova ni maladol pe tumende biašuđarune.

³⁵ Kaj ka avel sar flinka pe sarijende save đivdinen po muj sa e phuvjako.

³⁶ Oven đangade, akana, ano sarsavo vaxto ruđindoj te mothoven paćavipe te duraren sa so si te kerel pe, thaj te ačhen anglal Čhavo e Manušesko.

³⁷ A sine ov diveja ano hramo thaj sikavđa, a raćasa ikljola thaj bešela pe plajin akhardi Maslinska.

³⁸ Thaj sa o selore siđarena sabalese pe leste ano hramo te šunen le.